ოკუპირებული ცხინვალიდან საავადმყოფოში ტრანსპორტირებისას მამაკაცი გარდაიცვალა - "საოკუპაციო რეჟიმის გულგრილმა დამოკიდებულებამ მორიგი ადამიანი იმსხვერპლა"
შერიგებისა და სამოქალაქო თანასწორობის საკითხებში სახელმწიფო მინისტრის აპარატი განცხადებას ავრცელებს.სადაც აღნიშნულია, რომ საოკუპაციო რეჟიმის გულგრილმა დამოკიდებულებამ მორიგი ადამიანის სიცოცხლე იმსხვერპლა.
როგორც განცხადებაში ვკითხულობთ, შერიგებისა და სამოქალაქო თანასწორობის საკითხებში სახელმწიფო მინისტრის აპარატი სხვა უწყებებთან ერთად, აგრძელებს ძალისხმევას იმისთვის, რომ მოსახლეობას საოკუპაციო ხაზს მიღმა ხელი არ შეეშალოს კრიტიკულად საჭირო დახმარების მიღებაში. ამ მიზნით, უწყება საერთაშორისო ორგანიზაციებს და პარტნიორებს მოუწოდებს, საოკუპაციო რეჟიმზე ზეწოლა გააძლიერონ.
"სამძიმარს ვუცხადებთ გარდაცვლილი ონისე გათენაშვილის ოჯახს. 14 ნოემბერს "წითელი ჯვრის'' ჩართულობით, ოკუპირებული ცხინვალის რეგიონიდან, ე.წ. ერგნეთის გადასასვლელის გავლით, სამკურნალოდ გადმოიყვანეს ოკუპირებულ ახალგორში მცხოვრები ონისე გათენაშვილი, რომელიც კლინიკაში ტრანსპორტირებისას გარდაიცვალა.
საქართველოს ცენტრალურმა ხელისუფლებამ "წითელი ჯვრისგან'' სამედიცინო ევაკუაციის მომზადების შესახებ ინფორმაციის მიღებისთანავე, დაუყოვნებლივ განახორციელა ევაკუაციისთვის საჭირო პროცედურები. აღსანიშნავია, რომ პაციენტი იმყოფებოდა უკიდურესად მძიმე მდგომარეობაში და გარდაიცვალა სასწრაფო სამედიცინო დახმარების მანქანაში.
ოკუპირებული ახალგორი ერთ წელზე მეტია ჩაკეტილია. ე.წ. გადასასვლელი პუნქტების გაუქმებამ უკვე 16 ადამიანის სიცოცხლე იმსხვერპლა. ოკუპანტები მოქალაქეებს საქართველოს კონტროლირებად ტერიტორიაზე გადმოსვლის საშუალებას არ აძლევენ, რაც მათ კრიტიკულად მნიშვნელოვან ჯანდაცვის სერვისებზე წვდომას უზღუდავთ. შერიგებისა და სამოქალაქო თანასწორობის საკითხებში სახელმწიფო მინისტრის აპარატი საქართველოს სხვა შესაბამის უწყებებთან ერთად, აგრძელებს ძალისხმევას იმისთვის, რომ მოსახლეობას საოკუპაციო ხაზს მიღმა შეუმსუბუქდეს არსებული მძიმე მდგომარეობა, მიეცეს თავისუფალი გადაადგილების უფლება და ხელი არ შეეშალოს კრიტიკულად საჭირო დახმარების მიღებაში. ამ მიზნით, მოვუწოდებთ საერთაშორისო ორგანიზაციებს და პარტნიორებს გააძლიერონ ზეწოლა საოკუპაციო რეჟიმზე,“- აღნიშნულია განცხადებაში.
შეზღუდვები, რომლებიც 1-ელი თებერვლიდან მოიხსნება - როგორ იმუშავებს ტრანსპორტი და რომელი ობიექტები გაიხსნება
„ტოიოტა ცენტრ თბილისის“ სპეციალური შეთავაზებებით სარგებლობა კვლავ შესაძლებელია
