"იტყუება ენმ-ის ლიდერი? ნებისმიერი სხვა პარტიის ლიდერს რომ იგივე ეთქვა, აქამდე საჯაროდ ჯვარცმული იქნებოდა" - ზურაბ ჯაფარიძე

"გირჩის" ლიდერი ზურაბ ჯაფარიძე "ნაციონალური მოძრაობის" თავმჯდომარის გრიგოლ ვაშაძის გუშინდელ ინტერვიუს სოციალურ ქსელში ეხმაურება. მისი თქმით, ნებისმიერი სხვა პარტიის ლიდერი რომ მისულიყო რუსთავი2-ზე და მსგავსი განცხადებები ეკეთებინა, "საჯაროდ ჯვარცმული" იქნებოდა.

"ნაციონალური მოძრაობის თავმჯდომარის ინტერვიუს ვუყურე რუსთავი2-ზე

ჰოდა, არც გაურკვევლობაში დარჩენას ვაპირებ და არც თვალთმაქცობას

ამიტომ საჯაროდ ვკითხულობ:

იტყუება ენმ-ის ლიდერი?

რა მოლაპარაკებების ჩაშლაზე ლაპარაკობს?

ვინ ჩაშალა და როდის?

რა მიზეზით?

პ.ს. ნებისმიერი სხვა პარტიის ლიდერი რომ მისულიყო რუსთავი2-ზე და იგივე ეთქვა, ახლა მთელი ოპოზიციური მედია ამის გარკვევით იქნებოდა დაკავებული

ის ლიდერი კი - საჯაროდ ჯვარცმული" - წერს ჯაფარიძე.

"ნაციონალური მოძრაობის" თავმჯდომარემ გრიგოლ ვაშაძემ "რუსთავი 2"-ის ეთერში განმარტა, რომ მისი განცხადების მოტივი თითქმის მომზადებული დაილოგის ჩაშლა იყო.

ვაშაძე ამბობს, რომ დიალოგი სტრატეგიული პარტნიორობის ჩართულობით უნდა შემდგარიყო.

"ბოლო ჩახმახი ის იყო, რომ თითქმის მომზადებული დიალოგი ჩვენი სტრატეგიული პარტნიორობის ჩართულობით, ჩაიშალა. ყოველდღე და თან არაერთხელ, მე პირადად ვიყავი კომუნიკატორი ოპოზიციიდან, საელჩოებთან ამ საკითხებზე. არ მაქვს ნებართვა, ეს დიპლომატიური წარმომადგენლები დავასახელო, მაგრამ მათ საქართველოზე გული, ჩვენზე არანაკლებად შესტკივათ,"- აცხადებს გრიგოლ ვაშაძე.