"იმედია, თამარ ჟვანიას გაგება ეყოფა, რომ აღარავის უნდა მისი ცესკო-ს თავმჯდომარეობა და წავა" - გიორგი ვაშაძე

იმედი მაქვს, ამ ადამიანს გაგება ეყოფა, რომ აღარავის აღარ უნდა მისი ცესკო-ს თავმჯდომარეობა და წავა, - ამის შესახებ „სტრატეგია აღმაშენებლის“ ლიდერმა გიორგი ვაშაძემ ცესკო-ს თავმჯდომარე თამარ ჟვანიასთან დაკავშირებით განაცხადა.

„ლელოში“ ოპოზიციურ პოლიტიკურ პარტიებთან შეხვედრის შემდეგ ვაშაძემ იმედი გამოთქვა, რომ თამარ ჟვანია პოსტს საკუთარი სურვილით დატოვებს.

"საკონსტიტუციო სასამართლოს გადაწყვეტილებიდან გამომდინარე, რომც ჩაგვეწერა, რომ ცესკო-ს თავმჯდომარე უნდა გადადგეს, ვერ გადავაყენებდით იმიტომ, რომ საზოგადოებრივი მაუწყებლის ბორდთან დაკავშირებით იყო ასეთი პრეცედენტი, რომ ვადაზე ადრე შეუწყვიტა უფლებამოსილება, მაშინ ჩვენ ოპოზიციაში ვიყავით, ვიჩივლეთ საკონსტიტუციო სასამართლოში, მან დააკმაყოფილა ეს სარჩელი, რომ ვადა სანამ არ არის გასული, მისი პირადი ნების გარეშე ვერ გაუშვებ ამ ადამიანს სამსახურიდან, იგივე არის თამარ ჟვანიას შემთხვევაში.

იმედი მაქვს, ამ ადამიანს გაგება ეყოფა, რომ აღარავის აღარ უნდა მისი ცესკო-ს თავმჯდომარეობა, მარტივად რომ ვთქვათ და წავა, თუ არ წავა, ცესკო-ში იქნება 8 ოპოზიციური წევრი, ასევე ორი ახალი პროფესიული წევრი უნდა იყოს 2/3-ის უმრავლესობით არჩეული და ამით ძალთა ბალანსი მთლიანად შეიცვლება", - განაცხადა ვაშაძემ.

გიორგი ვაშაძის თქმით, "ხვალ გვექნება გასვლითი შეხვედრა, სადაც იქნებიან "ქართული ოცნების" წარმომადგენლებიც - ჩვენ ამ შეხვედრაზე მივალთ კონკრეტული ტექნოლოგიური ინოვაციებით საარჩევნო რეფორმის კუთხით".

მისივე თქმით, საარჩევნო რეფორმაში ძალიან ბევრი ცვლილებებია გასატარებელი.

"ახლა ჩვენ ვიკრიბებით, რადგან ძალიან ფართო სპექტრი ცვლილებების არის გასატარებელი საარჩევნო რეფორმის კუთხით. ხვალ გვექნება გასვლითი შეხვედრა, სადაც იქნებიან "ქართული ოცნების" წარმომადგენლებიც. ჩვენ ამ შეხვედრაზე მივალთ კონკრეტული ტექნოლოგიური ინოვაციებით, რომლებიც შემიძლია დავარქვა, რომ არის ქართული ინოვაციები, რომელიც ერთის მხრივ იქნება იაფი, რომ დაინერგოს არჩევნების გაყალბების პრევენციისთვის, მეორეს მხრივ იქნება მარტივი, რომ დაინერგოს. მესამე მხრივ ოქტომბრამდე ამის დანერგვა შესაძლებელი იქნება, რომ ნაკლები ადამიანური ჩარევა იყოს არჩევნების, ხმის მიცემის, დათვლის და ყველა ამ პროცესში. მიხარია, რომ გადავერთეთ ისევ ინოვაციებზე და ტექნოლოგიებზე", - განაცხადა ვაშაძემ.