"ტეკუმსეს წყევლა", რაც ტრამპს ან ბაიდენს შეიძლება დაემუქროს და პრეზიდენტები, რომლებიც ინდიელთა ბელადის საბედისწერო წინასწარმეტყველებას გადაურჩნენ

1970-იან წლებში საქართველოში საკმაოდ პოპულარული იყო ფილმი "ტეკუმსე" - ინდიელი ბელადის შესახებ, რომელშიც ტეკუმსეს როლს იუგოსლაველი მსახიობი გოიკო მიტიჩი ასრულებდა. ფილმი 1972 წელს გადაიღეს, ყოფილი გდრ-ის კინოსტუდია "დეფა“-ში. ცხადია, იმ დროს ჩვენმა კინომაყურებელმა არაფერი იცოდა "ტეკუმსეს წყევლის" შესახებ, რომელიც თურმე ამერიკელ პრეზიდენტებს ემუქრებათ...

და, ალბათ, დღესაც ცოტამ თუ იცის, რომ ამ წყევლისგან საფრთხე შეიძლება დონალდ ტრამპს ან ჯოზეფ ბაიდენს დაემუქროს - მიმდინარე 2020 წელს ჩატარებული არჩევნების გამო.

წყევლის ისტორიას კი მე-19 საუკუნის დასაწყისში გადავყავართ, როცა შეერთებული შტატების ხელისუფლებამ ინდიელებს მიწების წართმევა დაუწყო.

ტეკუმსე ("მფრინავი ისარი“) ინდიელთა ტომის - შაუნის ბელადი იყო. შაუნები დღევანდელი ოჰაიოს, ოკლაჰომასა და კენტუკის შტატების ტერიტორიაზე ცხოვრობდნენ. ტეკუმსე აქტიურად ებრძოდა მომხვდურებს და სხვა ინდიელ ტომებთან ერთად სამხედრო კავშირიც კი შექმნა, თუმცა, მან საბოლოოდ ამერიკელებთან ბრძოლა წააგო: 1813 წელს ინდიანას შტატის გუბერნატორმა უილიამ ჰარისონმა მდინარე ტიპეკანის ნაპირებთან ინდიელთა რაზმი გაანადგურა, ტეკუმსე მძიმედ დაიჭრა და გარდაიცვალა.

ლეგენდის თანახმად, როცა ტეკუმსე კვდებოდა, მან იქვე მდგომ გუბერნატორს უწინასწარმეტყველა, რომ იგი აშშ-ის პრეზიდენტი გახდებოდა, მაგრამ არჩევის შემდეგ მალე დაიღუპებოდა. მომაკვდავმა ბელადმა დაწყევლა მისი მომდევნო პრეზიდენტებიც:

"შენ გახდები მკრთალსახიანების დიდი ბელადი, მაგრამ მალე მოკვდები, ბელადობის ვადას ვერ დაასრულებ. იცოდე, რომ ასე დაემართება ყოველი 20 წლის შემდეგ არჩეულ ყველა უდიდეს ბელადს 7 მუხლის განმავლობაში“.

შეიძლება ეს "წყევლა“ ვინმეს ღიმილისმომგვრელად მოეჩვენოს, მაგრამ მოვლენები ისე განვითარდა, რომ ბევრი დაფიქრდა - მართლაც სრულდება ტეკუმსეს წყევლა?

პირველ მუხლად ითვლება თვითონ უილიამ ჰარისონის პრეზიდენტობა, რომელიც აშშ-ის მეცხრე პრეზიდენტად 1840 წელს აირჩიეს, მაგრამ ინაუგურაციის შემდეგ ერთ თვეში გარდაიცვალა.

მეორე მუხლი - აბრაამ ლინკოლნი, 1860 წელს არჩეული, 1865 წელს მოკლეს.

მესამე მუხლი - ჯეიმს ჰარფილდი, პრეზიდენტად 1880 წელს აირჩიეს, 1881 წელს კი მოკლეს.

მეოთხე მუხლი - უილიამ მაკ-კინლი, რომელიც 1900 წელს იქნა მეორე ვადით არჩეული პრეზიდენტად, მაგრამ 1901 წელს მოკლეს.

მეხუთე მუხლი - უორენ ჰარდინგი. იგი ქვეყნის მეთაურად 1920 წელს აირჩიეს, მაგრამ ორ წელიწადში ინფარქტით გარდაიცვალა.

მეექვსე მუხლი - ფრანკლინ დელანო რუზველტი. იგი აშშ-ის პრეზიდენტი 1933-1945 წლებში იყო (ანუ მისი "დიდბელადობის“ პერიოდში 1940 წელიც შედის). 1944 წელს ფრანკლინ რუზველტი მეოთხე ვადით იქნა არჩეული, მაგრამ პრეზიდენტობის ვადა ვერ დაასრულა - იგი პოტსდამის კონფერენციის დაწყების წინ ტვინში სისხლის ჩაქცევით გარდაიცვალა.

მეშვიდე მუხლი - ჯონ კენედი, პრეზიდენტად 1960 წელს არჩეული, 1963 წელს ტეხასის შტატში, დალასში მოკლეს.

ამრიგად, ტეკუმსეს მიერ მონიშნული ვადა "7 მუხლის განმავლობაში“, მეტ-ნაკლებად ყოველთვის სრულდებოდა.

• არის თუ არა "წყევლის“ ვადის გაგრძელების საფრთხე?

უცნაურია, მაგრამ ტეკუმსეს წინასწარმეტყველება, სხვადასხვა გამოვლენით, მომდევნო მუხლებშიც (ოცწლეულებშიც) გრძელდებოდა.

1980 წელს აშშ-ის პრეზიდენტად რონალდ რეიგანი აირჩიეს, 1981 წელს კი მასზე თავდასხმა განხორციელდა. რომ არა თანამედროვე მედიცინის მიღწევები, მისი ჭრილობა სასიკვდილო იყო.

2000 წელს აშშ-ის პრეზიდენტად ჯორჯ ბუშ-უმცროსი აირჩიეს. 2005 წელს, თბილისში, საქართველოს დედაქალაქში ყოფნის დროს, მასზე თავდასხმა განხორციელდა. ხელყუმბარა არ აფეთქდა, პრეზიდენტი გადარჩა....

2020 წელი...

იმედი უნდა ვიქონიოთ, რომ ტეკუმსეს წყევლა უკვე საბოლოოდ ძალადაკარგულია.

ავტორი: სიმონ კილაძე