"ოცნება" გამარჯვებას ზეიმობს, სააკაშვილი კი ერთიანი ეროვნული მთავრობის ჩამოყალიბებაზე საუბრობს" - "არჩევნები ქართულად" უცხოური მედიის თვალით

საქართველოში 31 ოქტომბერს გამართულ საპარლამენტო არჩევნებს მსოფლიო მედია აშუქებს. უცხოური გამოცემები მიმოიხილავენ არჩევნების დღეს და დეტალურად აღწერენ საარჩევნო პროცესს.

თითქმის ყველა გამოცემა განსაკუთრებულ ყურადღებას ამახვილებს იმ ფაქტზე, რომ ბიძინა ივანიშვილმა და მმართველმა პარტიამ საარჩევნო უბნების დახურვისთანავე იზეიმეს გამარჯვება, პარალელურად კი, ქვეყნის ექსპრეზიდენტი მიხეილ სააკაშვილი აცხადებდა, რომ არჩევნებში მიღწეული შედეგი ოპოზიციური სპექტრის გამარჯვებაა და კოალიციური მთავრობის შექმნის შესახებ საუბრობდა, ახლა კი ოპოზიცია მხარდამჭერებს შედეგების გაპროტესტებისკენ მოუწოდებს.

ვნახოთ, რას წერს ზოგიერთი უცხოური გამოცემა:

• "ალჯაზირა“

"საქართველოში ოპოზიცია უარყოფს არჩევნების შედეგებს და ამომრჩეველს პროტესტისკენ მოუწოდებს" - ამ სათაურით აქვეყნებს "ალჯაზირა“ სტატიას 31 ოქტომბრის საპარლამენტო არჩევნების შესახებ, სადაც ვრცლადაა განხილული არჩევნების დღეს მიმდინარე პროცესი.

"სახელისუფლებო პარტია "ქართული ოცნება" საპარლამენტო არჩევნებში ლიდერობს. პირველადი მონაცემების შედეგს ოპოზიცია არ ეთანხმება და პროტესტს გეგმავს.

მმართველმა პარტიამ, რომელიც დაფუძნებულია ქვეყნის უმდიდრესი ადამიანის, ბიძინა ივანიშვილის მიერ, გამარჯვება საარჩევნო უბნების დახურვიდან მალევე გამოაცხადა. ოპოზიციაში ამბობენ, რომ ცესკოს მიერ გამოცხადებული შედეგი რეალობას არ ასახავს. "ერთიანი ნაციონალური მოძრაობის" წევრმა, ნიკა მელიამ მხარდამჭერებს თბილისის ცენტრში შეკრებისკენ და არჩევნების შედეგების გაპროტესტებისკენ მოუწოდა.

"ნაციონალური მოძრაობის" კიდევ ერთი წევრი, დავით კირთაძე, ამბობს, რომ არჩევნების შედეგი არ გამოხატავს ქართველი ხალხის რეალურ ნებას. როგორც ოპოზიციაში მიიჩნევენ,მათ მიიღეს ხმების ის რაოდენობა, რაც საკმარისი იქნება კოალიციის ჩამოსაყალიბებლად",- წერს გამოცემა.

"ალჯაზირას" რეპორტიორი რობინ ფორესტირ უოკერი თბილისიდან იტყობინება, რომ ამომრჩეველს თავისუფლად და უსაფრთხოდ შეეძლო ხმის მიცემა, თუმცა იყო ძალადობრივი სცენებიც პარტიების მხარდამჭერებსა და მათ მოწინააღმდეგეებს შორის. "საქართველოში, სავარაუდოდ, იქნება უფრო მრავლფეროვანი პარლამენტი, მაგრამ პოლიტიკოსებს ახლა მოუწევთ ყურადღების გამახვილება ისეთ გამოწვევბზე, როგორებიცაა კორონავირუსის პანდემია და ეკონომიკა“, - ამბობს რეპორტიორი.

გამოცემა ასევე აღნიშნავს, რომ ქვეყნის ეკონომიკა მძიმედ დაზარალდა კორონავირუსის გამო. სტატიაში ასევე აღნიშნულია, რომ სახელისუფლებო გუნდის პოპულარობა საზოგადოებაში შემცირებულია, ხოლო ოპოზიცია მათ ეკონომიკის არასწორ მართვაში, შერჩევით სამართლიანობაში, სუსტ საგარეო პოლიტიკაში, განსხვავებული აზრის გამოხატვის ხელის შეშლაში და პროტესტის ძალადობრივი გზით დაშლაში ადანაშაულებს. "ალჯაზირა“ იმასაც წერს, რომ როგორც კრიტიკოსები ამბობენ, ბიძინა ივანიშვილი კულისებიდან მართავს ქვეყანას, რასაც "ქართულ ოცნებაში“ უარყოფენ.

