"ამ ეტაპზე ერთადერთი შეგვიძლია, ხალხი გარეთ დავტოვოთ და ბლატებით სტადიონზე მოვხვდეთ" - როგორ ეხმაურებიან ქართველი ფეხბურთელების გუშინდელ მარცხს "ფეისუქზე"

გუშინ საქართველოსა და მაკედონიის ნაკრებები ერთმანეთს ერთა ლიგის პლეი-ოფის ფინალში დაუპირისპირდნენ. საქართველოს ეროვნული საფეხბურთო ნაკრები ჩრდილოეთ მაკედონიასთან ანგარიშით 0:1 დამარცხდა. შედეგად, ჩრდილოეთ მაკედონიამ ევროპის ჩემპიონატის საგზური მოიპოვა. ისტორიულ მატჩს სოციალურ ქსელში უამრავი ადამიანი ეხმაურება:

მიშა მშვილდაძე, პროდუსერი და ტელეწამყვანი:

"დღევანდელი თამაშის ანალიზიც ესაა და უსწრაფესი პორტირებაც უკან რეალობაში - ცვლილებებს ვაგვიანებთ...

30 წელი ველოდი ამ თამაშს მაგრამ არაუშავს: მადლობა ამ თაობის ფეხბურთელებს ყველაფრისთვის, რაც შეძლეს და რაც ვერა - გვანერვიულეს, გაგვახარეს, დაგვაჯერეს, გული დაგვწყვიტეს - განგვაცდევინეს, ეგაა მთავარი. მადლობა მათ წინა თაობებს, რომ წაგება სამყაროს აღსასრული აღარ მგონია. 3 დღეშია შემდეგი თამაში - ეს სხვა ციკლია, უფრო რთული და გრძელი, მარა ვნახოთ რა გამოვა. ერთი 30 წელი კიდე მაქვს მე, მინიმუმ"

გიორგი ჯანელიძე, იუმორისტი:

პანდემიის გამო, თორე კაი ხნის გამოვარდნილები ვიქნებოდით ჩვენც და ყველა დანარჩენი, ერთის გარდა.

ირაკლი გაფრინდაშვილი, ტელეწამყვანი:

ისტორიული რა გვაქვს კიდე ამ კვირაში?! რამე ნერვები ხო არ დაგრჩათ რო მოგიშალოთ?!

დეკანოზი თამაზ ლომიძე:

ფეხბურთშიც, ხელოვნებაშიც, პოლიტიკაშიც, თავდაცვაშიც, სულიერებაშიც და თითქმის ყველგან საქართველოში, ერთი და იგივე სულია დასადგურებული - უდარდელი წაგების სული; რა თავს იკლავ, გაჩერდი, მოერიდე, არ იბრძოლო, არ მოინდომო, არ შეუტიო, არ გაიმარჯვო, არ იყო გამორჩეული და გამარჯვებული, შემთხვევით, ვინმე, შენზე ძლიერი არ გააბრაზო და გააღიზიანო. აი, ამ “მოერიდე და დაიმალე”-ს პოლიტიკამ დაასნეულა ქვეყანა და შეჭამა ქართველების შეტევის, გამარჯვების და წარმატების ჟინი. ეს დამღუპველია, ეს უნდა დამთავრდეს.

რამაზ გიგაური, ასტროლოგი:

2020 წელმა საქართველოს საფეხბურთო ნაკრების თამაშზე პასუხისმგებლობას მე ვიღებო.

