ზურა დოიჯაშვილი ტაძრიდან მის მიერ შესრულებული სიმღერით, "მელიქიშვილის გამზირის" ფონზე გამოასვენეს

მომღერალი ზურაბ დოიჯაშვილი ანჩისხატის ტაძრიდან გამოასვენეს. მომღერალი ტაძრიდან მისი ცნობილი სიმღერის, „მელიქიშვილის გამზირის" ფონზე გამოასვენეს.

ანჩისხატის ტაძარში, სამოქალაქო პანაშვიდზე იმყოფებოდნენ, მომღერლის მეგობრები და კულტურის სფეროს წარმომადგენლები.

სამოქალაქო პანაშვიდზე იმყოფებოდა დედაქალაქის მერი, კახი კალაძეც.

როგორც დედაქალაქის მერი ჟურნალისტებთან აღნიშნავს, ზურაბ დოიჯაშვილს თბილისის მიმართ განსაკუთრებული სიყვარული ჰქონდა.

„სამწუხაროდ, კიდევ ერთი ადამიანი მოგვაკლდა, რომელიც მთელ თბილისს უყვარდა. ზურასაც განსაკუთრებული სიყვარული ჰქონდა თბილისის მიმართ. ძალიან სამწუხაროა, მინდა მივუსამძიმრო მის ოჯახს, მეგობრებს, სრულიად საქართველოს. მართლაც, ძალიან საყვარელი კაცი დაგვაკლდა", - განაცხადა კალაძემ.

ზურაბ დოიჯაშვილი ანჩისხატის ტაძრიდან ტაშით გააცილეს. მსახიობს დღესვე, საბურთალოს სასაფლაოზე დაკრძალავენ.

შეგახსენებთ, მომღერალი ზურა დოიჯაშვილი 14 თებერვალს გარდაიცვალა. ზურა დოიჯაშვილი ისრაელის ერთ-ერთ კლინიკაში მკურნალობდა. ის ბოლო პერიოდში მართვით სუნთქვაზე იმყოფებოდა.

"ინტერპრესნიუსის" ფოტორეპორტაჟი

ფოტოებს ავტორი: George Boochko