რამდენი თავისუფალი საწოლია კოვიდპაციენტებისთვის და იგეგმება თუ არა საველე ჰოსპიტლების მოწყობა

ჯანდაცვის მინისტრის, ეკატერინე ტიკარაძის განცხადებით, კორონავირუსის მართვისთვის ამ დროისთვის 7363 საწოლია მობილიზებული. როგორც მათ მთავრობის ადმინისტრაციაში გამართულ ბრიფინგზე განაცხადა, კლინიკებში მკურნალობა ბოლო 24 საათის განმავლობაში 817-მა პაციენტმა დაასრულა.

„საწოლფონდი არის შემდეგი ყველაზე მტკივნეული და კრიტიკული თემა, რომელზეც ხშირად ისმის კითხვები საზოგადოებისგან. ამ ეტაპისთვის ჩვენ გვაქვს მობილიზებული 7363 საწოლი, საიდანაც აქტიურად კოვიდისთვის გამოყენებულია 5952, განთავსებულია 5741 პაციენტი, ტრიაჟში გადასანაწილებლად სასტუმროში გადავა პაციენტი, კლინიკაში დარჩება თუ ბინაზე გაივლის მკურნალობას, ამ ეტაპისთვის კლინიკაში იმყოფება 231 პაციენტი, ხოლო აქტიური საწოლი გვაქვს 279. გუშინ, 24 საათის განმავლობაში, კლინიკებში მკურნალობა დაასრულდა 817-მა პაციენტმა“, - განაცხადა ტიკარაძემ.

მისივე თქმით, დღეს საქართველოში შექმნილი ეპიდემიოლოგიური ვითარებიდან გამოსავალი რამდენიმეა, თუმცა პირველი გამოსავალი პრევენციული ღონისძიებების გატარებაა.

„გამოსავალი არის რამდენიმე, ვინაიდან ჯანდაცვა არის საკმაოდ კომპლექსური სფერო. პირველი გამოსავალი, რასაც ხშირად მთავრობას გვსაყვედურებენ ხოლმე, ეს არის საწოლფონდის მობილიზაცია, რამდენად დროულად და სწრაფად ხდება და აქ მე შეგახსენებთ, რომ მაშინ როდესაც ჯანდაცვის სამინისტრომ დააფიქსირა თუ რა შედეგები შეიძლებოდა მოყოლოდა იმ ქუჩაში გამართულ აქციებს, ჩვენ დროულად მოვახდინეთ მობილიზება დამატებითი საწოლფონდის და თუ ჩვენ ოქტომბრის თვეში მობილიზებული გვქონდა მხოლოდ 3300 საწოლი, დღეის მდგომარეობით ჩვენ უკვე გვაქვს 7000 საწოლამდე მობილიზებული, რითაც რა თქმა უნდა ჩვენ ვცდილობთ, ვმართოთ ნაკადები და ჩვენს ყველა მოქალაქეს გაეწიოს სამედიცინო მომსახურება.

ჩვენ ოქტომბერში საწოლფონდზე საშუალო დაყოვნება გვქონდა 8,52 და ინტენსიურ საწოლზე 10,25 დღე, ხოლო სამინისტროს აქტიური ჩართულობით ახლა ჩვენ დაყოვნება გვაქვს თერაპიულ საწოლზე 5,72 დღე, ხოლო კრიტიკულ საწოლზე 8,59 დღე რაც, რა თქმა უნდა, ხელმისაწვდომობას იმ პაციენტებისთვის ვისაც ესაჭიროება ჰოსპიტალში მკურნალობა, მეტად უფრო მისაღებს ხდის. ასევე მნიშვნელოვანია, რომ ჩვენ ყოველდღიურ ჭრილში ვუყურებთ თუ რა დატვირთულობაა რომელ საწოლზე და შესაბამისად იმის მიხედვით ვანაწილებთ საწოლფონდს და ვაუმჯობესებთ საწოლფონდის მოცვას რეგიონების მიხედვით, რა საჭიროებასაც ჩვენ ვხედავთ.

გარდა ამისა, პირველი მაინც რჩება ის, რომ ჩვენ მივმართოთ პრევენციულ ღონისძიებას ვინაიდან არამხოლოდ საქართველო, არამედ ბევრი წარმატებული ქვეყანა მხოლოდ საწოლფონდის გაზრდით და მხოლოდ სამედიცინო სფეროზე ზეწოლით ვერ ახდენს ინფექციასთან ეფექტურ ბრძოლას - ჯანდაცვის სფეროში პრევენციას გაცილებით უფრო დიდი წონა აქვს, ვიდრე დამდგარი შედეგის მკურნალობას”, - განაცხადა ტიკარაძემ.

ჯანდაცვის მინისტრის განცხადებით, საველე ჰოსპიტლების გამოყენება არ განიხილება. როგორც მინისტრმა მთავრობის უწყებათაშორისი საკოორდინაციო საბჭოს სხდომის შემდეგ საკითხის კომენტირებისას აღნიშნა, ამ ეტაპზე ხდება ჩვეულებრივი ჰოსპიტლების და სასტუმროების გამოყენება და ამასთან, იგეგმება დამატებითი ჰოსპიტლების ჩართვა პროცესში.

„საველე ჰოსპიტლებს არ განვიხილავთ, ვინაიდან გვაქვს მრავალი ქვეყნის მაგალითი, სადაც საველე ჰოსპიტლების მობილიზაცია მოხდა, მაგრამ შემდეგ იქ არცერთი პაციენტის მკურნალობა არ მოხდა. არის მხოლოდ რამდენიმე ქვეყანა, სადაც საველე ჰოსპიტლები საუკეთესოდ გამოიყენეს, მაგრამ აქ გასათვალისწინებელია ქვეყნის რესურსი. ჩვენ გვაქვს ჰოსპიტლები, სასტუმროები და კიდევ ვამატებთ დამატებით ჰოსპიტლებს, რომ ეს ყველაფერი საჭირო არ გახდეს“, - აღნიშნა ტიკარაძემ.