ვიკა ბუკია, ჟურნალისტი:

მოკლედ, თამაშამდე არ მინდოდა დაწერა... ახლა დავწერ. რა უნდა ამ ნაკრებს ევროპის ჩემპიონატზე. უპირველესად საქართველოზე ვამბობ და ასევე ჩრდ. მაკედონიაზეც. და საერთოდ, აუტსაიდერებისთვის დატოვებული ხვრელი კონტინენტის პირველობაზე შესაძრომად არის მარაზმი. უნდა იყოს 16 გუნდი. რაც შეეხება დღევანდელ თამაშს, შედეგი გამოვიცანი, ანგარიში კი საერთოდ 0-2 მეგონა. საქართველოს ნაკრებს მეტი არ შეუძლია. ესაა მაქსიმუმი. თავის მოტყუება იყო იმ სუსტ ჯგუფში გამარჯვებები. ვინც იტყუებდა თავს, დღეს მიიღო პასუხი. ამ ეტაპზე ერთადერთი ის შეგვიძლია, ხალხი გარეთ დავტოვოთ და ბლატებით კი სტადიონზე მოვხვდეთ.

პეტრე კოლხი, მღვდელი:

ცხოვრებაში პირველად ვუყურებ ფეხბურთს და თან ვლოცულობ, იქნებ ჩვენებმა ბურთი ერთხელ მაინც გაიტანონ მოწინააღმდეგის კარში. რაღაცაში მაინც გავიმარჯვოთ... თავი ომში მგონია!..

ისიც გვეყოს, რომ არჩევნები მთელმა ერმა გავიმარჯვეთ, ფეხბურთი სხვა დროს იყოს!.. ამდენი გულშემატკივრების გამო მაინც, ფეხით კი არა, კბილებით გავიტანდი!

ვახო ჭუმბურიძე, იურისტი:

ისტორიული მარცხი! ადრე ისე ვმარცხდებოდით და ახლა ისტორიული მარცხი გვაქვს... სალომე ზურაბიშვილმა ორივე ნაკრებს მიულოცა გამარჯვება... არაუშავს მეგობრებო, ფეხბურთი ეგეთი სპორტია! ხან წავაგებთ, ხან წავაგებთ. წაგება და წაგება ძმები არიან.

ნათია ფანჯიკიძე, ფსიქოლოგი:

ძალიანაც მომეწონა ჩვენი ნაკრების თამაში. აბა, რა წესია, დაპატიჟო სტუმარი, მოუგო, დაუნგრიო თავყბა და გაუშვა?

ვახო სანაია, ჟურნალისტი:

საქართველოს პრეზიდენტი ულოცავს საქართველოსა და ჩრდ. მაკედონიის ნაკრებებს ევროპის ჩემპიონატზე გასვლას, მსაჯს კი მადლობას უხდის ფასილიტაციისთვის.

რა გახდა, ბიჯო, 11 ყივჩაყი ნაკრებში. ხო ხედავთ, ვერ თამაშობენ ესენი!

შეიძლება, ბევრი არ დამეთანხმოს, მაგრამ მწვრთვნელი ყველაზე ნაკლებადაა დამნაშავე იმაში, რაც მოხდა. უფრო მეტიც, აქამდე მოსვლა სწორედ ამ მწვრთვნელის დამსახურებაა. მწვრთვნელზე დაბრალება, უფრო დიდი პრობლემების გადაფარვის მცდელობა მგონია. ვიყოთ სირაქლებას პოზაში, ბაზარი არაა. უბედურება ისაა, რომ ევროპაზე გასვლას ქართული ფეხბურთის წარმატებად რომ ჩავთვლიდით. სიმართლეს ვერ დავემალებით.

საქართველოს ნაკრებს ჰყავდა რამდენიმე უცხოელი მწვრთვნელი, აქედან სამი იყო სერიოზული მიღწევებით სხვა გუნდებში.

კლაუს ტოპმიოლერი: 2002 წელს ლევერკუზენი გაიყვანა ჩემპიონთა ლიგის ფინალში. იმავე წელს გახდა ბუნდესლიგის საუკეთესო მწვრთვნელი.

ექტორ კუპერი: ვალენსია ორჯერ გაიყვანა ჩემპიონთა ლიგის ფინალში. ეგვიპტე 2018 წელს მსოფლიო ჩემპიონატზე გაიყვანა. სხვა მიღწევებზე არაფერს ვიტყვი. ესეც საკმარისია.

