ყოველ 100 ათას კაცზე გაანგარიშებით, კოვიდინფიცირებულთა რაოდენობის მიხედვით, საქართველო მსოფლიოში პირველ ადგილზეა - "ნიუ იორკ თაიმსი"

კორონავირუსის გამოვლენიდან დღემდე მსოფლიოში ინფიცირებულთა საერთო რაედონებამ 67 მილიონს გადააჭარბა და ამ დროის მონაცემებით, ინფიცირებულთა შორის გარდაცვლილია 1,5 მილიონზე მეტი პაციენტი.

“ნიუ იორკ თაიმსი“ აქვეყნებს სტატისტიკურ მონაცემებს, რომლის თანახმადაც, კორონავირუსით ინფიცირებულთა რაოდენობის მიხედვით, ყოველ 100 ათას კაცზე გაანგარიშებით, ყველაზე უფრო დაინფიცირებული ქვეყნებია ჩამოთვლილი.

გამოცემის ცნობით, აღნიშნული სტატისტიკა ეყრდობა ბოლო ერთი კვირის მონაცემებს და ის გამოქვეყნებულია 7 დეკემბერს.

ამ მონაცემების მიხედვით, ყველაზე უფრო მეტად ინფიცირებულ ქვეყნებს შორის საქართველო არის პირველ ადგილზე, სადაც ყოველ 100 000 მოსახლეზე საშუალოდ, 115,3 ინფიცირებული მოდის, მეორე ადგილზე სერბეთია - 100 000 ადამიანზე 103,2 ინფიცირებულით. შემდეგ პოზიციას იკავებენ სან მარინო, ლუქსემბურგი, ხორვატია, მონტენეგრო, ბელიზე, ლიეტუვა, სლოვენია.

სტატისტიკურ მონაცემებში ასევე აღნიშნულია, რომ საქართველოში საშუალოდ დღის განმავლობაში კორონავირუსის 4 301 ახალი შემთხვევა ვლინდება. ცნობისთვის, ჩვენს ქვეყანაში ბოლო 24 საათში კორონავირუსის 4 673 ახალი შემთხვევა გამოვლინდა. საერთო ჯამში კი ვირუსის პირველი შემთხვევის გამოვლენიდან დღემდე საქართველოში Covid-19-ის 169 649 შემთხვევაა აღწერილი, რომელთა შორისაც 1 576 პაციენტი გარდაიცვალა, ხოლო 141 392 გამოჯანმრთელდა. ამ დროისთვის ქვეყანაში კორონავირუსის 26 655 აქტიური შემთხვევაა.