ნიაზ დიასამიძის ვაჟი მაკა ასათიანის დისშვილზეა შეყვარებული - ულამაზესი წყვილის პირველი ერთობლივი ფოტოები
სილამაზის ეტალონად წოდებული დიზაინერის, მაკა ასათიანის ოჯახის გარშემო საზოგადოების ინტერესი მუდმივად არსებობს. პოპულარული ოჯახის ერთ-ერთი წევრი მარიანა აჩბა მაკას უმცროსი დის, სალომე ასათიანის და ასტამურ აჩბას ერთადერთი ქალიშვილია, რომელსაც მედიაში "აფხაზ პრინცესადაც" მოიხსენიებენ.
მშვენიერი მარიანა წლებია პარიზში ცხოვრობს და სწავლობს. სწავლის პარალელურად მოდელობით არის დაკავებული და ცნობილი ქართველი დიზაინერის - ჯაბა დიასამიძის მუზა და ყველა ჩვენების მთავარი მოდელია.
ორი წლის წინ გავრცელდა ინფორმაცია, რომ მარიანა აჩბა "მაგთიკომის" დამფუძნებელ გია ჯოხთაბერიძის ვაჟზე, ირაკლი ჯოხთაბერიძეზე იყო შეყვარებული. წყვილის საერთო ფოტოები მაშინ ქართულ მედიაში არაერთხელ გამოქვეყნდა.
ამბობდნენ, რომ ჯოხთაბერიძეების ოჯახს ცნობილი სარძლო ძალიან მოსწონდა და თბილისური ბომონდი ქორწილსაც ელოდა, თუმცა ქორწილი არ შედგა და წყვილი ერთმანეთს დაშორდა.
როგორც AMBEBI.GE-მ გაარკვია, მარიანა აჩბას ახალი რჩეული ჰყავს და ის ცნობილი მუსიკოსის ნიაზ დიასამიძის და მსახიობ მაია გელოვანის ვაჟი, თემურიკო დიასამიძეა. თემურიკო საზოგადოების წინაშე დაახლოებით ერთი წლის წინ წარსდგა, როდესაც 2020 წლის თებერვალში ნიაზ დიასამიძისა და 33ა-ს კონცერტი დიჯეის ამპლუაში დახურა.
"ამხელა სცენაზე პირველად მომიწია გამოსვლამ. ნიაზთან ერთადაც დავუკარი და მისი კონცერტის შემდეგაც. კარგი შთაბეჭდილებები დამრჩა. ხმა მაქვს, მაგრამ არ ვმღერი, დრამზე ვუკრავ. ელექტრონული მუსიკის მოსმენა დავიწყე ოთხი წელია. ნიაზმა ძალიან დიდი გავლენა მოახდინა მუსიკით დაინტერესებაში. მინდა, ქართული ხალხური ინსტრუმენტები და ელექტრონული მუსიკა გავაერთიანო. გადაწყვეტილი არ მაქვს, რომ მუსიკოსი გამოვალ, მაგრამ ძალიან ვარ გატაცებული მუსიკით… მინდა, ჩემი სათქმელი ვთქვა ქართულ ელექტრონულ მუსიკაში...“ - ამბობდა ტელეკომპანია "იმედში" სტუმრობისას ახალგაზრდა ხელოვანი.
მარიანა და თემურიკო რომ ერთად არიან, ამის შესახებ მათი საერთო ფოტოებიც მოწმობს. წყვილი როგორც ჩანს, გრძნობებს აღარ მალავს. მარიანამ "ინსტაგრამზე" შეყვარებულთან ერთად გადაღებული ფოტო ცოტა ხნის წინ პირველად გამოაქვეყნა. მარიანასთან ერთად გადაღებული სურათი აქვს გამოქვეყნებული "ინსტაგრამზე" თემურიკოსაც.
ნიაზ დიასამიძე და მისი მეუღლე მსახიობი მაია გელოვანი 21 წელია დაოჯახებულნი არიან, წყვილს ჰყავს ორი ვაჟი - 20 წლის თემურიკო და 14 წლის ანდრია.
"პირველად ერთმანეთს საერთო მეგობრის, არაჩვეულებრივი მსახიობისა და პოეტის, ნიკო გომელაურის ოჯახში შევხვდით. ერთმანეთი გავიცანით, მაგრამ შემდეგი 2 წელი არანაირი ურთიერთობა არ გვქონია. შემდეგ ისევ შევხვდით და ჩვენი სიყვარულის ამბავიც ამის შემდეგ დაიწყო, რამდენიმე თვეში დავქორწინდით. ნიაზი ჩემს სპექტაკლებს არასდროს ესწრება. მხოლოდ ერთი შემთხვევა იყო, მოვიდა და როცა ჩემი სცენაზე შესვლის დრო დადგა, დარბაზიდან გავიდა. გასვლის დროს თვალი მოვკარი, არც ვიცოდი, მოსული თუ იყო.
უზომოდ ემოციურია, საკუთარ თავს ეკრანზე არ უყურებს. ამას მხოლოდ მაშინ აკეთებს, როცა მარტოა. მისი კარგად მესმის. არსებობს რაღაც სივრცე, რომელიც ჩემია, იქ აღარ იჭრება. მე მის ყველა კონცერტს ვესწრები, თამამად და ამაყად ვიტყვი, მისი შემოქმედების პირველი შემფასებელი და გულშემატკივარი ვარ..." - ამბობს ჟურნალ „გზასთან“ ინტერვიუში მაია გელოვანი მეუღლის შესახებ.
მარიანა აჩბამ და თემურიკო დიასამიძემ ერთმანეთი, სავარაუდოდ, ჯაბა დიასამიძისგან გაიცნეს. როგორც დასაწყისშიც ვწერდით, მარიანა დიზაინერის მთავარი მუზააა. ჯაბა დიასამიძე კი, თემურიკოს ბიძაა.
დიასამიძეებს საფრანგეთთან მშობლიური ფესვები აკავშირებთ. მათი ბებია მადლენი ფრანგი გახლდათ. გასაბჭოების შემდეგ ემიგრაციაში წასული ბაბუა ლევილში დასახლდა და სწორედ იქ გაიცნო ფრანგი ქალი, რომელთან ერთადაც წლების შემდეგ ჩამოვიდა კიდეც საქართველოში. თუმცა, მეუღლის გარდაცვალების შემდეგ ქალბატონი მადლენი საფრანგეთში დაბრუნდა და მისი შთამომავლებიც წელიწადში რამდენიმე თვეს იქ ატარებდნენ.