ობამა, ბუში და კლინტონი კოვიდ-19-ის საწინააღმდეგო ვაქცინას პირდაპირ ეთერში გაიკეთებენ - "მე ვენდობი მეცნიერებას“
აშშ-ის ყოფილი პრეზიდენტები ბარაკ ობამა, ჯორჯ ბუში და ბილ კლინტონი აცხადებენ, რომ ისინი მზად არიან კორონავირუსის საწინააღმდეგო ვაქცინა საჯაროდ, პირდაპირ ეთერში გაიკეთონ, რათა აამაღლონ ვაქცინის უსაფრთხოებისა და ეფექტურობისადმი საზოგადოების ნდობა. ამის შესახებ CNN წერს.
გამოცემის ცნობით, ყოფილი პრეზიდენტები იმედოვნებენ, ამგვარი კამპანია ძლიერი მესიჯი იქნება და ისინი ამერიკის ჯანდაცვის სისტემის წარმომადგენლებთან ერთად შეძლებენ დაარწმუნონ ამერიკელები ვაქცინის ეფექტურობასა და უსაფრთხოებაში.
შეერთებული შტატების 43-ე პრეზიდენტის, ჯორჯ ბუშის წარმომადგენელი, ფრედი ფორდი ამბობს, რომ ბუში დაუკავშირდა ამერიკის ალერგიული და ინფექციური დაავადებების ეროვნული ინსტიტუტის ხელმძღვანელს, ენტონი ფაუჩის და გამოთქვა სურვილი, რომ ვაქცინის უსაფრთხოებისა და ეფექტურობისადმი მიძღვნილ კამპანიაში ჩართულიყო.
"ის მზად არის გააკეთოს ყველაფერი ამერიკელებისთვის. პირველ რიგში, საჭიროა დაინახოს საზოგადოებამ, რომ ვაქცინა უსაფრთხოა. პრეზიდენტი ბუში ამას სიამოვნებით გააკეთებს კამერების წინ“, - ამბობს ფრედი ფორდი.
ბილ კლინტონის პრეს-მდივანიც CNN-თან აცხადებს, რომ ბილსაც სურს ვაქცინა გაიკეთოს საჯაროდ და დაანახოს საზოგადოებას მისი უსაფრთხოება.
"როდესაც შესაძლებლობა იქნება, პრეზიდენტი კლინტონი მას გაიკეთებს და ამას გააკეთებს საჯაროდ, რათა დაარწმუნოს ამერიკელები, რომ მის მსგავსად მოიქცნენ“, - აცხადებენ კლინტონის პრესსამსახურში.
რაც შეეხება ბარაკ ობამას, SiriusXM-თან ინტერვიუში მან თქვა, რომ თუ ენტონი ფაუჩი იტყვის, რომ კორონავირუსის საწინააღმდეგო ვაქცინა უსაფრთხოა, ის დაუჯერებს ფაუჩის.
"ისეთ ადამიანს, როგორიც ენტონი ფაუჩია, მე სრულად ვენდობი, ამიტომ, თუ ენტონი ფაუჩი მეტყვის მე, რომ ეს ვაქცინა არის უსაფრთხო და შესაძლებელია ვაქცინაცია, რომ გავხდები იმუნური კოვიდთან, მე ვაქცინას გავიკეთებ. შესაძლოა, ეს გავაკეთო სატელევიზიო ეთერში...მე ვენდობი მეცნიერებას“, - ამბობს ობამა.
ცნობისთვის, აშშ-ში კორონავირუსის საწინააღმდეგო ვაქცინის ავტორიზაციის პროცესი უკვე მიმდინაროებს.
"ხელოვნური ინტელექტი სახელმწიფოს მეთაური ვერ გახდება, რადგან მას გული, სული და სინდისი არ გააჩნია" - პუტინი
"ინაუგურაციაზე საზოგადოებას ვთხოვ, 100 დღე პირბადე ატარონ" - ჯო ბაიდენი მზადაა კოვიდ-19-ის საწინააღმდეგო ვაქცინაცია საჯაროდ ჩაიტაროს
