აფხაზეთის ახალი წელი: "ახლა მიადგებიან ჩვენს საცოდავ მოსახლეობას და ვაქცინასაც ჩვენზე გამოცდიან"  - რუსული ვაქცინა და "ომი კრიმინალურ სამყაროსთან”

"დანგრეული ილუზიების წელი”- ასე შეაფასა აფხაზურმა მედიამ 2020 წელი. ე.წ. პოლიტიკური ცვლილებების ფონზე, რომლისგანაც ადგილობრივები ელოდნენ სასიკეთო სიახლეებს, როგორც თავად ამბობენ, იმედი გაუცრუვდათ...

რეგიონის მოსახლეობის ნაწილი ბჟანია-ანქვაბის გუნდისგან რატომღაც მეტს ელოდა, კერძოდ კი, რუსეთისგან უფრო მეტ დისტანცირებას, ეკონომიკის განვითარების მხრივ მეტ ქმედით ნაბიჯებს, სოციალურ პროექტებს, ტურიზმის განვითარებასა და პოპულარიზაციას, კრიმინალის ალაგმვას თუ არა, შესუსტებას მაინც და ნარკომანიის წინააღმდეგ გალაშქრებას. "ერთადერთი, რაც ე.წ. შს მინისტრმა დიმიტრი დბარმა მოახერხა, იმ ადამიანებს ვისაც სახლში მარიხუანა ჰქონდა დათესილი და მისი რეალიზება ბიზნესად ჰქონდა ქცეული, ეს საქმიანობა აუკრძალა, თუმცა, ნარკოტიკების ბიზნესი ვერ შეამცირა, პირიქით, მძიმე ნარკოტიკებს უფრო ხშირად მოიხმარენ", - წერს ადგილობრივი მედია. მოსახლეობის ერთი ნაწილის თქმით, ციტრუსის რეალიზაცია შერჩევით ხდება, მაგალითად, ზოგიერთს ფსოუს საზღვარზე გადატანის პრობლემა არ აქვს, მაშინ, როდესაც, ბევრს ლიმონი და მანდარინი მანქანაში ულპება... აფხაზეთის "ხელმძღვანელობის” თქმით, შეფერხების მიზეზად "კანონის გვერდის ავლის მცდელობაა, ანუ ზოგს საქონლის დარეგისტრირება არ სურს.

მათივე ცნობით, ტურიზმის სეზონის ჩავარდნის შემდეგ, რეგიონში ჰუმანიტარული კრიზისია. კოვიდპანდემიის გამო, დაკეტილია ყველანაირი საზოგადოებრივი თავშეყრის ადგილი, თუმცა, სინამდვილეში, ეს ყველაფერი ერთი შეხედვით, რეალურად საკვები ობიექტებიც და სხვა დანიშნულების მარკეტებიც მუშაობენ, მეპატრონეები ან ახლო-მახლო ტრიალებენ, ან კარზე ნომერია მითითებული და გამყიდველიც უმალ ჩნდება ადგილზე.. ერთი სიტყვით, რეგიონში კოვიდ-19-ის ვირუსი აფხაზეთში უკონტროლოდ გავრცელდა, ბოლო ხანებში, ინფიცირების მაჩვენებელს გარდაცვალების რიცხვმა გადაასწრო, რამაც მოსახლეობაში პანიკა უფრო გაამწვავა.

რამდენიმე დღის წინ, კორონავირუსი დაუდგინდა აფხაზეთის დე ფაქტო პრეზიდენტ ასლან ბჟანიას, რის შემდეგაც კოვიდიდადებითი აღმოჩნდა ე.წ. პრემიერ-მინისტრი ალექსანდრე ანქვაბიც.

აფხაზი ექიმების განცხადებით, ანქვაბი და ბჟანია თვითიზოლაციაში არიან, ისინი თავს კარგად გრძნობენ, ვირუსი იოლ ფორმებში მიმდინარეობს და მათი ჰოსპიტალიზაცია საჭირო არ არის.

"კოვიდპანდემიის პირობებში ხელისუფლებამ შეზღუდვები დააწესა, თუმცა, მოსახლეობის პროტესტი იმდენად დიდი იყო, რომ ნერვებმა უმტყუნათ და სექტემბერში საზღვრები გახსნეს, რუსეთიდან ტურისტებიც მოაწყდნენ. შესაბამისი ანალიზი არც ერთს არ ჰქონდა და შედეგად მივიღეთ, რომ რეგიონში პანდემიამ იფეთქა. ინფიცირებულთა რაოდენობა ყოველდღიურად მატულობს, ახლა თუ გავითვალისწინებთ, ახალი წლისა და შობის დღესასწაულს, უნდა ვივარაუოდოთ, რომ ვითარება ერთი-ორად დამძიმდება", - წერს ekhokavkaza.com-ის ბლოგერი, იზიდა ჭანია, რომლის თქმითაც, ადვილი წარმოსადგენია, რა ხდება აფხაზეთში ამ პირობებში და როგორია ადგილობრივი სამედიცინო სისტემაში არსებული პრობლემები.