ვლადიმერ ვაისი: სლოვაკეთი 2010 წელს მსოფლიო ჩემპიონატზე გაიყვანა. იქ კი გავიდა ჯგუფიდანაც.

აქ ვერც ერთმა ვერ მიაღწია რაიმე სერიოზულ წარმატებას. ეს მათთვის, ვინც ნაკრების პრობლემას მწვრთნელში ხედავს. დავიძინებ ახლა.

გიორგი ზურაბიშვილი, სპორტული ჟურნალისტი:

თანამედროვე ფეხბურთში შეტევა იწყება დაცვიდან და დაცვა იწყება შეტევიდან! სანამ ამას არ შევისისხლხორცებთ, მანამდე წარმატებას ვერ მივაღწევთ. მეტოქის პრესინგის დროს ბურთის გათამაშება და შეტევის დაწყება თუ არ შეგიძლია, თამაშს ვერ მოიგებ! მეკარე რომ წინ იგერიებს ბურთს, რამდენჯერმე დააგდებს ცენტრფორვარდი, მაგრამ ეს ერთეული შემთხვევებია... სულ ერთხელ იყო მთელ თამაშში, რომ დაცვიდან კარგად ამოვედით და ბურთი კარგად გავათამაშეთ. დაცვაში კიდევ უკან რომ ჩაჯდები და მეტოქის ნახევარზე პრესინგს არ თამაშობ, ვერ მოიგებ! რა მომენტებიც გვქონდა, ისინიც პრესინგის წყალობით შევქმენით და უფრო მეტი პრესინგი უნდა გვეთამაშა. დაცვის ხაზი უნდა აგვეწია და მეტოქეს მათსავე ნახევარზე უნდა დავხვედროდით. თუმცა სამწუხაროდ ეს მაკედონიამ გააკეთა და არა ჩვენ...

ნიკა გვარამია, "მთავარის" გენერალური დირექტორი:

რომ მივხვდი, რომ შეიძლება ინფარქტი დამმართნოდა, ავიღე და ბოლო 15 წელია ქართულ ფეხბურთს (გინდ საკლუბოს, გინდ სანაკრებოს), უბრალოდ არ ვუყურებ. აი, საერთოდ არა. მაქსიმუმ livescore-ზე ვნახო ანგარიში, ისიც იშვიათად. არაა ეგ ჩვენი სპორტი, დაამსხვრიეთ ეგ მითოლოგებმა თქვენს ცნობიერებში. არც ერთი მსოფლიო კლასის ფეხბურთელი არ გვყავს ლამის ბოლო ორი ათწლეულია (გადახედეთ, რა კლუბებში თამაშობენ), მესამეხარისხოვანი მწვრთნელები ყავს ნაკრებს მუდმივად, შიდა ჩემპიონატი პრაქტიკულად არ გვაქვს და ეზოების გუნდების შეჯიბრადაა ქცეული, და რა რეზულტატზე შეიძლება საერთოდ ლაპარაკი, რატომ იტყუებთ თავს? რას ეფუძნება, რაციონალურს, თქვენი მოლოდინები? რაც მალე შევეგუებით ყველანი ამ სიმართლეს, მით უკეთესი. და რაც მალე გადავანაწილებთ ფეხბურთზე (ანუ წყალში + ქართული ოცნების კორუფციაზე) გადაყრილ ასობით მილიონს სპორტის იმ სახეობებზე, სადაც ბევრი ფულის დახარჯვას რეალური და ფანტასტიური შედეგი მოყვება, თანაც მყისიერად (ჭიდაობა, ძალოსნობა, რაგბი, კალათბურთი, კრივი, ჭადრაკი და ასე შემდეგ) - ასევე მით უკეთესი. უკეთესი ჩვენი ფსიქიკისთვის და ჯანმრთელობისთვის, და სპორტისთვის და ქვეყნისთვის ასევე. მითქვია მე და თქვენ იხეთქეთ გულები სანამ არ მოგწყინდებათ. მე 15 წლის წინ მომწყინდა.