"მოვუწოდებ ნიკას, ბოდიში მოიხადოს მუსლიმების წინაშე!" - რა განცხადებამ გაანაწყენა მუსლიმები და რას პასუხობს გვარამია კრიტიკას?

"ევროპული საქართველოს" წევრი აჰმედ იმამყულიევი "მთავარი არხის" გენერალურ დირექტორს ნიკა გვარამიას ბოდიშის მოხდას სთხოვს. იმამყულიევი გვარამიას მის მიერ გაკეთებული განცხადების გამო აკრიტიკებს. საუბარია "მთავარი არხის" დირექტორის კომენტარზე, სადაც მან მიხეილ სააკაშვილი ალაჰს შეადარა.

"ნიკა გვარამიას მიერ მოყვანილი მაგალითი (შედარება) (ხუმრობითაც კი) ჩემთვის და ყველა მუსლიმისთვის არის მიუღებელი და შეურაცხმყოფელი! მე ვგმობ ასეთ ქმედებას და მივუწოდებ ნიკას, რომ ბოდიში მოიხადოს მუსლიმების წინაშე!" - წერს იმამყულიევი.

"მთავარი არხის" დირექტორისგან ბოდიშის მოხდას მოითხოვს ასევე "ქართული ოცნების" დეპუტატი, ადამიანის უფლებათა დაცვისა და რეინტეგრაციის კომიტეტის თავმჯდომარის მოადგილე სავალან მირზოევი:

"გვარამიამ ბოდიში მოიხადოს მუსულმანებისა და ქართული საზოგადოების წინაშე. ეს არ არის პირველი შემთხვევა, როცა გვარამიაც და სხვებიც ეხებიან ეროვნულ მრწამსსა და რელიგიას. გვარამიას სიტყვებს მუსლიმთა შეურაცხყოფად მივიჩნევ და კატეგორიულად მოვითხოვ საჯაროდ ბოდიშის მოხდას", - ამბობს ის.

სოციალურ ქსელში ავრცელებს თავის მოსაზრებას მარნეულისა და გარდაბნის მაჟორიტარი დეპუტატი ზაურ დარგალი.

"სააკაშვილის გუნდის წევრების მხრიდან ეს პირველი შემთხვევა არ არის, როცა ისინი დისკრიმინაციულ კომენტარს აკეთებენ. ნიკა გვარამია იძულებული იქნება ბოდიში მოიხადოს იმ განცხადებისთვის, რომელიც მან გააკეთა და მთელი მუსულმანური სამყარო შეურაცხყო", - წერს ის.

კრიტიკას მალევე უპასუხა გვარამიამ და აღნიშნა, რომ საკითხზე კვირას, მის გადაცემაში ისაუბრებს:

"ამ საკითხზე (სუსის და ქოცების მიერ ხელოვნურად ინსპირირებულზე და აგორებულზე) კვირას ვისაუბრებ, ჩემს გადაცემაში. ამჯერად, სხვაზე: ჩემი დაგმობა მგონი ამ პარტიის ბოლო პერიოდის კრედო გახდა. აწ უკვე, სუსის ნარატივის ციტირებით, მთლად.სასაცილოა. უფრო შორს შეფასებებში წასვლას არ ვაპირებ, რადგან, რა რა, და მათი დაგმობა ნამდვილად არაა ჩემი კრედო, ან საერთოდ, რამენაირი ინტერესი, სულ მცირედიც კი" - დაწერა გვარამიამ "ფეისბუქზე".

ცნობისთვის, გვარამიამ განცხადება, რომელსაც კრიტიკა მოჰყვა, "მთავარი არხის" ეთერში, ივანიშვილის წერილის შეფასებისას გააკეთა.

ნიკა გვარამია ამბობს რომ ივანიშვილის განცხადება, სადაც ის ამბობს, რომ მედია თავისუფალია, მისთვის მიუღებელია.

"ნახევრად ხუმრობით ვიტყვი, რომ პრაქტიკულად უწერია, რომ სააკაშვილი ალაჰია და მოციქული მისი მუჰამედი გვარამია, ეს კაცი არ არის სტაბილური სააკაშვილის ნიადაგზე პირველ რიგში და მეორე რიგში ჩემს ნიადაგზეც.

სერიოზულად თუ ვილაპარაკებთ, ამ წერილით მედიის სეგმენტზე ვლაპარაკობ, დადასტურდა, რომ ეს კაცი დევნიდა "რუსთავი2"-ს და მისი პირადი ჩართულობით შეიცვალა "რუსთავი 2"-ის მესაკუთრე უკანონო მესაკუთრით და ასევე მდევნიდა პირადად მე და საბოლოო გამოსათხოვარ წერილში, პირადად მიხსენიებს პრაქტიკულად, როგორც მედია მენეჯერს, რომელიც სინამდვილეში პარტფუნქციონერია, თუ რაღაც სისულელე. მიუხედავად იმისა, რომ მე არანაირი პარტიული თანამდებობა არასოდეს არ დამიკავებია", - განაცხადა ნიკა გვარამიამ.