"საქართველო მნიშვნელოვანია ევროკავშირისთვის, ამიტომაც ვდებთ საკითხში ამხელა ინტერესს, იმედია, ხვალ შემეძლება გამოვაცხადო, რომ რაღაც გადაწყვეტილებამდე მივედით" - კრისტიან დანიელსონი

ძალიან დიდი იმედი მაქვს, ხვალ შემეძლება გამოვაცხადო, რომ რაღაც გადაწყვეტილებამდე მივედით, - ამის შესახებ ევროპული საბჭოს პრეზიდენტის შარლ მიშელის პირადმა წარმომადგენელმა კრისტიან დანიელსონმა განაცხადა.

მისივე თქმით, ეს პროცესი რთულია, მაგრამ ევროკავშირი მხარეებს შორის უფრო დაახლოებას ელოდება.

„ეს პროცესი რთულია და უფრო მეტი დრო სჭირდება და ჩვენ ველოდებით, რომ მხარეები უფრო დაახლოებას შეძლებენ. ამ საკითხზე მუშაობა ხვალაც გაგრძელდება. ძალიან მნიშვნელოვანია და ძალიან დიდი იმედი მაქვს, რომ ხვალ შემეძლება გამოვაცხადო, რომ რაღაც გადაწყვეტილებამდე მივედით.

მიზეზი რატომაც ბატონმა მიშელმა აქ გამომგზავნა არის ის, რომ მას სჯერა ამ ურთიერთობის. საქართველო მნიშვნელოვანია ევროკავშირისთვის და ესაა ის გზა, რომელზეც უნდა იყოს გათვალისწინებული საქართველოს და მისი მოსახლეობის ინტერესები. ამიტომაც ვდებთ ამ საკითხში ამხელა ინტერესს და ამიტომ არიან მხარეები ამ პროცესში ასე ჩართულები“, - განაცხადა დანიელსონმა.

როგორც მან აღნიშნა, იმედოვნებს, რომ ხვალ კიდევ იქნება პროგრესი.

"როცა კომპრომისებისკენ მიდიხარ, ამას დრო სჭირდება. ჩემი მოლოდინი ყოველთვის ეს იყო - ჩვენ ვმუშაობთ მანამ, ვიდრე მხარეები წინსვლის გზებს არ იპოვნიან. ვიმედოვნებ, რომ ჩვენ ხვალ კიდევ გვექნება პროგრესი. მხარეებს ვუთხარი, რომ მნიშვნელოვანია, ყველა დაფიქრდეს კომპრომისებზე, იმისთვის, რომ მათ იმ გზების პოვნა შეძლონ, რომლითაც არსებულ პრობლემებს ჯეროვნად მოაგვარებენ", - განაცხადა მან.

შეგახსენებთ, შარლ მიშელის პირადი წარმომადგენლის კრისტიან დანიელსონის ვიზიტი საქართველოში 12-14 მარტის პერიოდში იყო განსაზღვრული. დანიელსონმა მიიღო გადაწყვეტილება, რომ ვიზიტი კიდევ ერთი დღით გაახანგრძლივოს და 15 მარტსაც დარჩეს თბილისში. პოლიტიკური პარტიების წარმომადგენლებთან შეხვედრები ხვალაც გაგრძელდება.