ბიძინა ივანიშვილმა "ქართული ოცნების" თავმჯდომარეობიდან წასვლაზე განცხადება შესაძლოა უახლოეს საათებში გააკეთოს -  "ის პოლიტიკური პროცესიდან სრულ დისტანცირებას შეეცდება"

ambebi.ge-ს წყაროს ინფორმაციით, ბიძინა ივანიშვილმა "ქართული ოცნების" თავმჯდომარეობიდან წასვლა საბოლოოდ გადაწყვიტა. როგორც ჩვენი წყარო ამტკიცებს, ამის თაობაზე წერილობითი განცხადების გავრცელებას ის უახლოეს მომავალში, მეტიც, უახლოეს საათებში გეგმავს.

"ბიძინა ივანიშვილი პარტიის თავმჯდომარეობიდან წასვლის შესახებ განცხადებას წერილობით გაავრცელებს, მისი განცხადებიდან ერთ კვირაში კი ირაკლი კობახიძეს აირჩევენ ამ პოსტზე. ის ამ განცხადებაში ასევე აპირებს საქველმოქმედო პროექტების დაანონსებას (მაგალითად, ლაგუნა ვერეს და სხვა). ის პოლიტიკური პროცესიდან სრულ დისტანცირებას შეეცდება, ამიტომ შესაძლოა ცოტა ხნით ქვეყნიდანაც წავიდეს და სერიოზულად აღარ ჩაერიოს "ოცნების" საქმიანობაში. ამასთანავე, მმართველ გუნდში დიდი რებრენდინგი იწყება", - აცხადებს სანდო წყარო. მისი თქმით, პოლიტიკიდან წასვლა პირადად ბიძინა ივანიშვილის გადაწყვეტილებაა და გუნდს უტოვებს საშუალებას, რომ დამოუკიდებლად იმოქმედოს.

შეგახსენებთ, ბიძინა ივანიშვილი პოლიტიკიდან 2013 წელს ერთხელ უკვე წავიდა, თუმცა რამდენიმე წლის შემდეგ, როგორც თვითონ განაცხადა, იძულებული გახდა დაბრუნებულიყო.