"ღარიბაშვილს გაუჭირდება მოლიპულ გზაზე გამართულად სიარული... არ გამოვრიცხავ, რომ დაეცეს - მელიას "ქეისი" მისთის ტესტი იქნება" - სოციოლოგი

"ღარიბაშვილს გაუჭირდება მოლიპულ გზაზე გამართულად სიარული. არ გამოვრიცხავ, რომ დაეცეს კიდეც" - ამის შესახებ "ინტერპრესნიუსთან" ინტერვიუში სოციოლოგმა იაგო კაჭკაჭიშვილმა განაცხადა.

მისი თქმით, ახალი პრემიერისთვის ნიკა მელიას "ქეისი" პირველი სერიოზული ტესტი იქნება.

"ღარიბაშვილი დაიწყებს ჭიდაობას არა მხოლოდ ოპოზიციასთან, არამედ საერთაშორისო პარტნიორებთანაც. ყველა ვხედავთ, რომ ნიკა მელიას გარშემო განვითარებულ მოვლენებს საერთაშორისო პარტნიორების აქტიური გამოხმაურება მოჰყვა.

ამ გამოხმაურების პათოსი ისაა, რომ იმ პირობებში, როდესაც სასამართლო ხელისუფლება საქართველოში დამოუკიდებელი არ არის და ქვეყანა დემოკრატიის ამ უმნიშვნელოვანეს სტანდარტს ვერ პასუხობს, ოპოზიციური პოლიტიკური პარტიის ლიდერის დაპატიმრება მხოლოდ დაძაბულობის ესკალაციას და სამოქალაქო დაპირისპირებას გამოიწვევს.

ღარიბაშვილი შეეცდება იაროს მოლიპულ გზაზე - ერთი ხელით ოპოზიცია დააწიოკოს, ხოლო მეორე ხელით საერთაშორისო პარტნიორები დააშოშმინოს და დაარწმუნოს, რომ ყველაფერი სამართლებრივი წესრიგის შენარჩუნების ფარგლებში ხდება.

თუმცა, როგორც ვთქვი, ასეთი გზა მოლიპულია და, დიდი ალბათობით, ღარიბაშვილს გაუჭირდება მოლიპულ გზაზე გამართულად სიარული. არ გამოვრიცხავ, რომ დაეცეს კიდეც. მელიას „ქეისი“ მისთვის პირველი სერიოზული ტესტი იქნება" - აღნიშნა კაჭკაჭიშვილმა.

სოციოლოგი ფიქრობს, რომ ღარიბაშვილის ხისტი პოლიტიკა, სულ მცირე, წარუმატებელი იქნება, ხოლო, უარეს შემთხვევაში, ის თავის თავსაც და პარტიის იმიჯსაც კიდევ უფრო მეტად გააკოტრებს.

" მეორე საკითხია, შევა თუ არა ღარიბაშვილი „ორჯერ მდინარეში“, ანუ შეძლებს თუ არა დაკისრებული მისიის (ავტორიტარიზმის გამყარება) შესრულებას, რასაც ის პირველი პრემიერ-მინისტრობის დროს მეტ-ნაკლებად ახერხებდა. მე ვფიქრობ, რომ ღარიბაშვილის ხისტი პოლიტიკა, სულ მცირე, წარუმატებელი იქნება, ხოლო, უარეს შემთხვევაში, ის თავის თავსაც და პარტიის იმიჯსაც კიდევ უფრო მეტად გააკოტრებს." - ამბობს კაჭკაჭიშვილი.

წაიკითხეთ ინტერვიუ სრულად "ინტერპრესნიუსზე"