ჰუმანიტარული ზავის შემდეგ, აზერბაიჯანი და სომხეთი ერთმანეთს კვლავ ცეცხლის შეწყვეტის რეჟიმის დარღვევაში ადანაშაულებენ - რა ცნობებს ავრცელებენ მხარეები

მიუხედავად იმისა, რომ 26 ოქტომბრის 08.00 საათიდან ცეცხლის შეწყვეტის რეჟიმი ამოქმედდა, სომხეთის შეიარაღებულმა ძალებმა მიღწეული შეთანხმება კვლავ უხეშად დაარღვიეს, - აზერბაიჯანული მედიის ინფორმაციით, ამის შესახებ ქვეყნის თავდაცვის სამინისტრო იუწყება.

„სომხეთის შეიარაღებულმა ძალებმა ჰუმანიტარული მიზნით ცეცხლის შეწყვეტის რეჟიმი დაარღვიეს და ქალაქ ტარტარისა და რეგიონის სოფლების საარტილერიო დაბომბვა დაიწყეს,“ - აცხადებენ აზერბაიჯანის თავდაცვის უწყებაში.

განცხადებას ავრცელებს სომხეთის თავდაცვის სამინისტროც და აზერბაიჯანულ მხარეს ცეცხლის შეწყვეტის რეჟიმის უხეშად დარღვევაში ადანაშაულებს.

„აზერბაიჯანულმა მხარემ, მთიანი ყარაბაღის ჩრდილოეთ-აღმოსავლეთ მიმართულებით დაახლოებით 8:45 საათზე საარტილერიო ცეცხლი გახსნა,“ - წერს სომხეთის თავდაცვის სამინისტროს პრესსპიკერი შუშან სტეპანიანი სოციალურ ქსელ „ფეისბუქში“.

შეგახსენებთ, მთიან ყარაბაღში ჰუმანიტარული ზავი დღეს დილის 8:00 საათიდან ამოქმედდა.

აზერბაიჯანული მედია ქვეყნის გენერალურ პროკურატურაზე დაყრდნობით ასევე გარდაცვლილებისა და დაშავებულების შესახებ ავრცელებს ინფორმაციას: "4, 11 და 17 ოქტომბერს განჯაში სარაკეტო და მძიმე არტილერიის გამოყენებით განხორციელებული თავდასხმების შედეგად დაიღუპა 26 ადამიანი, მათ შორის 10 ქალი და 6 ბავშვი".

მათივე ინფორმაციით, სომხეთ-აზერბაიჯანის კონფლიქტს 27 სექტემბრიდან დღემდე, საერთო ჯამში, 65 მშვიდობიანი მოქალაქე, მათ შორის 18 ქალი და 10 ბავშვი ემსხვერპლა.

აზერბაიჯანის გენერალურ პროკურატურაში აცხადებენ, რომ „სომხეთის პროვოკაციის შედეგად“ დაშავებულია 297 ადამიანი, მათ შორის 69 ქალი და 32 - ბავშვი.