1
ივნისიდღის ზოგადი ასტროლოგიური პროგნოზი
საქართველოს პრეზიდენტი რუსეთს საბჭოთა გონებისგან გათავისუფლებისკენ მოუწოდებს. ამის შესახებ მიხეილ სააკაშვილმა გაერო-ს 65-ე სესიაზე სიტყვით გამოსვლისას განაცხადა.
"ჩემი მოწოდება მიმართულია რუსეთის ხელმძღვანელობისადმი: თქვენ არჩევანის წინაშე დგახართ. თქვენ ჩვენი საერთო რეგიონის მიმდინარე ტრანსფორმაციაში უნდა მიიღოთ მონაწილეობა, სხვა ქვეყნები უნდა აღიქვათ არა როგორც ვასალები, არამედ - როგორც პარტნიორები. სხვა შემთხვევაში, ეს ტრანსფორმაცია თქვენს გარეშე მოხდება", - განაცხადა მიხეილ სააკაშვილმა.
პრეზიდენტის თქმით, სურს, რუსეთი პარტნიორად იხილოს და არა - მტრად; ამიტომაც საქართველოს მთავრობა მხარს უჭერს აშშ-ის ახალ პოლიტიკას და ევროკავშირის რუსეთთან ჩართულობას.
"არავის არ გამოუცდია ჩვენზე მეტი ტკივილი. ჩვენ რუსეთის მიერ ერთა შეთანხმების უგულებელყოფის, საერთაშორისო კანონის უპატივცემულობის მომსწრე გავხდით, რაც ადამიანის ძირითადი უფლებების დარღვევასაც გულისხმობს. მინდა რუსეთის საზოგადოებას ვუთხრა, რომ მათ, როგორც ტურისტებს, სტუდენტებს, ბიზნესმენებს, ჟურნალისტებსა თუ უბრალოდ მეგობრებს ყოველთვის ექნებათ გზა ხსნილი საქართველოში და არასდროს როგორც ოკუპაციურ ძალებს", - განაცხადა სააკაშვილმა.
პრეზიდენტმა რუსეთის ხელისუფლებას მოუწოდა, იმის ნაცვლად, რომ ძირი გამოუთხარონ საქართველოს განვითარებას, ცეცხლმოდებული ჩრდილოკავკასიის განვითარებაზე და საკუთარ მოქალაქეებზე იზრუნონ.
"სურვილის შემთხვევაში, ჩვენ მათ სიამოვნებით მივიღებთ, რათა იხილონ, თუ როგორ იქცა ყოფილი საბჭოთა კავშირის საზოგადოება ევროპულად. მე მათ ვეპატიჟები, მოვიდნენ არა ჭურვებით, არამედ კომპაქტური კომპიუტერებით; არა "კალაშნიკოვებით", არამედ - აიპოდებით. მიხარია, რომ ზოგიერთს ჩვენს მიერ გატარებული რეფორმების გადაღების სურვილი გაუჩნდა. ეს შეუიარაღებელი თვალითაც შესამჩნევია ბოლო დროს მოსკოვში, საპრეზიდენტო გამოსვლებში. იმის ნაცვლად, რომ ერთმანეთს ვებრძოდეთ, ერთმანეთს უნდა შევეჯიბროთ ჩვენი საერთო რეგიონის მოდერნიზებაში", - აღნიშნა საქართველოს პრეზიდენტმა.
მისივე თქმით, რეფორმების ფარულად გადაღებისა და შურის ნაცვლად, რუსეთს საქართველოსთან თანამშრომლობა შეუძლია, რათა კავკასიაში სტაბილური და თავისუფალი ზონა აშენდეს.
"თუკი შემოიფარგლები ხუთოსანი მოსწავლის ნაწერიდან ფარულად გადაწერით, ვერ შეძლებ მოდერნიზაციის სრული სურათის დანახვას. ნება მომეცით აღვნიშნო, რომ სრული სურათი საკმაოდ მარტივია: თუკი პატივს არ სცემ ძირითად წესებს, შეუძლებელია, მიაღწიო ხანგრძლივ სტაბილურობასა და კეთილდღეობას. მოდერნიზაცია თავისუფლების გარეშე არ არის მდგრადი. არ უნდა გქონდეს შენი ეკონომიკის დივერსიფიკაციისა და განვითარების იმედი მაშინ, როდესაც შენს ყველაზე წარმატებულ ბიზნესმენებს, მიხეილ ხადარკოვსკის მსგავსად, გულაგში აგზავნი. მხოლოდ კომპიუტერი არ არის საკმარისი. მათ გამოყენებასთვის აუცილებელია თავისუფალი აზროვნება. იმისათვის, რომ საერთო მომავალი ავაშენოთ, გონება საბჭოთა წარსულისგან უნდა გათავისუფლდეს", - განაცხადა მიხეილ სააკაშვილმა.
