ხელისუფლებისა და ოპოზიციის მოლაპარაკებათა მეორე რაუნდის შედეგები - რა მოლოდინი აქვთ ექსპერტებს და რას ურჩევენ მხარეებს

ხელისუფლება ორ ნაწილადაა გაყოფილი, ერთი ნაწილი - კონსტრუქციულ განცხადებებს აკეთებს, იგივე თალაკვაძე და გახარია და მეორე ფრთა ე.წ. ომის პარტია - კალაძე, მდინარაძე და კობახიძე ქართული პოლიტიკის კორიდაზე მუდმივად წითელ ნაჭერს აფრიალებენ, - ამის შესახებ ექსპერტმა გია ხუხაშვილმა „ინტერპრესნიუსთან“ ხელისუფლებისა და ოპოზიციის მოლაპარაკებებთან დაკავშირებით განაცხადა.

მისივე თქმით, სრულფასოვანი შეთანხმება, რომ შედგეს, ორივე მხარემ რაღაც უნდა დათმოს და გადაწყვეტილება სადღაც შუაში უნდა იყოს და არა რომელიმე მხარის სასარგებლოდ.

„სამწუხაროდ, ორივე მხარის პოზიცია ხისტია და შესაბამისად, როგორც ტრადიციულად ხდება საქართველოში, იმდენად დიალოგთან არა გვაქვს საქმე, რამდენადაც ორ მონოლოგთან. ნიუანსია ის, რომ ხელისუფლება, თითქოს ორ ნაწილადაა გაყოფილი, ერთი ნაწილი - კონსტრუქციულ განცხადებებს აკეთებს, იგივე თალაკვაძე და გახარია და მეორე ფრთა ე.წ. ომის პარტია - კალაძე, მდინარაძე და კობახიძე ქართული პოლიტიკის კორიდაზე მუდმივად წითელ ნაჭერს აფრიალებენ. ასეთი ვითარებაა, ასე რომ როგორც ხდება ყოველთვის, დიალოგისა და კონსენსუსის ძიების არანაირი პოტენციალი მხარეებს არა აქვთ. ორივე კუნთებზე იყურება, ძალით უნდა გადატეხვა, თავის გზას აცხადებს ერთადერთ მისაღებად და ერთმანეთს შუბლით ეტაკებიან. ერთადერთი ინსტრუმენტი, ისევე როგორც ყოველთვის მხარეებზე ჩვენი უცხოელი პარტნიორების ზეწოლაა, რომ კეთილი ინებონ და სახელმწიფოებრივად იაზროვნონ და ორივემ რაღაც დათმოს. სრულფასოვანი შეთანხმება, რომ შედგეს, ორივე მხარემ რაღაც უნდა დათმოს. აქედან გამომდინარე, გადაწყვეტილება სადღაც შუაში უნდა იყოს და არა რომელიმე მხარის სასარგებლოდ“, - განაცხადა ხუხაშვილმა.

რიგგარეშე არჩევნების გარდაუვალობაზე საუბრობს პოლიტოლოგი ვახტანგ ძაბირაძე. ძაბირაძის განცხადებით, რთული სათქმელია, „ქართულ ოცნებაში“ აცნობიერებენ თუ არა, თუმცა, ქვეყანა რიგგარეშე არჩევნების წინაშე მაინც დადგება, რადგან ობიექტურად არის მძიმე ვითარება და „ქართულ ოცნებას“ მომდევნო 4 წელი ხელისუფლების შენარჩუნება გაუჭირდება.

„პრობლემა მხოლოდ პარლამენტის ერთპარტიულობაში კი არ არის, პრობლემა ის არის, რომ იქნება უამრავი სოციალური, ეკონომიკური, პოლიტიკური პრობლემები, რომელსაც ხელისუფლება ვერ გადაჭრის. არ ვიცი, დღეს ამას რამდენად აცნობიერებს ხელისუფლება, მაგრამ ძალიან მალე დადგება ასეთი რეალობის წინაშე. წავა თუ არ წავა ხელისუფლება დათმობაზე, მას რიგგარეშე არჩევნების ჩატარება მაინც მოუწევს. ამიტომ მხოლოდ ეს არის გამოსავალი, რომ ოპოზიცია შედის პარლამენტში და ხდება პოლიტიკური შეთანხმება, რომ მოხდება საარჩევნო კოდექსის შეცვლა და ერთი წლის ვადაში ჩატარდება რიგგარეშე არჩევნები. მაგრამ თუ ოპოზიცია დარჩება ქუჩაში, არც ხელისუფლება გადადგამს ნაბიჯს“, - განაცხადა ძაბირაძემ.

ამასთან, ძაბირაძე მიიჩნევს, რომ მოლაპარაკებების პროცესში უბნების გადათვლაზე უარი ოპოზიციის მხრიდან, მათთვის არამომგებიანია.

„ოპოზიცია უნდა დათანხმდეს გადათვლაზე და უნდა გააკეთოს შემხვედრი წინადადება, რომ შეადგინონ ჯგუფი, არასამთავრობოების და პოლიტიკური წარმომადგენლების მონაწილეობით, რომელიც გადათვლის და ეს პროცესი იქნება ღია. ყველა უბნის გადათვლა რომ მოუწიოთ, უნდა გადათვალონ. ეს პოლიტიკურად მომგებიანია ოპოზიციისთვის,“ - განაცხადა ძაბირაძემ.

მისივე თქმით, წინა შემთხვევაში, როცა ხელისუფლებისა და ოპოზიციის მოლაპარაკებები პროპორციულთან მიახლოებული სისტემის მიღებით დასრულდა, სხვა ვითარება იყო, „ახლა კი სახის შენარჩუნება არა მხოლოდ ხელისუფლებას, არამედ ოპოზიციასაც სჭირდება“.

