დეპუტაცია პარლამენტში და მხარდამჭერები "ოცნების" შიგნით - ვინ შეიძლება ვიხილოთ გიორგი გახარიას მომავალ პოლიტიკურ გუნდში?

• ფოტოლკოლაჟი: გიორგი გახარია, მარიამ ქვრივიშვილი, მიხეილ დაუშვილი, გიორგი ხოჯევანიშვილი, ანა ბუჩუკური, ბექა ლილუაშვილი

ექსპრემიერმა გიორგი გახარიამ რამდენიმე დღის წინ განაცხადა, რომ არსად წასვლას არ აპირებს, მათ შორის არც პოლიტიკიდან, რაც ნიშნავს, რომ ის სადაცაა საკუთარი პოლიტიკური გუნდით წარსდგება საზოგადოების წინაშე. ექსპერტთა ნაწილის თქმით, თუ გახარია მართლაც შექმნის პოლიტიკურ ძალას, აქვს შანსი ორი დომინანტი პოლიტიკური ძალის ალტერნატიულ ცენტრად ჩამოყალიბდეს.

არსებობს ვარაუდი, რომ გახარია შეიძლება დამოუკიდებლად არც მოქმდებდეს და ის ბიძინა ივანიშვილმა მაშველ რგოლად "გადმოაგდო“ პოლიტიკურ ველზე, თუმცა ეს ჯერჯერობით მხოლოდ ვარაუდია.

მოკლედ, მალე ბევრი რამ გაირკვევა, მათ შორის ისიც, თუ ვინ იქნებიან გახარიას პოლიტიკური თანამებრძოლები.

მას შემდეგ, რაც ის გადადგა, თანამდებობა მისმა რამდენიმე თანამოაზრემაც დატოვა. მათ შორის პირველი იყო მთავრობის ადმინისტრაციის ყოფილი უფროსი კახა ქემოკლიძე, რომელიც პრემიერის გუნდის წევრად მოიაზრებოდა. არ გამორიცხავენ, ახალ პოლიტიკურ ორგანიზაციაში ქემოკლიძესთან ერთად, ყოფილი პრემიერის გვერდით აღმოჩნდეს შს მინისტრის ყოფილი მოადგილე და მთავრობის ადმინისტრაციის ყოფილი უფროსი ნათია მეზვრიშვილი, რომელმაც პოსტი ჯერ კიდევ ნოემბერში დატოვა. გახარიას გუნდში მოიაზრება ასევე კახა საბანაძე, რომელიც შს მინისტრის მოადგილის პოსტს 3 წელი იკავებდა და თანამდებობიდან ახლახან გადადგა.

მიუხედავად იმისა, რომ ინფრასტრუქტურის მინისტრის პოსტის დატოვება მაია ცქიტიშვილმა პოლიტიკური პროცესიდან გარიდების და ოჯახთან დაბრუნების სურვილით ახსნა, არსებობს ვარაუდი, რომ გახარიასთან ერთად, ისიც კვლავ შემობრუნდეს პოლიტიკურ ასპარეზზე.

დიდი ალაბათობით, ექსპრემიერის გვერდით იქნებიან გორელი ძმები: ალექსანდრე და გიორგი ხოჯევანიშვილები. პირველი, მოგეხსენებათ, სუს-ის უფროსის მოადგილის თანამდებობას იკავებდა, რომელიც გახარიას მთავრობიდან წასვლის შემდეგ დატოვა, მეორე ძმა კი ჯერჯერობით "ქართული ოცნების“ პარლამენტარია.

მასთან ერთად გახარიას კვოტით პარლამენტში კიდევ რამდენიმე დეპუტატია, მათ შორის:

ანა ბუჩუკური, რომელიც მთავრობის ადმინისტრაციაში, ადამიანის უფლებათა სამდივნოს უფროსის თანამდებობას იკავებდა. ანამ "ტვ პირველთან“ საუბარში არ უარყო, რომ გახარიას მეგობარია და მისი გადადგომიდან მოყოლებული არაერთხელ შეხვდა; ტურიზმის ეროვნული ადმინისტრაციის ყოფილი ხელმძღვანელი მარიამ ქვრივიშვილი; ყოფილი ბიზნესომბუდსმენი მიხეილ დაუშვილი. შინაგან საქმეთა სამინისტროს, საინფორმაციო-ანალიტიკური დეპარტამენტის დირექტორის ექსმოადგილე ბექა ლილუაშვილი; სამეგრელო-ზემო სვანეთის მხარეში ყოფილი გუბერნატორი ალექსანდრე მოწერილია. დიდი ალბათობით, ეს დეპუტატები იქნებიან გახარიას მომავალი პარტიის დასაყრდენი პარლამენტში. ამბობენ, რომ გახარიას გუნდში ასევე შეიძლება აღმოჩნდეს ზუგდიდის მაჟორიტარი დეპუტატი ირაკლი ჩიქოვანი. ასევე არ გამორიცხავენ, რომ გახარიასთან ერთად გამოჩნდეს პარლამენეტის ყოფილი ვიცე-სპიკერი თამარ ჩუგოშვილი.

