"თუ მშვიდად ძილი უნდათ, მყრალი სუნის გამოწვევისგან თავი შეიკავონ" - კიმ ჩენ ინის და აშშ-ს აფრთხილებს და რჩევას აძლევს

ჩრდილოეთ კორეის ლიდერის, კიმ ჩენ ინის და, კიმ იო ჩენი აშშ-ის ახალ ადმინისტრაციას აფრთხილებს, პირველი ნაბიჯის გადადგმა პრობლემების შექმნით არ დაიწყოს.

"რჩევა შეერთებული შტატების ახალ ადმინისტრაციას, რომელიც ოკეანის გადაღმიდან ცდილობს, ჩვენს მიწაზე დენთის სუნი გაავრცელოს. თუ მომავალი ოთხი წლის განმავლობაში მშვიდად ძილი სურს, უმჯობესია, თავი შეიკავოს იმისგან, რომ მისი პირველი ნაბიჯი მყრალი სუნის გამოწვევა იყოს,“- განაცხადა კიმ იო ჩენმა.

აღსანიშნავია, რომ კიმ იო ჩენმა ეს განცხადება აშშ-ის სახელმწიფო მდივან ანტონი ბლინკენისა და თავდაცვის მინისტრ ლოიდ ოსტინის სეულში დაგეგმილ ვიზიტამდე ერთი დღით ადრე გააკეთა. ამასთან ყოველივე წინ უძღოდა აშშ-ის საპრეზიდენტო ადმინისტრაციაში განცხადებები იმის შესახებ, რომ ჩრდილოეთ კორეა შეერთხებულ შტატებთან კონტაქტზე ვერ გადის და რომ მცდელობების მიუხედავად ოფიციალურ ფხენიანს ვერ უკავშირდებიან.

ჯო ბაიდენის ადმინისტრაციაში აცხადებენ, რომ ისინი ჩრდილოეთ კორეასთან კავშირზე გასვლას თებერვლიდან ცდილობენ, თუმცა მცდელობის მიუხედავად, ამას ვერ ახერხებენ და ფხენიანიდან არანაირი ოფიციალური პასუხი არ არის.

როგორც BBC წერს, ვაშინგტონმა ჩრდილოეთ კორეის ლიდერთან, კიმ ჩენ ინთან დასაკავშირებლად სხვადასხვა გზები სცადა, მათ შორის, გაეროში ჩრდილოეთ კორეის წარმომადგენლების მეშვეობითაც.

მთავარი საკითხი, რომელიც ორ ქვეყანას შორის შეუთანხმებლობას იწვევს, ჩრდილოეთ კორეის ბირთვული შეიარაღებაა. ბაიდენის წინამორბედი სამჯერ შეხვდა კიმ ჩენ ინს, თუმცა იმ შეხვედრებს მნიშვნელოვანი შედეგი არ მოჰყოლია. ტრამპის ადმინისტრაციამ ვერ შეძლო დაერწმუნებინა ჩრდილოეთ კორეა, უარი ეთქვა ბირთვულ იარაღზე, რაც აშშ-სა და სხვა დასავლური ქვეყნების მთავარი მოთხოვნაა.

აღსანიშნავია, რომ გაპრეზიდენტებამდე ჯო ბაიდენმა კიმ ჩენ ინს თაღლითი უწოდა და ხაზი გაუსვა ჩრდილოეთ კორეის ბირთვული განიარაღების აუცილებლობას. ბაიდენის განცხადების პარალელურად კი, კიმ ჩენ ინმა თავისი ქვეყნის სამხედრო შესაძლებლობების ხაზგასმა გააგრძელა და სხვადასხვა ახალი სამხედრო შეიარაღება გამოსცადა და ამავე დროს, მან მოუწოდა შეერთებულ შტატებს, უარი ეთქვა "მტრულ პოლიტიკაზე."

ასევე დაგაინტერესებთ: ქალი, რომელიც ჩრდილოეთ კორეას კულისებიდან მართავს - დიქტატორი კიმ ჩენ ინი დის გარეშე გადაწყვეტილებებს არ იღებს