მამაკაცმა ყოფილი თანამშრომელი სასტიკად სცემა და მისი ფოტო "ფეისბუქზე" გამოაქვეყნდა - რა კომენტარს აკეთებს შსს შემოსავლების სამსახურთან მომხდარ დაპირისპირებაზე?

"ტვ პირველი" შემოსავლების სამსახურის ყოფილ და მოქმედ თანამშრომლებს შორის მომხდარი დაპირისპირების შესახებ ავრცელებს ინფორმაციას. ტელეკომპანიის ცნობით, თორნიკე ვაშაძემ, რომელიც შემოსავლების სამსახურში დავის განყოფილებაში მუშაობდა, სასტიკად სცემა ყოფილი თანამშრომელი ირაკლი ხურციძე.

როგორც "ტვ პირველის" ჟურნალისტი ჰყვება, ნაცემი ხურციძის ფოტო სოციალურ ქსელში თავად ვაშაძემ გაავრცელა და რამდენიმე წუთში აიღო. არსებული ინფორმაციით, დაპირისპირება ყოფილ თანამშრომლებს შორის შემოსავლების სამსახურის მიმდებარე ტერიტორიაზე მოხდა.

ტელეკომპანიის ინფორმაციითვე, სავარაუდოდ, თორნიკე ვაშაძემ სამსახური ირაკლი ხურციძის გამო დატოვა და დაპირისპირების მიზეზი სწორედ წარსულში მომხდარი უთანხმოებაა.

თორნიკე ვაშაძემ "ტვ პირველთან" საუბარში აღნიშნა, რომ "ოჯახური პრობლემა იყო და ახლა მშვიდობაა".

როგორც AMBEBI.GE-ს განუცხადეს, ფაქტზე გამოძიება სსკ-ის 118-ე მუხლით მიმდინარეობს, რაც ჯანმრთელობის განზრახ ნაკლებად მძიმე დაზიანებას გულისხმობს.