როდის გაიმართება მოლაპრაკებების მე-5 რაუნდი - რას ამბობენ ხელისუფლებასა და ოპოზიციაში?
ხელისუფლებასა და ოპოზიციას შორის მოხერხდება თუ არა შეთანხმების მიღწევა, ეს საკთხი კვლავ ჰაერშია გამოკიდებული. ფასილიტატორი ელჩების მონაწილეობით მოლაპარაკების მე-5 რაუნდის გამართვა არა და არ მოხერხდა დღემდე.
"ქართული ოცნების" წევრის, პარლამენტის საგარეო ურთიერთობათა კომიტეტის თავმჯდომარის ნიკოლოზ სამხარაძის ვარაუდით, ხელისუფლებასა და ოპოზიციას შორის მორიგი რაუნდი ამ კვირაში გაიმართება.
როგორც მან ჟურნალისტებთან აღნიშნა, შეთანხმების სივრცე არსებობს, რადგან ძალიან ბევრმა პარტიამ განაცხადა, რომ რევოლუციურ და ძალადობრივ სცენარს ემიჯნებიან.
"ვფიქრობ, მომავალ კვირაში მოლაპარაკებები შედგება. ზუსტ თარიღს დღეს ვერ გეტყვით, რადგან როგორც იცით, ელჩები აორგანიზებენ და შესაბამისად, მათი პრეროგატივაა, როდის ჩანიშნავენ შეხვედრას. თუმცა, ვფიქრობ, შეთანხმების სივრცე არსებობს. უკვე ძალიან ბევრმა პარტიამ განაცხადა, რომ ისინი ემიჯნებიან რევოლუციურ და ძალადობრივ სცენარს, რაც ძალიან კარგია. რეალურად ორი დესტრუქციული პარტია დარჩა, რომელიც ამ ძალადობრივ სცენარს აანონსებს. იმ ჯანსაღ ოპოზიციურ პოლიტიკურ პარტიებთან, რომლებსაც ქვეყანაში მშვიდობა და სტაბილური ვითარება სურთ, შეთანხმების სივრცე არის. იმედი მაქვს, რომ ეს საბოლოო რაუნდიც შეჯერებული ტექსტით დასრულდება“, - განაცხადა სამხარაძემ.
სტრატეგია აღმაშენებლის“ ერთ-ერთი ლიდერის, სერგო ჩიხლაძის განცხადებითაც, მეხუთე რაუნდი სავარაუდოდ, მიმდინარე კვირაში შედგება, თუმცა ზუსტი დრო ჯერჯერობით უცნობია.
"ჩვენ დასავლელი პარტიორების მხრიდან ხელისუფლებისადმი საკმაოდ მკვეთრი გზავნილი დავინახეთ. შეგახსენებთ ევროკავშირის ელჩის, ამერიკელი სენატორების განცხადებას ბატონი კობახიძის დაანონსებულ ინიციატივებთან დაკავშირებით. ასევე, გუშინ ჩვენ მოვისმინეთ "ქართული ოცნების“ წარმომადგელების განცხადება, რომ ამ კვირაში სავარაუდოდ, ისინი მზად იქნებიან მოლაპარაკებებისთვის. შესაბამისად, დროის შეთანხმდება და მორიგი რაუნდი შედგება“ - განაცხადა ჩიხლაძემ.
„ერთიანი ნაციონალური მოძრაობის“ პოლიტიკური საბჭოს წევრის ზაალ უდუმაშვილის განცხადებით, ბოლო დღეების განმავლობაში ხელისუფლების მხრიდან გაკეთებული განცხადებები და ინიცირებული კანონპროექტები მოლაპარაკებების პროცესში უმძიმეს ფონს ქმნის. თუმცა, როგორც მან ჟურნალისტებს განუცხადა, ოპოზიცია მზად არის მოლაპარაკებისთვის, რათა ვადამდელ არჩევნებთან დაკავშირებით ხელისუფლების საბოლოო პოზიცია მოისმინოს.
ცნობისთვის, კანონპროექტების პაკეტი, რომლის მიხედვითაც, პარტიას, რომელსაც საპარლამენტო მანდატები შეუწყდება, ან რომელიც საპარლამენტო მუშაობაში არ ჩაერთვება, სახელმწიფო დაფინანსება შეუწყდება, ბიუროს დღეს წარედგინება. ცვლილებები „პოლიტიკური გაერთიანებების შესახებ“ კანონში შედის. კანონპროექტების მიხედვით, იგივე პარტიები ვერ ისარგებლებენ მუნიციპალური და საპარლამენტო არჩევნებისთვის განკუთვნილი უფასო საეთერო დროით.
"ინფიცირებულთა რაოდენობის შემცირების ტენდენციაა, მაგრამ არა ძალიან მნიშვნელოვანი" - გამყრელიძე და თურნავა საზოგადოებას რეკომენდაციების დაცვისკენ მოუწოდებენ
LIVE - ეთერშია გადაცემა "პოლიტNEWS"
