"ადრეც იყო ასეთი შემთხვევა, როცა აიყვანეს საზღვრის დამრღვევი რუსები თუ ოსები, მაგრამ სამინისტროდან დარეკეს და გააშვებინეს“ - რა მოხდა ხურვალეთში?

7 მარტს ხურვალეთში, საოკუპაციო ხაზთან, სროლა იყო. ხურვალეთის მკვიდრი რამაზ ჩალაური მიწის საკუთარ ნაკვეთს ამუშავებდა, რა დროსაც რუსი ე.წ. მესაზღვრეები გადმოვიდნენ და მისი დაკავება უკანონოდ სცადეს, შემთხვევას მოჰყვა სროლაც. ამის შემდეგ ადგილზე ქართული პოლიცია გამოცხადდა. გავრცელებული ინფორმაციით, ქართველმა სამართალდამცვებმა რუს მესაზღვრეებს ჯერ იარაღი ჩამოართვეს, შემდეგ მომხდარის შესახებ ცხელ ხაზსა და ევროკავშირის სადამკვირვებლო მისიას აცნობეს, მათი გამოკითხვის შემდეგ კი ორივე პირი გაათავისუფლეს და ოკუპანტ მხარეს გადასცეს.

"მიწას ვხნავდი, შემოვიდნენ რუსები და გამომეკიდნენ, დავაგდე ტრაქტორი და გამოვიქეცი. ორი რუსი იყო. სოფლამდე მდიეს, ჩვენმა პოლიციელებმა მიშველეს, მერე რა მოხდა, არ ვიცი. იმ ადგილზე სხვა დროსაც ვმუშაობდი ხოლმე, ჩვენი ტერიტორიაა", - აცხადებს რამაზ ჩალაური.

ambebi.ge სოფელ ხურვალეთის მკვიდრს დაუკავშირდა, რომელმაც შემდეგი გვიამბო:

"ეს კაცი თავის ბაღში მუშაობდა, მიწას ხნავდა. გამოეკიდა ორი მესაზღვრე და სახლის კარამდე სდიეს, 600 მეტრზე გადმოვიდნენ და სდიეს. ჩალაური ჩვენმა პოლიციამ გადაარჩინა, თორემ ახლა იზოლატორში იქნებოდა. მოკლედ, რუსები და ოსები ნადირობენ ჩვენზე, შიშით მიწა ვერ დაგვიმუშავებია. ეს კაცი ცხინვალიდანაა, ლტოლვილია და ხურვალეთის ჩამოსახვევში ცხოვრობს. იმ ტერიტორიაზე სულ 139 ტოლვილის ოჯახი ცხოვრობს. მათი მინდვრებიც, როგორც ჩვენი, ესაზღვრება საოკუპაციო ხაზს, წინაგარას. ეს ადამიანი თავის მინდორს ხნავდა, გადმოვიდნენ და მისი დაჭერა სცადეს. ისე, სიმართლე გითხრათ, ჩვენს ტერიტორიაზე ძირითადად ოსები შემოდიან, ცხინვალელი "მესაზღვრეები“ ბედავენ და შემოდიან. ჩვენს მხარეში ვისაც კი იჭერენ, ამას ძირითადად ოსები აკეთებენ, ვითომ მესაზღვრეები - ხნულებს კვეთენ, გადმოძვრებიან 100 მეტრზე, გადაათრევენ ქართველებს, მერე მათ კონტროლირებად ტერიტორიაზე უღებენ სურათებს, თითქოს აი, საზღვარი გადმოკვეთა და აქ დავიჭირეთო. როცა რამაზ ჩალაურს გამოეკიდნენ, ჯერ ჰაერში ისროლეს, გაჩერდიო. ეს არ დაემორჩილა, ტრაქტორი მიაგდო და გამოიქცა. ჩვენი პოლიცია პიკაპებით პატრულირებს სოფელში, ახლოს ყოფილან და მათ ის ორი "მესაზღვრე“ ალყაში მოუქცევიათ, აიყვანეს კიდეც, მაგრამ ეტყობა, დაურეკეს, გაუშვითო და გაუშვეს. ადრეც იყო ასეთი შემთხვევა, როცა აიყვანეს საზღვრის დამრღვევი რუსები, თუ ოსები, მაგრამ სამინისტროდან დარეკეს და გააშვებინეს“, - გვიყვება ხურვალეთის მკვიდრი.

მომხდარის თაობაზე განცხადევა სუს-შიც გაკეთდა.

მათი ინფორმაციით, ცენტრალურ ხელისუფლებას საოკუპაციო რეჟიმის წარმომადგენლები არ დაუკავებია.

"7 მარტს საოკუპაციო ხაზს გასწვრივ, სოფ. ხურვალეთის მიმდებარედ პოლიციამ აღკვეთა საქართველოს მოქალაქის უკანონოდ დაკავების მცდელობა.

უკანონო დაკავების აღკვეთის შემდეგ, საქართველოს პოლიციამ შეაჩერა საოკუპაციო რეჟიმის წარმომადგენლები.

არსებული პრაქტიკის მიხედვით, ცხელი ხაზის დახმარებით და ევროკავშირის სადამკვირვებლო მისიის შუამავლობით განახორციელა კომუნიკაცია საოკუპაციო რეჟიმის წარმომადგენლებთან და ვითარება განიმუხტა“, - ნათქვამია ინფორმაციაში.