• Associated Press

"საქართველოში საპარლამენტო არჩევნებში გამარჯვება მმართველმა პარტიამ მოიპოვა", - ამ სათაურით აქვეყნებს სტატიას "ესოშიეითიდ პრესი“, სადაც არჩევნების დღე დეტალურადაა აღწერილი და ყურადღება გამახვილებულია იმაზე, რომ ბიძინა ივანიშვილმა და "ქართულმა ოცნებამ“ გამარჯვება საარჩევნო უბნების დახურვისთანავე იზეიმეს.

"საარჩევნო უბნების დახურვის შემდეგ, მილიარდერმა ბიძინა ივანიშვილმა იზეიმა გამარჯვება, მაგრამ ზუსტად არ იყო გარკვეული მიიღო თუ არა მმართველმა გუნდმა სათავეში დასარჩენად ხმების საკმარისი რაოდენობა. ყოფილმა პრეზიდენტმა, მიხეილ სააკაშვილმა კი ეროვნული ერთიანობის მთავრობის შექმნაზე განაცხადა.

ივანიშვილმა, რომელმაც "ქართული ოცნება" დააფუძნა, თავისი ქონება რუსეთში მოიპოვა, მხარდამჭერებს გამარჯვება მიულოცა მას შემდეგ, რაც ყველა შესაძლო ეგზითპოლმა აჩვენა, რომ მისი პარტია ლიდერობდა", - წერს "ესოშიეითიდ პრესი."

"ხაზგასმით უნდა აღინიშნოს, რომ "ქართული ოცნება" მესამედ იგებს არჩევნებს“, - ციტირებს გამოცემა ივანიშვილის სიტყვებს.

AP იმასაც წერს, რომ პარალელურად, ყოფილმა პრეზიდენტმა, მიხეილ სააკაშვილმა არჩევნების შედეგები ოპოზიციის ტრიუმფად შეაფასა. "ეს პრაქტიკულად დიდი გამარჯვებაა ქართული ოპოზიციისა, მიუხედავად დაშინებისა და ზეწოლისა. ამ პირობებში ჩვენი ამოცანაა ეროვნული ერთიანობის მთავრობის შექმნა“, - განაცხადა სააკაშვილმა.

გამოცემა სტატიაში ასევე წერს საქართველოს ეკონომიკის მდგომაროების შესახებ, ასევე საქართველოსა და რუსეთის ურთიერთობაზე და ქვეყანაში პრორუსულ პოლიტიკაზე. "ოპოზიცია ხელისუფლებას პრორუსული პოლიტიკის გატარებაში ადანაშაულებს“ - წერს AP და "ნაციონალური მოძრაობის წარმომადგენლის, ხატია დეკანოიძის სიტყვებს იმოწმებს:

"რუსეთის გავლენა კიდევ უფრო ფართოვდება, ადამიანები უფრო ღარიბდებიან, ეკონომიკური მდგომარეობა კატასტროფულია, ადამიანებმა გადაწყვიტეს, რომ ცვლილებების დროა“, - ამბობს დეკანოიძე.

• Deutsche Welle

საქართველოში გამართულ საპარლამენტო არჩევნებზე წერს "დოიჩე ველეც“ და აქვეყნებს სტატიას, სადაც აღნიშნულია, რომ მმართველი პარტია გამარჯვების შესახებ იუწყება, ოპოზიცია კი შედეგებს აპროტესტებს. "დოიჩე ველეც“ სხვა გამოცემების მსგავსად მიმოიხილავს არჩევნების დღეს შექმნილ ვითარებას. აღნიშნულია, თუ როგორ იზეიმა "ოცნებამ“ გამარჯვება, პარალელურად კი მიხეილ სააკაშვილმა კოალიციური მთავრობის ჩამოყალიბებაზე ისაუბრა.

ინფორმაციისთვის, 31 ოქტომბერს საქართველოში საპარლამენტო არჩევნები გაიმართა, სადაც მოსახლეობამ მე-10 მოწვევის პარლამენტი აირჩია. 150 წევრიან პარლამენტში 120 პროპორციული წესით, ხოლო 30 - მაჟორიტარული საარჩევნო სისტემის საფუძველზე დაკომპლექტება. ცენტრალური საარჩევნო კომისიის წინასწარი მონაცემებით, რომელიც 3007 საარჩევნო უბნის მონაცემებს ეყრდნობა, "ქართული ოცნება-დემოკრატიულ საქართველოს“ ხმების 48.36 %, "ერთიანი ნაციონალური მოძრაობა-გაერთიანებული ოპოზიცია ძალა ერთობაშიას” 26.35 % აქვს - გაეცანით ცესკოს მონაცემებს სრულად.

შენიშვნა: სტატიის მთავარი ფოტოს ავტორი, ზურაბ ქურციკიძე; წყარო