22
ივლისიდღის ზოგადი ასტროლოგიური პროგნოზი
პოლონელ მეცნიერთა გუნდმა ორსული ეგვიპტელი ქალის მუმია აღმოაჩინა. აღსანიშნავია, რომ მსგავსი შემთხვევა პირველია. აღმოჩენის შესახებ ინფორმაცია და მეცნიერული კვლევის დასკვნა ჟურნალში - Archaeological Science გამოქვეყნდა. მუმია ვარშავის არტეფაქტების მუზეუმში ინახებოდა და სხვა არტეფაქტებთან ერთად, მისი შესწავლა 2015 წლიდან მიმდინარეობდა.
თავდაპირველად მიიჩნეოდა, რომ საქმე ეხებოდა ეგვიპტელ ქურუმს, თუმცა შესაბამისი სკანირების შედეგად გაირკვა, რომ ის არა ქურუმი, არამედ ორსული ქალის მუმია იყო. აღნიშნულ საკითხზე მომუშავე ექსპერტები თვლიან, რომ მუმია სავარაუდოდ, წარჩინებული სოციალური წრის ქალს ეკუთვნის, რომელიც 20-დან 30 წლამდე ასაკში გარდაიცვალა, ჩვენს წელთაღიცხვამდე პირველ საუკუნეში.
"ეს არის პირველი შემთხვევა, როდესაც აღმოჩენილია მუმიფიცირებული ორსული ქალი“, - აღნიშნულია მეცნიერთა კვლევის დასკვნაში.
სკანირების შედეგად ასევე დადგინდა, რომ იმ მომენტში, როდესაც ქალი გარდაიცვალა, ნაყოფი, დაახლოებით, 26 კვირის უნდა ყოფილიყო. ქალის გარდაცვალების მიზეზი ცნობილი არ არის, ასევე უცნობია, თუ რატომ დატოვეს ნაყოფი მუმიფიცირებული ქალის სხეულში.
- იდუმალი ლედი
მკვლევარებმა მუმიას ვარშავის ეროვნული მუზეუმის იდუმალი ლედი უწოდეს მის შესახებ ამ ეტაპისთვის არსებული პასუხგაუცემელი კითხვების გამო. ცნობილია, რომ მუმიფიცირებული ნეშტები ვარშავის უნივერსიტეტს 1826 წელს გადაეცა. ამტკიცებენ, რომ ის ეგვიპტური სამარხების ძარცვის შედეგად, დილერების საქმიანობის გამო აღმოჩნდა ვარშავაში.
მკვლევართა თქმით, სარკოფაგზე არსებულმა წარწერამ მეოცე საუკუნის ექსპერტებს აფიქრებინა, რომ საქმე ეხებოდა ქურუმს, სახელად - ჰორ ჯეჰუთის.
მათივე მოსაზრების თანახმად, შესაძლოა, მეცხრამეტე საუკუნეში, როდესაც სამარხების ძარცვა გახშირებული მოვლენა იყო, მუმია სხვა გარდაცვლილის სარკოფაგში მოათავსეს.
წყარო:BBC.com
