ხმაური რიონის ხეობაში, ჰესის მოწინააღმდეგეთა მოთხოვნა და დამატებითი საპოლიციო ძალები - რას აცხადებენ შსს - ში?
რიონის ხეობაში, სადაც "ნამახვანჰესი" მოწინააღმდეგეები მორიგ აქციას მართავენ, პოლიციასა და აქტივისტებს შორის შეხლა-შემოხლა მოხდა. აქციის მონაწილეებმა რიონის ხეობისკენ მიმავალი გზის გახსნა მოითხოვეს, რომელიც საპოლიციო ძალების მიერაა გადაკეტილი. აქტივისტებმა პოლიციის კორდონის გარღვევა სცადეს მას მერე, რაც ის ადგილი, სადაც პროტესტანტების კარვები იყო განლაგებული, ტრაქტორით გადახნეს.
რამდენიმეწუთიანი დაძაბულობის შემდეგ, საპროტესტო მოძრაობის ერთ-ერთმა ლიდერმა ვარლამ გოლეთიანმა აქტივისტებს უკან დახევისკენ მოუწოდა, რის შემდეგაც დაპირისპირება რიონის ხეობაში განიმუხტა.
ამის შემდე ვარლამ გოლეთიანმა განაცხადა, რომ მოქალაქეები საპროტესტო მსვლელობით გუმათიდან ქუთაისისკენ წავლენ.
"აქედან დავიძრათ ქუთაისის მიმართულებით და "ენკას“ მოვუწოდოთ, რომ ნუ გვაპირისპირებენ ჩვენივე მოქალაქეებთან. წავიდნენ, დატოვონ ხეობა", - განაცხადა მან.
შემქნილ ვითარებაზე განცხადება გაავრცელა შსს-მაც.
"არ დავუშვებთ რიონის ხეობაში პროტესტი ძალადობრივი სცენარით განვითარდეს - მოვუწოდებთ მოქალაქეებს, არ გასცდნენ კანონით დასაშვებ ფარგლებს და დაემორჩილონ პოლიციის მოთხოვნებს შინაგან საქმეთა სამინისტროს სხვადასხვა დანაყოფის თანამშრომლები, უსაფრთხოებისა და მართლწესრიგის დაცვის მიზნით, რიონის ხეობაში არიან მობილიზებულები", - აცხადებენ უწყებაში.
როგორც "ინტერპრესნიუსს“ შს სამინისტროდან აცნობეს, უსაფრთხოების მიზნით, რიონის ხეობაში მოქალაქეთა გადაადგილება გარკვეულ მიმართულებებზე დროებით პოლიციის შესახებ საქართველოს კანონის 25-ე და 26-ე მუხლების შესაბამისად იზღუდება.
"შინაგან საქმეთა სამინისტრო არ დაუშვებს რიონის ხეობაში პროტესტი ძალადობრივი სცენარით განვითარდეს და მკაცრ რეაგირებას მოახდენს სამართალდარღვევის ნებისმიერ ფაქტზე", - ვკითხულობთ ინფორმაციაში.
"ელიტ ელექტრონიქსი“ "ჰოთსეილის“ პარტნიორი გახდა
პაატა იმნაძის განცხადებით, ერთ-ერთ რაიონში ქელეხის სუფრის შემდეგ, კიდევ ერთი "კლასტერი“ გაჩნდა