„ადრეც იყო საუბარი იმაზე, რომ ქუჩის აქციებმა აიძულა ხელისუფლება დათმობაზე წასულიყო, მაგრამ ეს არ არის მთლად სწორი შეფასება, ამაში საერთაშორისო პარტნიორების განმსაზღვრელი წვლილი იყო, მაშინ იმდენად ცუდ დღეში აღმოჩნდა ხელისუფლება, როცა დანაპირები უკან წაიღო და ეს იმდენად ცალსახა იყო, რომ არგუმენტი არ ჰქონდათ არა მხოლოდ მოსახლეობასთან, არამედ დასავლეთთან, დღეს სხვა ვითარებაა, იგივე დასავლეთმა ამ არჩევნების შედეგები აღიარა, ამიტომ დღეს დასავლეთის სხვა რამეში დარწმუნება, მარტივი არ იქნება, ამიტომ ოპოზიციას გაუჭირდება. თუ ოპოზიცია პერმანენტულ აქციებს დააანონსებს, უნდა გაითვალისწინოს, რომ ზამთარი მოდის, მძიმე პერიოდია და არ იქნება პროტესტის ის მუხტი, რაც საჭიროა იმისთვის, რომ ხელისუფლება დათმობაზე წამოიყვანონ. ამიტომ ოპოზიციამ უნდა ეძებოს გამოსავალი და ისეთი გამოსავალი, რომ დღეს თუ არა, ხვალ რომ რიგგარეშე არჩევნები იქნება, სახე ჰქონდეს შენარჩუნებული, დღეს მხოლოდ ხელისუფლებას არ სჭირდება სახის შენარჩუნება დასავლელ პარტნიორებთან, ეს სჭირდება ოპოზიციასაც, იმისთვის რომ სიტუაცია მათთვის იყოს მომგებიანი“, - განაცხადა ძაბირაძემ.

ექსპერტ ვანო მაჭავარიანის განცხადებით კი, აუცილებელია, რომ ხელისუფლებასა და ოპოზიციას შორის კომპრომისი შედგეს.

„ხელისუფლებასა და ოპოზიციას შორის კომპრომისი უნდა შედგეს - ეს არის აუცილებლობა იმისთვის, რომ ქვეყანა ნორმალურად, დემოკრატიულად განვითარდეს და პოლიტიკური კრიზისი მოგვარდეს. თუ ეს არ მოხდება, რა თქმა უნდა, ქვეყანა რთულ პოლიტიკურ-ეკონომიკურ და მათ შორის, საერთაშორისო ურთიერთობების თვალსაზრისით კრიზისში აღმოჩნდება და ეს ორივე მხარემ უნდა გაითავისოს. საქართველო საერთაშორისო მხარდაჭერის გარეშე ამ ეტაპზე, მითუმეტეს რეგიონში განვითარებული მოვლენებიდან გამომდინარე, უბრალოდ, ვერ შეძლებს მიაღწიოს ნორმალურ შედეგებს. მმართველმა გუნდმა ძალიან კარგად იცის, რომ არჩევნების ჩატარების დროს ძალიან სერიოზული ხარვეზები იყო, რომელმაც რა თქმა უნდა, გავლენა იქონია შედეგებზე. ის, რომ ხელისუფლებისა და ოპოზიციის მოლაპარაკებებში ხელისუფლების მხრიდან მონაწილეობს არჩილ თალაკვაძე და „ქართული ოცნების“ პოზიციას აჟღერებს კახა კალაძე, მიანიშნებს, იმაზე, რომ „ქართული ოცნების“ კატეგორიულობა ემსახურება ერთ მიზანს, რომ საერთო ჯამში მათ მოუწიოთ კომპრომისზე წასვლა, მხოლოდ იმისთვის, რომ პასუხისმგებლიანი პოლიტიკური ძალის რეპუტაცია არ დაკარგონ“, - განაცხადა ექსპერტმა.

ამასთან მაჭავარიანმა აღნიშნა, რომ აშშ-ის სახელმწიფო მდივნის მაიკ პომპეოს საქართველოში ვიზიტის ერთ-ერთი მნიშვნელოვანი მიზანი, დემოკრატიულ განვითარებაში შექმნილი სერიოზული პრობლემებია, რომელიც 2020 წლის არჩევნების შემდეგ საქართველოში შეიქმნა.

„ამერიკის სახელმწიფო მდივნის მაიკ პომპეოს ვიზიტი საქართველოში, ორ მნიშვნელოვან მიზანს ემსახურება, რა თქმა უნდა, ერთი მიზეზი რეგიონში განვითარებული მოვლენებია, ხოლო მეორე, ვიზიტის მიზანი გახლავთ სწორედ ის დემოკრატიულ განვითარებაში შექმნილი სერიოზული პრობლემები, რომელიც 2020 წლის არჩევნების შემდეგ საქართველოში შეიქმნა. პომპეოს ვიზიტი მნიშვნელოვანია როგორც ქვეყნის შიდა ეკონომიკური და დემოკრატიული განვითარებისთვის, ასევე ეს ნიშნავს ქვეყნისთვის მხარდაჭერის გამოხატვას რთულ გეოპოლიტიკურ ვითარებაში, რომელიც შეიქმნა ყარაბაღის ომის შემდეგ და რუსეთის სამხედროების ახალი განლაგებების შემდეგ“, - განაცხადა ვანო მაჭავარიანმა.

ცნობისთვის, ხელისუფლებასა და ოპოზიციას შორის მოლაპარაკებების მეორე რაუნდი 14 ნოემბერს შედგა.