მარტვილში კორონავირუსით 31 წლის ქალი გარდაიცვალა - "ნერვული სისტემის პრობლემები ჰქონდა, უეცრად გაუჩერდა ფეხი"

მარტვილში, covid-19 -ით 31 წლის ქალი გარდაიცვალა. როგორც მარტვილის საზოგადოებრივი ჯანდაცვის ცენტრის ხელმძღვანელმა როზა ჯანაშიამ AMBEBI.GE-ს განუცხადა, პაციენტის ოჯახის წევრებმა კორონავირუსის ტესტის პასუხი მას შემდეგ მიიღეს, რაც პაციენტი გარდაიცვალა.

"მას ჰქონდა ქრონიკული დაავადებები. ზუსტი დიაგნოზი არ ვიცი, მაგრამ ნერვული სისტემის პრობლემები ჰქონდა. არანაირი სიმპტომი არ ჰქონდა ვირუსის, გაურთულდა ქრონიკული დაავადება და უეცრად გაუჩერდა ფეხი.

სახლიდან უკავშირდებოდა მკურნალ ექიმს. ბოლოს, ერთიანად რომ დამძიმდა მისი მდგომარეობა, კლინიკაში გადაყვანა მოითხოვეს. როგორც იცით, კლინიკები ითხოვენ კორონავირუსზე ტესტის პასუხს, რომ პაციენტი მიიღონ. მას თავდაპირველად ჩაუტარდა სწრაფი ტესტი, რომელმაც უარყოფითი პასუხი აჩვენა.

თუმცა, მოგვიანებით, PCR ტესტირებით დაუდგინდა Covid -19, მაგრამ პაციენტი უკვე გარდაცვლილი იყო. როცა მისი მდგომარეობა დამძიმდა, გადაწყვიტეს კლინიკაში გადაყვანა, ამიტომაც აუღეს ტესტები კორონაზე. სამწუხაროდ, PCR-ის პასუხი დღეს მოვიდა დადებითი, ინფიცირებული კი მანამდე, დილით გარდაიცვალა", - აცხადებს როზა ჯანაშია.