გოგაშვილი ამბობს, რომ სააკაშვილმა და მერაბიშვილმა 18-კაციანი ტერორისტული დაჯგუფება შექმნეს - "დამირეკონ პროკურატურიდან და საქმის ნომერს ვეტყვი"

"კავკასიის უსაფრთხოების პოლიტიკის ცენტრის" დამფუძნებელი, სუს-ის უფროსის ყოფილი მოადგილე სოსო გოგაშვილი ამბობს, რომ საქართველოს ექსპრეზიდენტმა მიხეილ სააკაშვილმა და ყოფილმა პრემიერმა ვანო მერაბიშვილმა 18-კაციანი ტერორისტული დაჯგუფება შექმნეს.

ამის შესახებ მან "ტვ პირველის" ეთერში განაცხადა.

მისი ინფორმაციით, ტერორისტული ორგანიზაციის შექმნის საქმე პროკურატურაში დევს.

"წინა ხელისუფლების დროს, მაშინდელი პრემიერისა და პრეზიდენტის უშუალო მითითებით შეიქმნა ტერორისტული ორგანიზაცია. ეს ორგანიზაცია შედგებოდა 18 ადამიანისგან, რომლის ხელმძღვანელი იყო ახმეტ ჩატაევი.

ტერორისტული ორგანიზაციის შექმნის საქმე არსებობს, დევს პროკურატურაში, გამომძიებლებმა მამაო ჩვენოსავით იციან ეს საქმე. ან დახურონ ეს საქმე ან პასუხისგებაში მივცეთ ეს ადამიანები. საქმე ფატობრივად დასრულებულია და სააკაშვილი და მერაბიშვილი პიჯაკებზე კი არა, ტერორიზმის ბრალდებით უნდა იყვნენ დაკავებულები... დამირეკონ პროკურატურიდან და საქმის ნომერს ვეტყვი, მტვერია გადასაწმენდი" - აღნიშნა გოგაშვილმა.

მან ასევე ისაუბრა დღევანდელ მაღალ თანამდებობაზე მყოფ პირებზე, რომლებიც მისი ინფორმაციით, დღემდე "ნაციონალებს" მისტირიან". ამით უპასუხა ჟურნალისტის კითხვას, ხომ არ არიან "ქართულ ოცნებაში" ისეთები, ვინც საქმის დასრულებას ხელს უშლიან.

"ეჭვი გეპარებათ იმაში, რომ დღეს უწყებებში ვანო მერაბიშვილის მიმდევრები არიან? დღეს რომ გაჰკივიან "ოცნებას" და 41 წარწერიანი მასიურის ქვეშ წითელი მაისური არ აცვიათ? ძალიან ბევრი მოქმედი მაღალი თანამდებობის პირია, რომლებიც იმ დროს ("ნაციონალური მოძრაობის" დროს) მისტირიან, მიუხედავად იმისა, რომ "ქართულმა ოცნებამ" დააწინაურა ისინი, წინა ხელისუფლების ლიდერების ერთგულებად რჩებიან, მათ შორის ვანო მერაბიშვილის" - აღნიშნა გოგაშვილმა.