"ოპოზიციამ ბოდიში უნდა მოუხადოს თამარ ჟვანიას" - რას ამბობენ უმრავლესობის ლიდერები თამარ ჟვანიას შესაძლო გადადგომის შესახებ

იურიდიული კომიტეტის თავმჯდომარის, ანრი ოხანაშვილის განცხადებით, თამარ ჟვანიას გადადგომის საკითხი „არ და ვერ იქნება განხილვის საგანი“.

როგორც მან ჟურნალისტებს განუცხადა, თამარ ჟვანიამ და ცესკო-ს გუნდმა შრომა გასწიეს, არჩევნები შედგა და ამიტომ „მათთვის აქვს ჯერ ბოდიში მოსახდელი ზოგიერთ არასამთავრობო ორგანიზაციას და ოპოზიციას“.

ამასთან, მისივე თქმით, მმართველი გუნდის შეთავაზება ოპოზიციისადმი, რომ ცენტრალური საარჩევნო კომისიის თავმჯდომარის მოადგილე პროფესიული ნიშნით შეარჩიონ, რაციონალური და სამართლიანია.

„ქართული ოცნების“ გუნდს აქვს სამართლიანი შეთავაზება ოპოზიციისადმი, რომ პირველი მოადგილე იყოს პოლიტიკურად ნეიტრალური, უფრო მეტი პროფესიული კვალიფიკაციის მქონე პირი და საჭიროების შემთხვევაში ის იყოს მოვალეობის შემსრულებელი. თუ ამ სამართლიანი და რაციონალური წინადადების საწინააღმდეგო არგუმენტს ვინმე წარმოადგენს, სიამოვნებით მოვუსმენთ, თუმცა აქამდე ასეთი არგუმენტი არ მოგვისმენია. ეს ნიშნავს იმას, რომ ეს არის რაციონალური და სამართლიანი მიდგომა, ნაცვლად იმისა, რომ პირველი მოადგილე იყოს პოლიტიკურად დაინტერესებული, კონკრეტული პარტიის ინტერესების გამტარებელი, ვთავაზობთ, რომ არცერთი პარტიის წარმომადგენელი არ იყოს, იყოს უფრო მეტად პროფესიონალი, პოლიტიკურად ნეიტრალური და სწორედ პროფესიული ნიშნით მიიღოს კონკრეტული გადაწყვეტილებები“, - განაცხადა ოხანაშვილმა.

ის ასევე გამოეხმაურა ამნისტიის შესახებ კანონპროექტს და აღნიშნა, რომ „ქართული ოცნების“ მიერ დაინიცირებული კანონპროექტი სამართლიანია და შარლ მიშელის დოკუმენტის სულისკვეთებას ასახავს.

„საკომიტეტო მოსმენებზე გამოჩნდება, რამდენად სამართლიანია ჩვენი პოზიცია. ხოლო ოპოზიციის მიდგომა ნამდვილად არაა სამართლიანი და არც თანასწორობის პრინციპებს იცავს“, - განაცხადა ოხანაშვილმა.

ოპოზიციის მხრიდან ბოდიშის მოხდაზე საუბრობს ასევე საპარლამენტო უმრავლესობის ერთ-ერთი ლიდერი შალვა პაპუაშვილი.

მისი თქმით, თუ ოპოზიცია ბოდიშს არ მოიხდის, სულ მცირე იმის გამბედაობა მაინც უნდა ეყოს, რომ მოიკითხოს, რა გადაიტანა ცესკო-ს თავმჯდომარემ არჩევნების შემდგომ პერიოდში, როდესაც მასზე პერსონალური შეტევა ხორციელდებოდა.

შალვა პაპუაშვილის თქმით, თავად ის ფაქტიც, რომ ოპოზიციას საპარლამენტო საგამოძიებო კომიტეტში მუშაობა არ სურს საპარლამენტო არჩევნების თემასთან დაკავშირებით, ადასტურებს, რომ მათ არანაირი არგუმენტები არჩევნების გაყალბებასთან დაკავშირებით არ აქვთ.

„მე ვფიქრობ, ოპოზიციამ კიდევ ერთხელ უნდა დააფიქროს, სად იმყოფება. გუშინ თქვენ ნახეთ, რომ ჩვენ გავაგრძელეთ საგამოძიებო კომისიის ვადა, რომელიც მუშაობს არჩევნებთან დაკავშირებულ საკითხებზე და გახსოვთ თქვენ, ოპოზიციამ იქ ისაუბრა, რომ ეს კომისია რაღატომ არის საჭირო, ხომ არსებობს 19 აპრილის შეთანხმება და მოდით წინ გავიხედოთო, 6 თვე თუ მეტი,ოპოზიციამ ეს ქვეყანა აჯანჯღარა იმით, რომ იყო არჩევნები გაყალბებული და ახლა როცა აქვს შესაძლებლობა, რომ საგამოძიებო კომისიის მეშვეობით, მტკიცებულებები წარმოადგინონ, ამაზე უარს ამბობენ, ეს აჩვენებს, რომ არანაირი არგუმენტი გაყალბებულ არჩევნებზე არ არსებობს. აქედან გამომდინარე, პირველ რიგში, მათ ბოდიში უნდა მოუხადონ თამარ ჟვანიას და შემდეგ თამარ ჟვანია გადაწყვეტს, უნდა მას წასვლა თუ არ უნდა. ბოდიში მოსახდელი აქვს ბევრს ამ ქვეყანაში თამარ ჟვანიას მიმართ, მათ შორის, ოპოზიციას, მათ შორის, „სამართლიან არჩევნებს“ და სხვებს, ვინც დააბრალა მას ისეთი რაღაცები, რომლებიც, საბოლოო ჯამში, ვერაფრით ვერ დაამტკიცეს და ბოდიშს თუ არ მოიხდიან, მინიმუმ ის გამბედაობა მაინც ჰქონდეთ, რომ მივიდნენ და ჰკითხონ, არჩევნების შემდეგ რა გადაიტანა ამ ადამიანმა, რა დონის შეტევა იყო მის მიმართ პიროვნულად და მინიმუმ ის მაინც მოიკითხონ, რას გრძნობდა ეს ადამიანი იმ დღეების განმავლობაში,“ - განაცხადა პაპუაშვილმა.