დანიელმა მილიონერმა, რომელმაც ჟურნალისტი გოგონა მოკლა და შემდეგ დაანაწევრა, ციხიდან გაქცევა სცადა - "მე, სავარაუდოდ, ფსიქოპათი ვარ"

დანიელი გამომგონებელი და მილიონერი პიტერ მედსენი, რომელიც საკუთარ წყალქვეშა ნავ "ნაუტილიუსზე“ შვედი ჟურნალისტის, კიმ უოლის მკვლელობის გამო პატიმრობაში იმყოფებოდა, სამართალდამცავებმა ციხიდან გაქცევისას დააკავეს.

20 ოქტომბერს, დილით, მედსენმა შეძლო და კოპენჰაგენის პენიტენციური დაწესებულებიდან გაიქცა. ის ციხეს უკვე კილომეტრით იყო მოშორებული, როცა სამართალდამცავები დაედევნენ. მედსენის ასაყვანად გზა სპეცრაზმმა, სნაიპერებმა და სხვა სამართალდამცავებმა გადაკეტეს, მათ თან გაწვრთნილი ძაღლებიც ჰყავდათ.

გამომგონებელს წელზე შაჰიდის ქამარის მსგავსი მოწყობილობა ეკეთა და შუა ქუჩაში დაჯდა. ის მოწყობილობის აფეთქებით იმუქრებოდა. თუმცა, არც აფეთქება მომხდარა და არც სნაიპერებს უსვრიათ, ის ისევ ციხეში გადაიყვანეს.

ნამდვილად ჰქონდა თუ არა გამომგონებელს ასაფეთქებელი მოწყობილობა, უცნობია, კოპენჰაგენის პოლიციას არც იმის შესახებ უსაუბრია, როგორ მოახერხა მედსენმა ციხიდან გაქცევა.

გამოცემა Ekstra Bladet-ის ცნობით, დანიელი მილიონერი კოპენჰაგენში იმ სასჯელაღსრულების დაწესებულებაში იხდის სასჯელს, სადაც პატიმრებს ფსიქოლოგიური, ფსიქიკური ან სექსოლოგიური პრობლემები აქვთ. როგორც ცნობილია, რამდენიმე ხნის წინ ის სხვა პატიმართაგან იზოლირებულად მოათავსეს, რადგან მედსენს გაქცევისკენ ჰქონდა მიდრეკილება. თუმცა, 20 ოქტომბრის, მან მაინც მოახერხა ციხიდან გაქცევა. ამბობენ, რომ დანიელი მილიონერი ციხის დაცვის წევრებს იარაღის გამოყენებითა და ბომბის აფეთქებით ემუქრებოდა, რომელიც ქამარზე ჰქონდა დამაგრებული. ადგილობრივი გამოცემის ცნობით, მან ციხის თანამშრომელი ქალი, ფსიქოლოგი აიყვანა მძევლად, დაცვამ მედსენი ციხიდან გაუშვა და ფისიქოლოგს არ შეუქმნა საფრთხე.

TV2-ის ცნობით, მილიონერმა გაქცევა თეთრი მინივენით სცადა, თუმცა სამართალდამცავები გაქცეულ პატიმარს მალე დაედევნენ და წასვლის საშუალება არ მისცეს. უცნობია ისიც, თავად გაუშვა მედსენმა მძევალი თუ პოლიციამ დაიხსნა ფსიქოლოგი.

• ვინ არის პიტერ მედსენი?

დანიელმა გამომგონებელმა 2017 წელს მის კონსტრუირებულ წყალქვეშა ნავ "ნაუტილიუსზე“ შვედი ჟურნალისტი კიმ იული წაიყვანა, რომელსაც ამ წყალქვეშა ნავის შესახებ სტატიის მომზადება სურდა. შეხვედრიდან მეორე დღეს ნავი ჩაიძირა, გოგონა კი გაუჩინარდა.

