მელანია ტრამპმა 100-წლიანი ტრადიცია დაარღვია და ინაუგურაციამდე ჯილ ბაიდენი თეთრ სახლში არ მიიწვია

აშშ-ის პირველმა ლედიმ, მელანია ტრამპმა მომავალი პირველი ლედი, ჯილ ბაიდენი თეთრ სახლში არ დაპატიჟა და ამით 100-წლიანი ტრადიცია დაარღვია. ჯილ ბაიდენის ჩაიზე დაპატიჟება და თეთრ სახლში ერთგვარი გიდობის გაწევა მელანიას, როგორც პირველი ლედის, ერთ-ერთი მოვალეობა იყო.

როგორც CNN წერს, ბესი ტრუმენიდან მიშელ ობამას ჩათვლით ეს ტრადიცია არცერთ პირველ ლედის არ დაურღვევია.

ოთხი წლის წინ თავად მელანიას მიშელ ობამამ უმასპინძლა.

ეს არის ერთ-ერთი დაუწერელი ვალდებულება, რომელსაც ამერიკის შეერთებული შტატების პირველი ლედები ასრულებენ ხოლმე. ტრადიციის მიხედვით, შეხვედრა თეთრ სახლში ინაუგურაციამდე რამდენიმე დღით ადრე იმართება, ეწყობა მედიისთვის ფოტოსესიაც.

ცნობისთვის, დღეს აშშ-ის 46-ე პრეზიდენტის, ჯოზეფ ბაიდენისა და ვიცე-პრეზიდენტი, კამალა ჰარისის ინაუგურაცია გაიმართება.

ფიცს ჯერ კამალა ჰარისი, თბილისის დროით 20:30 საათზე, უზენაესი სასამართლოს მოსამართლე, სონია სოტომაიერის წინაშე დადებს, თბილისის დროით 21:00 საათზე კი ჯო ბაიდენს ფიცს უზენაესი სასამართლოს თავმჯდომარე ჯონ რობერტსი დაადებინებს, რის შემდეგაც ის საინაუგურაციო სიტყვას წარმოთქვამს.

სიტყვით გამოსვლის შემდეგ ბაიდენი კაპიტოლიუმის აღმოსავლეთ ნაწილში გადაინაცვლებს, სადაც ტრადიციის თანახმად, ამერიკის შეიარაღებული ძალების მზაობას შეამოწმებს.

ამის შემდეგ ჯო ბაიდენი, კამალა ჰარისი და ყოფილი პრეზიდენტები - ბარაკ ობამა, ჯორჯ ბუში და ბილ კლინტონი, მეუღლეებთან ერთად, არლინგტონის ეროვნულ სასაფლაოზე მივლენ და უცნობი ჯარისკაცის საფლავს გვირგვინით შეამკობენ.