უკვე ცხადად გამოჩნდა, რომ მის გუნდშია გაბრიელ წულაია, რომელიც 2013 წლიდან მოყოლებული სხვადასხვა თანამდებობაზე მუშაობდა, მათ შორის, იყო შინაგან საქმეთა სამინისტროს სტარტეგიული კომუნიკაციების დეპარტამენტის უფროსი, მთავრობის ადმინისტრაციაში სტრატეგიული კომუნიკაციების დეპარტამენტის უფროსი და ა.შ. მან გიორგი გახარიას გადადგომის შემდეგ საქართველოს მთავრობაში სამსახური დატოვა.

როგორც გაირკვა სწორედ მისი შექმნილია "ფეისბუქგვერდი“, რომელიც წლების განმავლობაში "ქართული ოცნების“ აქტიური მხარდამჭერი გახლდათ და რომლის სახელიც Bidzina Ivanishvili & Media გახარიას პირველი პოლიტიკურ განცხადებისთანავე Gakharia & Media-დ გადააკეთეს.

"სამართლიანი არჩევნებისა და დემოკრატიის საერთაშორისო საზოგადოების“ (ISFED) სოციალური მედიის მონიტორინგის პროგრამის ხელმძღვანელი, ნინო რიჟამაძე:

"ჩვენ ამ გვერდს სოციალური მედიის მონიტორინგის დაწყების პერიოდიდან ვაკვირდებით. ის 2011 წლის 9 ოქტომბერსაა შექმნილი და ამ პერიოდიდან ითავსებდა "ქართული ოცნების“, მმართველი პარტიის პიარ-საქმიანობას, მაგრამ არა - ოფიციალურად, ეს "ქართული ოცნების“ ოფიციალური გვერდი არასდროს ყოფილა.

გვერდი გაბრიელ წულაიას მიერაა შექმნილი. ახლა საინტერესო ისაა, რომ ზოგადად, ამ გვერდს საკმაოდ მაღალი რაოდენობის - 97 000-ზე მეტი გამომწერი ჰყავს, შექმნის დღიდან მასზე გამოქვეყნებული პოსტების ინტერაქცია საკმაოდ მაღალია და ორ მილიონს აჭარბებს. ის, რომ გაბრიელ წულაიას ირიბი კავშირი აქვს ამ გვერდთან, დასტურდება ასევე იმით, რომ გვერდის აღწერილობაში მითითებულია კომპანია Holon.ge, რომელიც ირაკლი წულაიას ეკუთვნის. ირაკლი წულაია "TV იმედზე“ მუშაობს, სადაც ბიზნესის თემატიკასთან დაკავშირებით საკუთარი გადაცემა აქვს. იკვეთება გაბრიელ წულაიასა და ირაკლი წულაიას კავშირები, როგორც ნათესაური, ასევე - ბიზნესის კუთხითაც“.

გახარიას პოლიტიკაში გააქტიურების სამზადისი რომ ინტენსიურია, ამაზე მეტყველებს მედიამხარდაჭერაზე დაწყებული საკმაოდ მასშტაბური ზრუნვა და ის აქტიური კონსულტაციები, რაც წავკისში მდებარე გახრიას ვილაში ყოველდღიურად მიმდინარეობს.

ambebi.ge-ს წყაროს ინფორმაციით, "ქართულ ოცნებაში" გახარიას მომავალი გააქტიურება საკმაოდ აშფოთებთ, უკვე დაიწყეს ზრუნვა პარლამენტში იმისთვის, რომ იმაზე მეტი დეპუტატი არ აღმოჩნდეს გახარიას მხარდამჭერთა შორის, ვიდრე ეს მმართველ პარტიაში სიმშვიდისთვის სჭირდებათ...

ავტორები: ნანა ფიცხელაური, ეკა აბაშიძე