კასპში მამაკაცმა სანადირო თოფის მუქარით ორი მოქალაქე მძევლად აიყვანა - პოლიციამ მოლაპარაკებები წარმატებით დაასრულა, დამნაშავე დაკავებულია
მამაკაცი, რომელმაც კასპში მძევლები აიყვანა, დაკავებულია. სპეცოპერაცია შინაგან საქმეთა სამინისტრომ ცოტა ხნის წინ დაასრულა.
"შინაგან საქმეთა სამინისტრომ კასპში ერთ-ერთ საწარმოში ორი პირის მძევლად აყვანის ბრალდებით 1 პირი - 1993 წელს დაბადებული გ.მ. დააკავა. ბრალდებული კასპში, ერთ-ერთი საწარმოს ტერიტორიაზე შეიჭრა და სანადირო თოფის მუქარით ორი მოქალაქე მძევლად აიყვანა.
თავდასხმის შესახებ შეტყობინების მიღებისთანავე შემთხვევის ადგილზე დაუყოვნებლივ მოხდა სამართალდამცველების მობილიზება, პოლიციამ მყისიერი რეაგირების რეჟიმში შემოსაზღვრა ტერიტორია და დაიწყო სპეციალური ოპერატიული და საგამოძიებო ღონისძიებები.
ადგილზე შინაგან საქმეთა მინისტრის მოადგილე - ვლადიმერ ბორცვაძე ჩავიდა, რომელიც საპოლიციო ღონისძიებებს პირადად ხელმძღვანელობდა.
სამართალდამცველების მხრიდან გ.მ.-სთან რამდენიმესაათიანი აქტიური მოლაპარაკებების შედეგად, თავდამსხმელის მიერ მძევლად აყვანილი მოქალაქეები უვნებლად გათავისუფლდნენ, რომლებიც პოლიციამ უსაფრთხო ტერიტორიაზე გადაიყვანა.
მძევლად აყვანილი ადამიანების გათავისუფლების შემდეგ პოლიციამ თავადამსხმელი შემთხვევის ადგილზე დააკავა.გამოძიება საქართველოს სისხლის სამართლის კოდექსის 144-ე მუხლის მე-2 ნაწილის "გ" და "ი" ქვეპუნქტებით მიმდინარეობს, რაც სიცოცხლისთვის საშიში მუქარით ორი ან მეტი პირის მძევლად ხელში ჩაგდებას გულისხმობს" - ნათქვამია შსს-ს მიერ გავრცელებულ ინფორმაციაში.
ყოფილი პოლიციელი, რომელმაც კასპში მძევლები აიყვანა, დუმილის უფლებას იყენებს და დაცვაზე უარს ამბობს - რას ამბობს ადვოკატი
მკვლელობა პანკისში - ნათესავებს შორის შელაპარაკება ტრაგიკულად დასრულდა
