როგორია ეპიდემიოლოგიური ვითარება საქართველოს მეზობელ ქვეყნებში - სად არის ინფიცირების ყველაზე მაღალი მაჩვენებელი და სად შეინიშნება კლების ტენდენცია

მსოფლიოს ქვეყნების უმეტესობა კორონავირუსის პანდემიის მეორე ტალღას ებრძვის, რომელიც პირველ ტალღაზე უფრო რთული აღმოჩნდა. ინფიცირების მაჩვენებლები ყოველდღიურად რეკორდულად იზრდება. ადამიანები კი ვირუსის გავრცელების პრევენციისთვის დაწესებული შეზღუდვების პირობებში ცხოვრობენ.

ინფიცირებულთა რიცხვი იზრდება საქართველოს მეზობელ ქვეყნებშიც. აღსანიშნავია, რომ კორონავირუსით ინფიცირებულთა საერთო რაოდენობის მიხედვით, საქართველოს მეზობელი ქვეყნებიდან მხოლოდ რუსეთი და თურქეთი უსწრებს.

ვნახოთ, როგორია ამ დროისთვის ეპიდემიოლოგიური ვითარება სომხეთში, აზერბაიჯანში, რუსეთსა და თურქეთში:

სომხეთი

სომხეთში, საერთო ჯამში, კორონავირუსის 135 124 შემთხვევაა გამოვლენილი და ამ მაჩვენებლით ის მსოფლიოს 52-ე ქვეყანაა. პაციენტთა შორის 2 164 გარდაიცვალა, ხოლო 108 442 გამოჯანმრთელდა. ამჟამად ქვეყანაში კორონავირუსის 24 515 აქტიური შემთხვევაა. ინფიცირების ბოლო სამი დღის მაჩვენებელი ასეთია:

• 27 ნოემბერი - 1 476 შემთხვევა
• 28 ნოემბერი - 1 248 შემთხვევა
• 29 ნოემბერი - 1 174 შემთხვევა

აღსანიშნავია, რომ სხვა მეზობელი ქვეყნებისგან განსხვავებით, სომხეთში ინფიცირებულთა ყოველდღიური მაჩვენებლის კლების ტენდენცია შეინიშნება.

აზერბაიჯანი

აზერბაიჯანში კორონავირუსის გამოვლენიდან ამ დრომდე 118 195 დადასტურებული შემთხვევაა აღწერილი, რომელთა შორისაც 1 361 პაციენტი გარდაიცვალა, ხოლო 73 676 პაციენტი გამოჯანმრთელდა. ინფიცირებულთა საერთო რაოდენობის მიხედვით აზერბაიჯანი მსოფლიოს 59-ე ქვეყანაა. ამ დროისთვის იქ კორონავირუსის 43 158 აქტიური შემთხვევაა. ბოლო სამი დღის სტატისტიკური მონაცემები კი ასეთია:

• 27 ნოემბერი - 3 712 ახალი შემთხვევა
• 28 ნოემბერი - 4 212 შემთხვევა
• 29 ნოემბერი - 4 120 შემთხვევა.

რუსეთი

რუსეთში კორონავირუსის გამოვლენის პირველი დღიდან ამ დრომდე, ოფიციალური მონაცემების მიხედვით, 2,3 მილიონი შემთხვევაა გამოვლენილი და ამ მაჩვენებლით ის მსოფლიოს მეოთხე ქვეყანაა. რაც შეეხება ბოლოდროინდელ ეპიდემიოლოგიურ ვითარებას, ბოლო სამი დღის ყოველდღიური ინფიცირების მაჩვენებელი ასეთია:

• 27 ნოემბერი - 27 543 ახალი შემთხვევა
• 28 ნოემბერი - 27 100 შემთხვევა
• 29 ნოემბერი - 26 693 შემთხვევა

რუსეთში კორონავირუსით, საერთო ჯამში, 39 895 პაციენტი გარდაიცვალა, ხოლო 1,7 მილიონი გამოჯანმრთელდა. ამ დროისთვის ქვეყანაში ვირუსის 468 332 აქტიური შემთხვევაა.

თურქეთი

თურქეთში სულ კორონავირუსის 607 628 შემთხვევაა აღწერილი და ამ მაჩვენებლით ის მსოფლიოს მე-18 ქვეყანაა. პაციენტთა შორის 13 558 გარდაიცვალა, ხოლო 400 242 გამოჯანმრთელდა. ქვეყანაში ახლა 193 828 აქტიური შემთხვევაა. ბოლო 3 დღის ინფიცირების მაჩვენებელი კი ასე გამოიყურება:

• 27 ნოემბერი - 29 845 შემთხვევა
• 28 ნოემბერი - 30 103 შემთხვევა
• 29 ნოემბერი - 29 281 შემთხვევა.

საქართველო

რაც შეეხება საქართველოს, ვირუსის გამოვლენის პირველი დღიდან ამ დრომდე კორონავირუსის 135 584 შემთხვევაა აღწერილი და ამ მაჩვენებლით მსოფლიოს რუკაზე ჩვენი ქვეყანა 51-ე პოზიციაზეა. პაციენტთა შორის გარდაიცვალა 1 267, ხოლო გამოჯანმრთელდა 113 986, ამ დროისთვის საქართველოში კორონავირუსის 20 331 აქტიური შემთხვევაა.