"შესაძლოა, სიკვდილის მიზეზად COVID-19 გამოაცხადონ... თუმცა აქ სულ ასეა - ან კლავენ, ან თავს იკლავენ" - რა ვერსიებია სომხეთში რუსი სამხედროს გარდაცვალებაზე?

სომხეთში, გიუმრის ბაზაზე, რუსეთის შეიარაღებული ძალების კიდევ ერთი სამხედრო კონტრაქტორი იპოვეს გარდაცვლილი. რუსული გამოცემების ცნობით, ის ბაზის ნაწილზე, მის დროებით საცხოვრებელში იყო მოკლული.

რუსეთის სამხედრო ბაზაზე არსებული კომისიის ინფორმაციით, ადგილობრივმა სამხედრო კომისიამ, გამოძიება სამართალდამცველებთან ერთად დაიწყო. უწყების ცნობით, "გარდაცვლილ სამხედროს ფიზიკური ძალადობის ნიშნები არ აქვს".

თუმცა, ამის არ სჯერათ ადგილობრივებს. მათივე თქმით, სამხედრო პირი ან მოკლეს, ან თვითმკვლელობამდე მიიყვანეს, რადგან მსგავსი შემთხვევები ბაზაზე არაერთია.

მათი ცნობით, გიუმრის ბაზაზე მყოფ რუს სამხედროებს უმძიმეს პირობეში უწევთ ყოფნა, რაც გულისხმობს - შიმშილს, სიცივეს, ანტისანიტარიას, სისხლიან გარჩევებს, რაც ხშირად ფატალური შედეგებით სრულდება. ადგილობრივი პერსონალი, ვინც ბაზაზე მუშაობს, სამხედრო ნაწილებში არსებულ პრობლემებზე, სამხედროებს შორის მუდმივ დაპირისპირებაზე საუბრობს, რომელიც წლებია არ იცვლება.

როგორც ისინი ამბობენ, ზოგჯერ ბაზაზე სროლებიც ისმის, შემდეგ კი საქმეში სამხედრო კომისარიატი ერევა.

"რამდენიმე დღის წინ, კიდევ ერთი მოკლული რუსი სამხედრო იპოვეს აფხაზეთში... რატომღაც მათ ყველგან კლავენ... არადა, მშვიდობისმყოფელები არიან, ყოველ შემთხვევაში, სხვა ქვეყნის ტერიტორიაზე ამ სტატუსით შემოდიან..." - წერს სერგი საჟინი.

"ამ ბაზაზე, სულ ასეთი ამბები ხდება, ან კლავენ ან თავს იკლავენ... ეს პირველი შემთხვევა კი არ არის, ზოგიერთი შემთხვევის შესახებ არც კი ხდება ცნობილი, თუ მედიამ ან ოჯახმა არ ატეხვა ხმაური სოციალურ ქსელებში. სადღაც კამჩატკიდან ჩამოყვანილი ჯარისკაცი შეიძლება ცემით მოკლან, იმიტომ, რომ ვიღაცის ბრძანება არ შეასრულა - ფული, სიგარეტი ან დასალევი ვერ იშოვა, შესაბამისად, მას სჯიან... ასე რომ, შესაძლოა, ახლა 36 წლის სამხედრო კონტრაქტორის სიკვდილის მიზეზად COVID-19 გამოაცხადონ. ვიცი, რომ ამ ინფიცირების მხრივ ბაზაზე მძიმე ვითარებაა..." - ამბობს AMBEBI.GE - სთან საუბარში ერევნელი ჰარეტ ქოჩარიანი, რომლის თქმითაც, გიუმრის მოსახლეობა შეჩვეულია ქუჩაში მოწანწალე რუს სამხედროებს, რომლებიც ხან რას ითხოვენ, ხან რას...

kavkaz-uzel.eu-ს ცნობით, ეს პირველი შემთხვევა არ არის, როდესაც სომხეთში არსებულ 102 სამხედრო ბაზაზე რუსი სამხედრო გაურკვეველ მდგომარეობაში გარდაცვლილი იპოვეს. მიმდინარე წლის ივლისში, ამავე ბაზაზე 20 წლის რუსი სამხედრო კონტრაქტორის ცხედარი იპოვეს, რომელსაც თან ჰქონდა წერილი. მაშინ საქმე თვითმკვლელობამდე მიყვანის მუხლით აღიძრა. სომხეთში, რუსი სამხედროების მხრიდან ადგილობრივების მიმართ ძალადობრივი ქმედებებიც არაერთხელ გამოვლინდა.

2018 წელს, ბაზის დასუფთავების სამსახურის თანამშრომელი, 57 წლის გიუმრელი, ჯულიეტა გუკასიანი, რუსმა სამხედრომ სასიკვდილოდ სცემა. მოგვიანებით ის საავადმყოფოში გარდაიცვალა. ამ ფაქტზე, სომეხმა სამართალდამცველებმა რუსი სამხედრო დააკავეს, რომელიც შემდეგ ადგილობრივების პროტესტის მიუხედავად, რუსეთს გადასცეს.

უფრო ადრე, 2015 წელს, რუსი ჯარისკაცი ვალერი პერმიაკოვი, გიუმრიში, გამთენიას ავეტისიანიების ოჯახში შევარდა და ავტომატური ცეცხლსასროლი იარაღით, ოჯახის შვიდი წევრი ამოხოცა. ადგილობრივი მოსახლეობა მაშინაც ითხოვდა, რომ პერმიაკოვი სომხეთში გაესამართლებინათ, თუმცა, ის რუსეთს გადასცეს, რასაც ქალაქში მასობრივი საპროტესტო გამოსვლები მოჰყვა - ქალაქის მოსახლეობა ქვეყნიდან რუსული ბაზების გაყვანას ითხოვდა, ეს მოთხოვნა სომხეთში პერიოდულად აქტიურდება.

ადგილობრივების თქმით, ამ ეტაპზე ეს მოთხოვნა განსაკუთრებით უსუსურად გამოიყურება. 2013 წელს გიუმრის სატანკო პოლიგონზე, მიმდებარე სოფლის სამი მკვიდრი ნაღმზე აფეთქდა.

რუსული მედიის ცნობით, "ადგილობრივმა მამა-შვილმა, მიწაში ჩაფლული რაღაც მეტალის ნივთი იპოვეს, რისი ამოთხრაც დაიწყეს, რა დროსაც აფეთქდა და სამივე მათგანი დაიღუპა...".

უფრო ადრე, 2003 წელს, გიუმრის ბაზაზე, რამდენიმე შეიარაღებული ადგილობრივი შევარდა, ორმხრივი ცეცხლის შემდეგ, მათი ადგილზე ლიკვიდაცია მოხდა.