ქსნის ციხის პატიმარი კორონავირუსით გარდაიცვალა - რა განმარტებას აკეთებენ ჯანდაცვის სამინისტროში

საქართველოს იუსტიციის მინისტრის, გოჩა ლორთქიფანიძის განცხადებით, ქსნის დაწესებულების ერთი პატიმარი კორონავირუსით გარდაიცვალა. ამის შესახებ მინისტრმა საქართველოს მთავრობის ადმინისტრაციაში უწყებათაშორისი საკოორდინაციო საბჭოს სხდომის დასრულების შემდეგ ბრიფინგზე განაცხადა.

როგორც ლორთქიფანიძემ განმარტა, პატიმარი სიმპტომების აღმოჩენისთანავე სამოქალაქო კლინიკაში გადაიყვანეს, თუმცა, სამწუხაროდ, მისი გადარჩენა ვერ მოხერხდა.

„გვყავს გარდაცვლილი პატიმარი. მასთან დაკავშირებით ინფორმაცია გაჟღერებული იყო სპეციალური პენიტენციური დაწესებულების მიერ პირველ იანვარს გაკეთებულ განცხადებაში. როგორც კი სიმპტომები დადასტურდა, ეს ადამიანი გადაყვანილ იქნა სამოქალაქო კლინიკაში და სამოქალაქო კლინიკაში უკვე მე-7 დღეს უფრო დაუმძიმდა მდგომარეობა. როგორც არის ჩვეულებრივ გათვალისწინებული პრაქტიკით, მოხდა აქტირება. ეს არ არის მარტო ჩვენთან, პრაქტიკით ხშირად ხდება ამ საფუძვლით ადამიანის აქტირება. სამოქალაქო კლინიკაში მოხდა გარდაცვალება. ეს იყო ქსნის დაწესებულების პატიმარი“, - განაცხადა ლორთქიფანიძემ.

ჯანდაცვის მინისტრის მოადგილის თამარ გაბუნიას განცხადებით, პენიტენციურ სისტემაში ტესტირება ეპიდემიის პირველი დღიდან ინტენისურად მიმდინარეობს. რაც შეეხება უშუალოდ ქსნის პენიტენციური დაწესებულების პატიმარის კორონავირუსით გარდაიცვალების შემთხვევას, როგორც გაბუნია განმარტავს, თუკი პენიტენციური სამსახურის სამედიცინო სამსახური ფაქტის შესწავლას და მარეგულირებლის მონაწილეობას საჭიროდ ჩათვლის, ასეთ შემთხვევაში ჩაერთვებიან.

„პენიტენციურ სისტემაში ტესტირება ეპიდემიის პირველი დღიდან ძალიან ინტენსიურად მიმდინარეობს. პენიტენციური სამსახური ძალიან თანმიმდევრულად, ეტაპობრივად და ზედმიწევნით მიჰყვება ტესტირების რეკომენდაციებს. დაწყებული PCR ტესტირებით და შემდეგ უკვე გაგრძელდა ანტიგენ ტესტირების მაჩვენებელი. შიგნით, ლოჯისტიკურად საიდან ჩაითვალა ტესტირების დაწყება უფრო ადრე, პენიტენციური სამსახურის სამდიცინო დეპარტამენტი ამ შეკითხვაზე დეტალურად გაგცემთ პასუხს... ჩვენ შევისწავლით იმ შემთხვევას, რომელიც შესწავლისთვის მოგვმართავს“, - განაცხადა გაბუნიამ.

გოჩა ლორთქიფანიძის განცხადებით, დღეის მდგომარეობით, კორონავირუსის ინფექციაზე ინტენსიური ტესტირება არასრულწლოვნებსა და ქალ პატიმრებს ჩაუტარდათ, შედეგად კი 23 ქალ პატიმარს კორონავირუსი დაუდასტურდა.

„მინდა ყველა დაგამშვიდოთ. პენიტენციურ სისტემაში ვითარება სრულად ექვემდებარება კონტროლს, როგორც ექვემდებარებოდა აქამდე. ყველა ის კონტროლის მექნიზმი და ფილტრი, რაც ემსახურება კოვიდვირუსის პრევენციას, მის აღმოჩენასა და გამოვლენას, ასევე კონტროლს და ვითარების მართვას, კვლავ მოქმედებს როგორც აქამდე მოქმედებდა. ქვეყანაში ეპიდემიოლოგიური ვითარებიდან გამომდინარე, პენიტენციურმა სისტემამ პატიმრების ინტენსიური პისიარ ტესტირება დაიწყო. ეს უკვე მიმდინარეობს და გრძელდება. პირველ რიგში, ეს ჩვენ დავიწყეთ 31 დეკემბრიდან, გეგმაზომიერად მივყვებით, ჯერ ჩავუტარეთ არასრულწლოვნებს, სადაც ყველა ტესტი იყო უარყოფითი შედეგით. შემდეგ გადავედით ქალთა დაწესებულებაზე და 23 შემთხვევაში დადასტუდა კოვიდი. ისინი იზოლირებულები არიან, მათი თანამესაკნეები არიან იზოლირებულები. ყველა ასეთ შემთხვევაში ხდება მყისიერი რეაგირება. არავითარი საფუძველი აჟიოტაჟის არ არსებობს. ჩვენ 9 ათასამდე ადამიანისა და მათი ოჯახების წინაშე ვართ პასუხისმგებლები. არავითარი საფუძველი შეშფოთების არ არსებობს", - განაცხადა ლორთქიფანიძემ.