ადგილობრივები წერენ, რომ სამედიცინო პერსონალის დიდი ნაწილი ინფიცირებულია, სასწრაფო დახმარების მანქანა ან დიდი დაგვანებით მოდის, ან საერთოდ არ მოდის... ექიმები და ექთნები სამსახურში სიარულს თავს არიდებენ, ტელეფონს არ პასუხობენ ან ინფიციებას იმიზეზებენ და მთელი სირთულე ერთეულების კისერზე გადადის.

აფხაზური მედიის ცნობით, "ხელმძღვანელობამ” უკვე იპოვა გამოსავალი - რუსული ვაქცინა. "პიარის ფარგლებში იმაზეც ლაპარაკობენ, ვითომ პირველ რიგში, პირველი პირები გაიკეთებენ, რაც ისეთივე ზღაპარია, როგორც ის, რომ თურმე პუტინის ქალიშვილი აიცრა", - წერს ერთ-ერთი გამოცემა.

"მსოფლიო საზოგადოება იმაზე ბჭობს, წამყვანი ქვეყნის მიერ მოგონილი "ფაიზერი” რამდენად სანდოა, მით უფრო, რომ სხვადასხვა კვლევების მიხედვით, მისი ეფექტურობის 90%-ზე მაჩვენებლით განისაზღვრა და ჩვენთან "სპუტნიკი" შემოაქვთ, რომელსაც დარწმუნებული ვარ, რუსეთშიც კი ეჭვით უყურებენ და საქმეში გარკვეულ საზოგადოებას მაინც დასავლეთის ქვეყნებისკენ უჭირავს თვალი”, - წერს ინტერნეტმომხმარებელი ანა ლოგია.

"ახლა მიადგებიან ჩვენს საცოდავ, ინტერნეტსამყაროს მოწყვეტილ მოსახლეობას და ვაქცინასაც ჩვენზე გამოცდიან. თუ გაგვიმართლა, დაგვაკვირდებიან, თუ არადა, აქ ხომ ყოველ მეორეს მომსპარი გვაქვს ჯანმრთელობა და რამე დაგვიზიანდა თუ არა, ვინ რას გაიგებს...” - მიაჩნია სოხუმელ იასონ ტუჟბას.

აფხაზი ჟურნალისტის, იზიდა ჭანიას მოსაზრებით, "არსებულ ხელისუფლებას" წინამორბედებისგან ის განასხვავებს, რომ ბჟანია-ანქვაბის გუნდი ბევრად ჩაკეტილია და ცდილობენ, საზოგადოებას მხოლოდ გაცხრილული ინფორმაცია მიაწოდონ.

"ახლახან, შუაღამეს შეუცვივდნენ ნიღბიანი სპეცრაზმელები ერთ-ერთ ოჯახს და სახლის ჩხრეკა შეუდგნენ. სახლის მეპატრონე ქალს, სამი შვილი ჰყავს, მათ შორის, ერთი შშმ პირი. იქაურობა მიანგრ-მოანგრიეს და წავიდნენ. როდესაც ვიკითხეთ, რას ეძებდნენ მარტოხელა ქალის სახლში, განაცხადეს, რომ ფეიკინფორმაციებს ავრცელებენო. ამ ფორმით ებრძვიან კრიმინალს...” - წერს ის.

აფხაზური მედიის ცნობით, დიმიტრი დბარი ნამდვილად ცდილობს ახალი წელი პოზიტიური ინფორმაციით დაიწყოს.

"მან კრიმინალს ბრძოლა გამოუცხადა, მაგრამ სხვა თემაა რა გამოუვა. რამდენიმე დღის წინ ე.წ. კანონიერი ქურდი თემურ ახუბა, იგივე "დინრიდი" აიყვანეს, მაგრამ ჯერჯერობით ხელუხლებელია აფხაზეთში ყველაზე გავლენიანი რაულ ბარცბა. ასე რომ, კითხვები გაჩნდა, "დინრიდის” დაკავება მისი შეკვეთა ხომ არ იყო, რადგან ის გააფთრებული ებრძვის "სოხუმის კლანს”, რადგან გასულ წელს სოხუმის ცენტრში ჩაცხრილული ორი ე.წ. კანონიერი ქურდების, შამბასა და ავიძბას საქმეში ფიგურირებდა. კიდევ ერთი, მისი დაკავება ახალგაზრდა თაობისთვის იმის ჩვენებაა, რომ აფხაზეთში კრიმინალების დრო იწურება, თუმცა, "გუდაუთის კლანი" ხელშეუხებელი რატომ არის, ამაზე პასუხი არ გვაქვს..." - ამბობს ხათუნა დოღუზია.