30 წლის ექთანი ამბობს, რომ კორონავირუსი ორჯერ გადაიტანა - "მეორედ ინფიცირებისას "შაქარი" დამემართა, მაგრამ ფილტვებზე პრობლემა არ ყოფილა"

30 წლის მარგო პავლიაშვილი, რომელიც სამედიცინო ქსელ "გორმედის" გორის საუნივერსიტეტო კლინიკის ექთანია ამბობს, რომ კორონავირუსი ორჯერ გადაიტანა.

AMBEBI.GE-სთან საუბარში პავლიაშვილი ჰყვება, რომ ახალი კორონავირუსით ინფიცირება პირველად 17 აგვისტოს დაუდასტურდა. მისი თქმით, მაშინ მკურნალობა თავდაცვის სამინისტროს გორის სამხედრო ჰოსპიტალის სტაციონარში უტარდებოდა.

"6 წელია ექთნად ვმუშაობ, ჯერ თბილისში ვმუშაობდი, შემდეგ კი - გორში. უკვე მე-3 წელია, "გორმედის" თერაპიული განყოფილების მედდა ვარ. მას შემდეგ კი, რაც "გორმედის" გორის კლინიკა ჰიბრიდულ სამედიცინო დაწესებულებად ჩამოყალიბდა და სხვა პათოლოგიების მქონე პაციენტების პარალელურად, გამიჯნულ სივრცეში კოვიდინფიცირებულების მიღებაც დაიწყო, უკვე კოვიდსტაციონარში ვმუშაობ.

პირველად, კორონავირუსული ინფექცია 17 აგვისტოს დამიდასტურდა. მარტოხელა დედა ვარ, ორ მცირეწლოვან შვილთან ერთად ვცხოვრობ, თუმცა ბავშვები მაშინვე გავგზავნე დედასთან და ისინი არ დაინფიცირებულან. მკურნალობა ჰოსპიტალის სტაციონარში მიტარდებოდა (იმ პერიოდში მხოლოდ ჰოსპიტალში ფუნქციონირებდა კოვიდკლინიკა).

მეორედ ინფიცირება კი ოთხი თვის შემდეგ, 1-ელ დეკემბერს დადასტურდა. მეორედ უფრო რთული სიმპტომებით მიმდინარეობდა ვირუსული ინფექცია, ვიდრე პირველად ინფიცირებისას. სუნთქვის უკმარისობა პირველად ინფიცირების შემდეგ ხანგრძლივად დამრჩა, მეორედ კი - შაქარი დამემართა, მაგრამ ფილტვების პრობლემა არცერთი ინფიცირებისას არ ყოფილა, მეორედ სახლის პირობებში ვიმყოფებოდი კარანტინში და ექიმთან შეთანხმებით ვმკურნალობდი.

რაც შეეხება დაინფიცირების წყაროს, რთულია რაიმეს დაბეჯითებით თქმა. მოგეხსენებათ, მთელ მსოფლიოში და შესაბამისად, საქართველოშიც, სამედიცინო პერსონალი ყველაზე მეტად წარმოადგენს რისკჯგუფს, თანაც, გარდა ჩემი პროფესიისა და სამუშაო ადგილისა, ჩვეულებრივი მოქალაქე ვარ, მეც ვსარგებლობ მაღაზიებით, აფთიაქით თუ ტრანსპორტით და ძნელია იმის თქმა, სად დავინფიცირდი", - აღნიშნავს მარგო პავლიაშვილი.

"გორმედის" თერაპიული დეპარტამენტის ხელმძღვანელის, გია მღებრიშვილის ინფორმაციით, მარგო პავლიაშვილს კოვიდ-19 ორჯერვე PCR ტესტით დაუდასტურდა, სხვა სამედიცინო პერსონალში კი კორონავირუსის ორჯერ დაფიქსირებას ადგილი არ ჰქონია.

ორგზის კოვიდგადატანილი ექთანი სამსახურებრივი მოვალეობის შესრულებას უკვე შეუდგა, შვილებიც - 10 წლის ბიჭი და 8 წლის გოგონა, ბებიის სახლიდან დედასთან დაბრუნდნენ.

როგორც გვიყვება, მთელი ამ დროის განმავლობაში განსაკუთრებული რისკის ქვეშ ექიმები არიან და გული წყდება, რომ ხშირ შემთხვევაში სოციალურ ქსელში მედიკოსების მისამართით გარკვეული კრიტიკა ისმის.

"ზოგადად, ყურადღება და თბილად მოქცევა ყველას სიამოვნებს, მითუფრო, როცა ადამიანს უჭირს. მისთვის თითოეულ სიტყვას მნიშვნელობა აქვს. პაციენტების მხრიდან უხეშობა არ მახსენდება. ყოფილა ფსიქიკური დარღვევების მქონე კოვიდინფიცირებული პაციენტიც თუმცა, მშვიდი მიდგომით და მზრუნველობით, არანაირ გართულებას არ ჰქონია ადგილი.

აქვე უნდა აღვნიშნო, რომ ამ ვითარებაში, ამ კრიზისულ პერიოდში, მედპერსონალი რომ არის რისკის და პარალელურად, გარკვეული ზეწოლის ქვეშ, ასე არავინაა. სოციალურ ქსელში ხშირად მხვდება ისეთი პოსტები, სადაც ჩანს, რომ ბევრი ადამიანი ვერ ხედავს იმას, რაც რეალურად ხდება, ვერ ხედავს, რომ უკვე ამდენი თვეა, სრული სამედიცინო პერსონალი, ფაქტობრივად, ბრძოლის წინა ხაზზეა" - ამბობს მარგო პავლიაშვილი..

ავტორი: ია თინიკაშვილი