"გარდაცვალება ფილტვის მძიმე დაზიანებას უკავშირდება" - რას ამბობს თამარ გაბუნია 31 წლის ქალზე, რომელიც კოვიდით მშობიარობიდან ერთ კვირაში გარდაიცვალა

ჯანდაცვის მინისტრის მოადგილის, თამარ გაბუნიას განცხადებით, ბათუმში, კორონავირუსით გარდაცვლილ 31 წლის ქალს სხვა თანმდევი დაავადებები არ ჰქონია. როგორც გაბუნიამ აღნიშნა, ინფიცირებული ფილტვის დაზიანებით გარდაიცვალა.

მისივე ინფორმაციით, გარდაცვალების ყველა შემთხვევას შესაბამისი სამსახურები სწავლობენ.

"ჯანდაცვის სამინსიტრო ყველა შემთხვევას სწავლობს, აუდიტის ჯგუფი მუშაობს სპეციალურად, ასევე რეგულირების სააგენტო თავისი კომპეტენციის ფარგლებში შეისწავლის გარდაცვალების ყველა შემთვევას, აუდიტი შეისწავლის საყურადღებო შემთხვეევებს. ძალიან სამწუხაროა, ასეთ მდგომარეობაში გარდაცვალება, მხედველობაში მაქვს ორსულობა და დედის დანაკარგი არის დიდი ტრაგედია, ამ შემთხვევაში განსაკუთრებით რთულია მდგომარეობა. ინფორმაცია, რომელიც ჩვენ კლინიკიდან გვაქვს არის ის, რომ ის ეტაპები, რომლებიც გაიარა პაციენტმა, რეალურად არის პროტოკოლით გათვალისწინებული. უფრო ჩაღრმავებულ ანალიზს, რა თქმა უნდა, გავაკეთებთ. გარდაცვალება უკავშირდება ფილტვის მძიმე დაზიანებას. ქალბატონს თანმხლები დაავადებები ან რაიმე სხვა მიზეზი, რასაც შესაძლოა გამოეწვია მდგომარეობის გართულება, არ უფიქსირდება“, - განაცხადა გაბუნიამ.

რაც შეეხება გავრცელებულ ინფორმაციას იმის შესახებ, რომ კლინიკებში პაციენტებს სათანადოდ არ ეპყრობიან, გაბუნია აცხადებს, რომ მსგავს ინფორმაციებს დადასტურება სჭირდება.

"ინფორმაცია სხვადასხვა ვრცელდება, მას სჭირდება დადასტურება. პრევენციულად სრულიად გამორიცხულია ასეთი ტიპის შეუფერებელი დამოკიდებულება პაციენტთან და ბევრი სხვადასხვა ტიპის მონიტორინგი ტარდება საავადმყოფოებში იმისთვის, რომ მსგავსი შეემთხვევები არ იყოს. ინფორმაცია, რომელიც ვრცელდება, ექვემდებარება გადამოწმებას. იმაზე, რაც ზოგადად ხდება და ზოგჯერ შეიძლება იყოს აბსოლუტურად დაუჯერებელი რამ გაჟღერებული, სამინისტროს ყოველთვის აქვს რეაგირება, მიუხედავად იმისა, რამდენად დაუჯერებელი ან გადაუმოწმებელია ბრალდება. იმიტომ არის ეს სამსახურები, რომ მსგავსი ტიპის ინფორმაცია გადამოწმდეს და გვქონდეს შესაფერისი რეაგირება“, - განაცხადა გაბუნიამ.

ცნობისთვის, ბათუმში კორონავირუსით ინფიცირებული 31 წლის რუსუდან კოკობინაძე გარდაიცვალა, იგი კლინიკა "მედინაში" მკურნალობდა. როგორც კლინიკაში აცხადებენ, პაციენტმა ერთი კვირის წინ ბათუმის სამშობიარო სახლში საკეისრო კვეთის შედეგად იმშობიარა, შემდეგ მისი მდგომარეობა დამძიმდა და რამდენიმე დღის შემდეგ კლინიკა "მედინაში" მოათავსეს.