ბანკზე თავდასხმაში ბრალდებული ბადრი ესებუა 27 ოქტომბერს, ზუგდიდის ქუჩებში გადაადგილდებოდა? - რა კადრებს ავრცელებს "მთავარი"

12:35 / 29-10-2020

"საქართველოს ბანკზე" თავდასხმაში ბრალდებული ბადრი ესებუა 27 ოქტომბერს ზუგდიდის ქუჩებში გადაადგილდებოდა. აღნიშნულ ინფორმაციას და ქუჩის სათვალთვალო კამერების მიერ გადაღებულ კადრებს "მთავარი" ავრცელებს.

მათი ინფორმაციით, აღნიშნული ფოტომასალა პოლიციის დახურულ ჯგუფში გავრცელდა.

უკვე რამდენიმე დღეა საზოგადოების განხილვის საგანია ზუგდიდში მომხდარი ამბავი, რომლის მთავარი ფიგურანტი ბადრი ესებუაა. სწორედ ის არის ბრალდებული "საქართველოს ბანკზე" მომხდარ თავდასხმაში.

მისი ადგილსამყოფელის დადგენისა და დაკავების მიზნით, პოლიცია სპეციალურ ოპერატიულ, საგამოძიებო და სამძებრო მოქმედებებს აქტიურად განაგრძობს.

შს მინისტრის მოადგილის, ვლადიმერ ბორცვაძის განცხადებით, დანაშაულის მუხლი გადაკვალიფიცირდა და მის წინააღმდეგ გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, ტერორისტული მიზნით, მძევლად ხელში ჩაგდებას და ცეცხლსასროლი იარაღის უკანონოდ შეძენა, შენახვა, ტარებას გულისხმობს.