გიგი უგულავა "გირჩს" "ქლიავების პარტიას" უწოდებს

"ევროპული საქართველოს" ერთ-ერთი ლიდერის, გიგი უგულავას განცხადებით, ჩაშლილ მოლაპარაკებაზე, ისევე როგორც პირველი ნაბიჯის გადადგმაზე მთავარი პასუხისმგებელი "ქართული ოცნებაა“.

როგორც უგულავამ ჟურნალისტებს „ლეიბორისტული პარტიის“ ოფისში ოპოზიციის წევრებს შორის შეხვედრამდე განუცხადა, მოწოდებების მიუხედავად "ქართული ოცნების“ მხრიდან „ყრუ კედელია აღმართული“.

რაც შეეხება თავად შეხვედრას, გიგი უგულავას ინფორმაციით, განიხილავენ 15 მაისის აქციისთვის მოსამზადებელ სამუშაოებს და პარალელურად იმსჯელებენ, აქვს თუ არა ხელისუფლებასთან მოლაპარაკებას პერსპექტივა.

"ღმერთმა ნუ ქნას, საქართველოში იყოს სიტუაცია, როდესაც პარტნიორები აღარ იტყვიან - მოვუწოდებთ ორივე მხარეს. თუ მეორე მხარე არ იქნება, ჩვენ უკვე საქართველოში კი არა, ბელორუსში ვიქნებით. ასევე, ბრიყვულად გამოიყურება სახელისუფლებო პროპაგანდა, რომელიც ჩაბღაუჭებულია ამ ორივე მხარეზე და უნდა, რამენაირად ხელისუფლების პასუხისმგებლობა სულ მცირე გაუტოლოს ოპოზიციის პასუხისმგებლობას. დემოკრატია მუშაობს ასე - უმრავლესობის პასუხისმგებლობა ცა და დედამიწაა უმცირესობის პასუხისმგებლობასთან შედარებით. ამიტომ, მთავარი პასუხისმგებელი ჩაშლილ მოლაპარაკებაზე, ისევე როგორც მთავარი პასუხისმგებელი პირველი ნაბიჯის გადადგმაზე, „ქართულ ოცნებაა“, როგორც ხელისუფლება. თუ სხვა იქნებოდა ხელისუფლებაში, სხვას მოუწოდებდნენ. დღეს, სამწუხაროდ, „ქართული ოცნებაა“ ხელისუფლებაში და ამიტომ, მათ მოუწოდებენ. მაგრამ, სამწუხაროდ, ყრუ კედელია აღმართული მათი მხრიდან“,- განაცხადა უგულავამ.

რაც შეეხება ალეკო ელისაშვილის განცხადებას, რომ მოლაპარაკების ჩაშლაში ოპოზიციაც მონაწილეობდა, უგულავა ამბობს, რომ ელისაშვილი ხელისუფლებას ახმოვანებს.

"ელისაშვილი კობახიძეზე უარესია. ის ყველაზე მეტად ახმოვანებს ხელისუფლებას. ეგეც და ადრე „გირჩი“ რომ იყო და ახლა ქლიავების პარტია რომ ჰქვია“, - განაცხადა უგულავამ.