რუსეთში Pfizer - ის ვაქცინის შეტანა აკრძალეს

რუსეთში ვერცერთი კლინიკა კანონიერად ვერ გამოიყენებს კორონავირუსის საწინააღმდეგოდ Pfizer - ის ვაქცინას. ამის შესახებ "ინტერფაქსს“ რუსეთის ჯანდაცვის ზედამხედველობის ფედერალურ სამსახურში განუცხადეს.

"რუსეთის ტერიტორიაზე იმ ვაქცინის შემოტანა, რომელიც არ არის ჩვენს ქვეყანაში რეგისტრირებული, აკრძალულია. აკრძალვა შეეხება იმ სამედიცინო ორგანიზაციებსაც, რომლებიც რუსეთის ტერიტორიაზე საერთაშორისო სამედიცინო კლასტერის ეგიდით მოქმედებენ“, - აცხადებენ საზედამხედველო ორგანოში.

შეგახსენებთ, ამ ქვეყანაში რუსული წარმოების "სპუტნიკ V“ 2020 წლის აგვისტოში დაარეგისტრირეს. ამტკიცებენ, რომ ამ ვაქცინას 91%-იანი დაცვა შეუძლია. 2020 წლის 15 დეკემბრიდან რუსეთში "სპუტნიკით" ვაქცინაციის დაწყების ნებართვა გაიცა.