"იტირა, ღმერთო რატომო! ტკივილი თვალებიდამ წამსკდა" - რას წერს მეუღლე პოეტ ზურაბ რთველიაშვილზე, რომელსაც სიმსივნე დაუდგინდა

რამდენიმე დღის წინ პოეტ ზურაბ რთველიაშვილის მდგომარეობა დამძიმდა. თავდაპირველად გავრცელდა ინფორმაცია, რომ ამის მიზეზი თრომბი იყო, თუმცა როგორც გაირკვა ახალგაზრდა პოეტს სიმსივნე დაუდგინდა. ინფორმაცია სოციალურ ქსელში მისმა მეუღლემ, ნინო ამირეჯიბმა გაავრცელა.

"დღეს ახალი ეტაპი გადავიარეთ! ზურამ გაიგო რომ მძიმე ონკოლოგიურ სენს უნდა ებრძოლოს! ყველაზე მეტად ეს დღეები ამ დღის მეშინოდა! რა კითხვებს დასვამდა, რა რეაქცია ექნებოდა... როგორ უნდა გაგვესწორა თვალი რეალობისთვის! იტირა, ღმერთო რატომო! ახლა უკვე მეც ვეღარ შევიკავე თავი... 4 დღის დაგროვილი სევდა და ტკივილი თვალებიდამ წამსკდა.

ხელები ჩავჭიდეთ და ერთად ვიტირეთ, დავიცალეთ ამ დღეებში დაგროვილი უარყოფითი ენერგიისგან. მერე თვალებზე ცრემლი მომწმინდა და რამდენი დარჩაო!!! მე ვუპასუხე - ეს შენზეა დამოკიდებული თქო! ჰოდა, ვიბრძოლებო!!! შენ იყავი მაგრადო... ერთად ვიბრძოლებთ და გავიმარჯვებთ!!! ხალხო, თქვენ არ იცით რამხელა ძალა ხართ ჩვენთვის!" - დაწერა ნინო ამირეჯიბმა.

როგორც ირკვევა ზურაბ რთველიაშვილის მკურნალობისთვის თანხებია საჭირო. ის მეუღლესთან ერთად რამდენიმე დღეში სტოკჰოლმში გაემგზავრება, სადაც დამატებითი კვლევები ჩაუტარდება.

მძიმე ამბის გაგების შემდეგ ნინო ამირეჯიბი დღეს "ფეისბუქზე" ემოციურ პოსტს აქვეყნებს:

"დღეს დილით როცა ლიმბახში ზურას სისხლის ჩასაბარებლად კლინიკაში მივდიოდი, ტაქსში ჩვენი საყვარელი სიმღერა ჩაირთო. უსაყვარლესმა ადამიანმა და მეგობარმა ეკა ტოგონიძემ მომწერა ამ დროს - მაშინვე მივწერე, რადიოში მე და ზურას საყვარელი სიმღერა ისმის თქო! ახლა მთელი სამყარო დაგელაპარაკება სხვადასხვა გზით, ტაქსიში ჩართული სიმღერით თუ ათასი სხვა ნიშნითო, ეკამ. უკვე ერთი კვირაა ახალი ცხოვრება დავიწყეთ. წინ დიდი და გრძელი გზაა, სადაც ნელ-ნელა მიწევს სწავლა უამრავი რამის...

გარდა უმძიმესი ნაცნობი სიტყვისა "ონკოლოგია” სხვა უამრავი რამ სრულიად გაუგებარი და რთულია! ჯერ ერთი რამ ვიცი მხოლოდ! ამ სამყაროში ღმერთმა უდიდესი მისია მარგუნა, წილად მხვდა პატივი, ყველაზე საოცარ ადამიანს ვედგე გვერდით ამ ყველაზე რთულ გზაზე! მადლობელი ვარ რომ მე ამირჩია ამ ცხოვრებაში მეგზურად და ერთ დროს დამარწმუნა, რომ ჩვენს სიყვარულს მთების გადადგმა შეუძლია" - წერს ამირეჯიბი.

ზურაბ რთველიაშვილის დახმარების მსურველებს თანხის ჩარიცხვა შეუძლიათ ანგარიშზე:

GE46BG0000000161695587 - საქართველოს ბანკი

GE18TB7722245161600002 - თიბისი ბანკი, ლარი

GE77TB7722236110100006 - თიბისი ბანკი $

მიმღები: ნინო ამირეჯიბი