გმირმა დედამ 6 შვილი ხანძრიდან მარტომ გამოიყვანა - "კიბე ცეცხლში იყო გახვეული, იქ ჩემი შვილები იყვნენ. მეწვოდა სხეული, მაგრამ უნდა ავსულიყავი"

ამბავი, რომელსაც ახლა წაიკითხავთ, ჰოლივუდის ფილმის სცენარს მოგაგონებთ, თუმცა ის არ არის სცენარისტების ფანტაზიის ნაყოფი, ის რეალური ისტორიაა, რომელიც შვედეთში მცხოვრებ 31 წლის ქალს და მის 6 შვილს გადახდათ.

2020 წლის 4 თებერვალს, ემა შოლსი თავის ექვს შვილთან ერთად დასაძინებლად ემზადებოდა. სახლში დედისა და შვილების გარდა არავინ იყო. სახლის მეორე სართულზე მყოფ ემას პირველი სართულიდან შვილის ხმა შემოესმა, პატარა ყვიროდა - "ცეცხლი, ცეცხლი.“

ემამ იცოდა, რომ ქვედა სართულზე ორი უმცროსი ვაჟი ჰყავდა. "ქვევით ჩავედი და დავინახე, რომ მისაღები და საძინებელი ცეცხლში იყო გახვეული. ბავშვები უსაფრთხო ადგილას უნდა გამეყვანა და ეს შევძელი, მაგრამ ახლა მეორე სართულზე მყოფი ოთხი შვილი მყავდა გამოსაყვანი“, - იხსენებს ემა.

ის უყვიროდა ზედა სართულზე დარჩენილ ბავშვებს, რომ აივანზე გასულიყვნენ. "მთელი კიბე ცეცხლში იყო გახვეული, ყოველ ნაბიჯზე ვფიქრობდი, რომ ამას ვერ შევძლებდი, რომ ზემოთ ვეღარ ავიდოდი, მაგრამ ეს უნდა გამეკეთებინა, მაღლა უნდა ავსულიყავი, იქ ჩემი ოთხი შვილი იყო. ძალიან ცხელოდა და ვგრძნობდი, როგორ მეწვოდა სხეული" - იხსენებს ქალი.

როგორც კი ემა კიბეზე ავიდა, ის მთლიანად ჩამოიშალა. 9 წლის გოგონა მეორე სართულიდან გადახტა და მეზობელთან გაიქცა, დახმარების სათხოვნელად, უფროსი ვაჟი, 11 წლის უილიამი კიბის გამოყენებას ცდილობდა, რომ ქვემოთ ჩასვლა შესძლებოდათ.

"ბიჭები შოკში იყვნენ. როდესაც აივანზე გავედი, სისხლი მომდიოდა და მთელ სხეულზე ღია დამწვრობა მქონდა, თმა კი ნახშირივით გამოიყურებოდა“, - იხსენებს ქალი და ამბობს, რომ გააანალიზა, რომ ყველაზე პატარა გოგონა, 1 წლის მოლი აივანზე არ იყო. "ვიფიქრე, ის თუ შიგნითაა, ალბათ ცოცხალი აღარ იქნება, მაგრამ მისი გამოყვანა მაინც უნდა მოვახერხო.“

აივანზე მყოფი ბიჭები დედის შეჩერებას ცდილობდნენ და ეუბნებოდნენ, რომ სახლში აღარ შესულიყო.

"საშინლად სქელი კვამლი იყო და სუნთქვა ფაქტობრივად შეუძლებელი. ძალიან დაღლილი ვიყავი, მაგრამ კვამლში ვხედავდი, როგორ იდგა მოლი თავის საწოლში და ტიროდა, როცა ეს დავინახე რაღაც უზარმაზარი ძალა მივიღე, ფეხზე მაგრად დავდექი, მივედი მოლიმდე და ხელში ავიყვანე. მე მხოლოდ საკუთარი სხეული მქონდა, არანაირი დამცავი, არაფერი, მხოლოდ მე ვიყავი და დედის გული. მოლი გამოვიყვანე, ფეხებიდან სისხლი მდიოდა“, - ყვება ემა.

მოლი გამოიყვანა და გონება დაკარგა, გონზე მოსვლის შემდეგ კი საშინელ ტკივილს გრძნობდა.

"თითქოს ყველა ტკივილი მხოლოდ მაშინ ვიგრძენი, ერთბაშად მოვიდა ტკივილის შეგრძნება, ისე საშინლად მტკიოდა. ყველა ბავშვი გავიყვანე და ვფიქრობდი, რომ ახლა შეიძლებოდა მოვმკვდარიყავი“, - იხსენებს ემა.

სანამ სასწრაფოთი გადაიყვანდნენ, ემა დაჰპირდა თავის უფროს შვილს, რომელიც მას ერთი წამითაც არ ტოვებდა, რომ სახლში მალე დაბრუნდებოდა. ეს დაპირება კი საავადმყოფოში ყოფნის პერიოდში ემას მანტრა გახდა, რომელსაც ყოველ წუთს იმეორებდა.

"საავადმყოფოში როდესაც გავიღვიძე, პირველი რაც ვიკითხე - ჩემი შვილები ცოცხლები არიან?“ - ამბობს ემა.

ექვსივე ბავშვი გადარჩა და თან ისე, რომ არანაირი დაზიანება არ მიუღიათ. ემა სამი კვირის განმავლობაში ხელოვნური სუნთქვის აპარატზე იყო და როგორც ამბობს, სიცოცხლესა და სიკვდილს შორის იყო. უჩვეულოა, რომ 90 %-ის დამწვრობის შემთხვევაშიც კი ადამიანი გადარჩეს, ემას კი სხეულის 93% ჰქონდა დამწვარი.

თავდაპირველად ემა ექიმებს არ უჯერებდა, როდესაც ეუბნებოდნენ, რომ ბავშვები კარგად იყვნენ, მას გონებიდან არ ამოსდიოდა კვამლში გახვეული, ატირებული მოლი და ფიქრობდა, რომ მისი გადარჩენა ვერ შეძლო. ბავშვებს დედის ნახვის უფლება საავადმყოფოში მხოლოდ თვენახევრის შემდეგ მისცეს.

"ეს შესანიშნავი, მაგრამ ამავდროულად, ძალიან რთული მომენტი იყო, რადგანაც მოლიმ ვერ მიცნო, მას არ სურდა ჩემთან მოსვლა და რა თქმა უნდა, მესმის ამის, მე სულ სხვაგვარად გამოვიყურებოდი“, - იხსენებს ემა.

რეაბილიტაციის პროცესმა წარმატებით ჩაიარა და უფრო მალე გამოჯანმრთელდა, ვიდრე მოსალოდნელი იყო. ამბობს, რომ ახლა უფრო მეტად აფასებს ცხოვრების ყველა წამს.

"ახლა ჩემი შვილები კვლავ მცნობენ. ხანძარმა და იმან, რაც გადავიტანეთ, თავისი კვალი დატოვა და მთელ ოჯახზე იმოქმედა. მომხდარმა კიდევ უფრო მეტად დაგვაახლოვა, მე მადლიერი ვარ ჩემს შვილებთან, ოჯახთან ერთად გატარებული ყოველი დღის“, - ამბობს ემა.

აღსანიშნავია, რომ გმირი დედა შვედეთში წლის მაშველად დაასახელეს.