გამომგონებელი თავდაპირველად ამბობდა, რომ ნავის ჩაძირვამდე გადმოსვა გოგონა, შემდეგ კი განაცხადა, რომ გოგონა უბედური შემთხვევით ნავზე გარდაიცვალა.

სამართალდამცავებმა ზღვაში გოგონას სხეულის ნაწილები აღმოაჩინეს.

ჟურნალისტის სხეულზე ექსპერტებმა დანით მიყენებული ჭრილობები აღმოაჩინეს. მათი თქმით, ეს ჭრილობები გოგონას ან სიკვდილის მომენტში ან გარდაცვალების შემდეგ მიაყენეს.

მედსენს ადანაშაულებდნენ, რომ მას წინასწარ ჰქონდა დაგეგმილი ჟურნალისტის მკვლელობა, მოგვიანებით მან აღიარა, როგორ დაანაწევრა კიმ უოლის სხეული, თუმცა მისი თქმით, ეს დაგეგმილი არ ჰქონია.

გამოძიების ცნობით, ჟურნალისტის მკვლელობისას ის თავისი ავადმყოფური სექსუალური ფანტაზიებით მოქმედებდა. ჩხრეკისას მის კომპიუტერში ქალების მკვლელობის და წამების ვიდეოები, ასევე თავის მოკვეთის მასალები აღმოაჩინეს. ის ინტერნეტში აქტიურად ეძებდა მსგავს მასალებს.

მედსენის დაკავებიდან გარკვეული პერიოდის შემდეგ, დანიურ ტელეარხზე გავიდა დოკუმენტური ფილმი გამომგონებლის შესახებ, სადაც მან პირველად აღიარა, რომ დამნაშავე იყო ჟურნალისტის მკვლელობაში.

"მახსოვს ყველა წამი წყალქვეშა ნავით იმ მოგზაურობიდან, თუმცა, არ ვიცი, რა გახდა კიმის სიკვდილის მიზეზი“, - განაცხადა მან ერთ-ერთ ჟურნალისტთან საუბრისას.

2018 წლის აპრილში მას სამუდამო პატიმრობა მიუსაჯეს.

როგორც ცნობილია, საქმის გამოძიებისას უამრავი ადამიანი დაიკითხა, მათ შორის ისინი, ვინც გამომგონებელს "ნაუტილიუსის“ აგებაში ეხმარებოდა.

მათი თქმით, წყალქვეშა ნავს მართლაც ჰქონდა გარკვეული პრობლემები და ამის მოგვარებას მედსენი აპირებდა კიდეც. ისინი ამბობენ, რომ იმ დღეს, როცა გოგონა დაიკარგა, მედსენი ძალიან უცნაურად იქცეოდა და აღელვებული იყო. სხვებთან საუბრისას ის განიცდიდა, რომ მის სარაკეტო ლაბორატორიაში რაკეტის გაშვებასთან დაკავშირებით რაღაც პრობლემები ჰქონდა.

ავსტრალიელი დოკუმენტალისტი ემა სალივანი, რომელმაც მედსენი მკვლელობის დღეს გადაიღო, იხსენებს, რომ ის უცნაურად იქცეოდა და უცნაურად ხუმრობდა. მან თქვა, რომ იყო "მთავარი ეჭვმიტანილი მეზობლის ცოლის მკვლელობაში და ამიტომ შეუძლია დუმილის უფლება გამოიყენოს“. ამ ინტერვიუს ჩაწერისას, მედსენმა განაცხადა: "მე, სავარაუდოდ, ფსიქოპათი ვარ".

მედსენის ახლობლები, სასამართლოზე აღნიშნავდნენ, რომ მას განსაკუთრებულად აინტერესებდა პორნოგრაფიული მასალები და "დარქნეტი“. ცნობილი გახდა ისიც, რომ ის თავად იღებდა მონაწილეობას პორნოგრაფიის გადაღებისას. წყარო

ავტორი: ეკა გადახაბაძე