"არ შეგვიძლია ჩუმად ვიყოთ, როდესაც ტერორიზმი ბოროტად იყენებს რელიგიას" - ერაყში რომის პაპის ისტორიული ვიზიტის დეტალები

რომის პაპი ფრანცისკე ერაყში ისტორიულ 4-დღიან ვიზიტს აგრძელებს. ერაყის ჩრდილოეთ ნაწილში პაპმა ის ადგილები მოინახულა, რომლებსაც ტერორისტული დაჯგუფება "ისლამური სახელმწიფო“ წლების განმავლობაში აკონტროლებდა. პაპმა ფრანცისკემ საომარი მოქმედებების დროს დაღუპულთა სულებისთვის ილოცა.

BBC-ის ინფორმაციით, ის ასევე გეგმავს მოინახულოს ერაყის ყველაზე დიდი ქრისტიანული ტაძარი, რომელიც რადიკალურმა დაჯგუფებამ თითქმის მთლიანად გაანადგურა. იქამდე კი პაპი ბაღდადში ერაყის პრემიერ-მინისტრ მუსტაფა ალ-ქადიმსა და ერაყელი შიიტების უმაღლეს სასულიერო პირს, აიათოლა ალი ალ სისტანს შეხვდა.

რომის პაპის განცხადებით, ტერორიზმის, ომისა და ძალადობის შავმა ღრუბლებმა მოიცვა ერაყი, ტანჯვა მიადგა მის რელიგიურ და ეთნიკურ უმცირესობებს, განსაკუთრებით კი იეზიდების საზოგადოებას. ერაყში ვიზიტის ფარგლებში, პაპი ესტუმრა უძველეს ადგილს, ურს, რომელიც წმინდა მამამთავრის, აბრაამის დაბადების ადგილად მიიჩნევა. პაპი აქვე დაესწრო სხვადასხვა რელიგიების წარმომადგენელთა შეხვედრას. რომის პაპმა იეზიდებისა და სხვა რელიგიის მიმდევრებისთვის ილოცა.

"მტრობა, ექსტრემიზმი და ძალადობა არ იბადება რელიგიურ გულში: ისინი მუხთლობენ რელიგიას. ჩვენ, მორწმუნეებს, არ შეგვიძლია ჩუმად ვიყოთ, როდესაც ტერორიზმი ბოროტად იყენებს რელიგიას. ჩვენზეა დამოკიდებული ჩვენი საერთო სახლის დაცვა მტაცებლური მიზნებისგან. მოდით ვილოცოთ, რომ სინდისის თავისუფლება და რელიგიის თავისუფლება ყველგან აღიარებული და პატივცემული იყოს. ეს არის ფუნდამენტური უფლებები,” - განაცხადა რომის პაპმა.

რომის პაპი ერაყში ვიზიტის ფარგლებში სამხრეთით მდებარე ქალაქ ნაჯაფსაც ესტუმრა და ერაყელი შიიტების უმაღლეს სასულიერო პირს, აიათოლა ალი ალ სისტანს შეხვდა. ნაჯაფში შესვლისას კათოლიკური სამყაროს წინამძღოლს გზად ბავშვები შეეგებნენ, რომლებსაც ერაყისა და ვატიკანის დროშები ეკავათ.

როგორც "როიტერი“ წერს, ეს პირველი შემთხვევაა, როცა რომის პაპი შიიტების ასეთ უმაღლეს სასულიერო პირს შეხვდა. სააგენტოს ცნობით, აიათოლა ალი ალ სისტანი შიიტური ისლამის ერთ-ერთი ყველაზე მნიშვნელოვანი ფიგურაა, როგორც ერაყში, ისე მის ფარგლებს გარეთ. ის დიდ გავლენას ახდენს პოლიტიკაზე. 90 წლის სისტანი ახლა იშვიათად იღებს შეხვედრებში მონაწილეობას.

მან უარი თქვა ერაყის მოქმედ და ყოფილ პრემიერ-მინისტრებთან მოლაპარაკებებზე. პრეზიდენტის წყაროს ინფორმაციით, სისტანი პაპთან შეხვედრას დათანხმდა იმ პირობით, თუ მას ერაყის ოფიციალური პირები არ დაესწრეოდნენ. შეხვედრა მის სახლში შედგა.

რომის პაპმა ფრანცისკემ ერაყში ვიზიტისას ხელისუფლებასა და საზოგადოებას მოუწოდა, ქვეყანაში დასრულდეს სამხედრო ძალადობა, ძმათა მკვლელობა და რელიგიური დაპირისპირება.

"ბატონო პრეზიდენტო, მთავრობის პატივცემულო წარმომადგენლებო, ძვირფასო მეგობრებო, მე აქ მოვედი, როგორც მომნანიებელი, ვთხოვ შენდობას ზეცას და ჩემს და-ძმებს ამდენი განადგურებისა და სისასტიკის გამო. მე მოვედი, როგორც მშვიდობის მომლოცველი ქრისტეს სახელით. დაე შეწყდეს იარაღით შეტაკება, შეწყდეს მათი გავრცელება, შეწყდეს პარტიული ინტერესები, დაე ჩვეულებრივი ხალხის, მშრომელების, მშვიდობისმყოფელებისა და მშენებლების აზრი იყოს გათვალისწინებული. დაე დასრულდეს აქ ძალადობისა და ექსტრემიზმის აქტები, დაყოფა და შეუწყნარებლობა. ამ წლებში ერაყი ცდილობდა საფუძველი ჩაეყარა დემოკრატიული საზოგადოებისთვის.

ამისათვის აუცილებელია ყველა პოლიტიკური, სოციალური და რელიგიური ჯგუფის მონაწილეობის უზრუნველყოფა და ყველა მოქალაქის ძირითადი უფლებების უზრუნველყოფა. არავინ შეიძლება ჩაითვალოს მეორე კლასის მოქალაქედ“, - ამ სიტყვებით მიმართა რომის პაპმა ერაყის პრეზიდენტს, დიპლომატებსა და პოლიტიკოსებს პრეზიდენტის სასახლეში საუბრისას. მისი თქმით, გასული რამდენიმე ათწლეულის განმავლობაში, ერაყმა განიცადა ომების დამანგრეველი შედეგები, ტერორიზმის უბედურება და რელიგიურ შუღლთან დაკავშირებული კონფლიქტები, რომელიც ხშირად ფუნდამენტალიზმით არის განპირობებული. ფრანცისკეს თქმით, ამ ყველაფერმა მოიტანა სიკვდილი და განადგურება და ზიანი იმდენად ღრმაა, ჭრილობების განკურნებას წლები დასჭირდება. მან ხაზი გაუსვა, რომ განსაკუთრებული დევნის მსხვერპლნი გახდნენ იეზიდები.

მხოლოდ იმ შემთხვევაში, თუ ვისწავლით ჩვენი განსხვავებულობის მიღმა გავიხედოთ და ერთმანეთს შევხედოთ, როგორც ერთი ოჯახის წევრებს, ჩვენ შევძლებთ დავიწყოთ აღდგენის ეფექტური პროცესი და მომავალ თაობებს დავტოვოთ უკეთესი, უფრო სამართლიანი და ჰუმანური სამყარო“, - აღნიშნა რომის პაპმა.

BBC-ის ინფორმაციით, პაპის დასაცავად ქვეყანაში ერაყის უსაფრთხოების ძალების 10 000 წევრია განლაგებული.