პოლიცია ჰკითხავს დავით ხვიბლიანს, რომელიც ნიკა გვარამიას ინფორმაციით, "ფეიკმძევალია"

ზუგდიდის სამხარეო პოლიციაში "საქართველოს ბანკზე" თავდასხმისას მძევლად აყვანილი ერთ-ერთი პირი დავით ხვიბლიანი გამოკითხვაზე იმყოფება.

ამის შესახებ ჟურნალისტებს ხვიბლიანის ნათესავმა სამხარეო პოლიციასთან განუცხადა, რომელიც ხვიბლიანს გარეთ ელოდებოდა.

"მე, არაფერი ვიცი. ხვიბლიანის ნათესავი ვარ. ის დაკავებული არ არის, ახლა გამოუშვებენ", - განაცხადა ხვიბლიანის ნათესავმა.

ცნობისთვის, „მთავარი არხის“ გენერალურმა დირექტორმა, ნიკა გვარამიამ განაცხადა, რომ უცნობმა წყარომ მას მძარცველის ვინაობა დაუსახელა და ორი "ფეიკ" მძევალი ამოიცნო.

"სამი მძევლიდან ორი იყო „ფეიკ“ მძევალი, სინამდვილეში მძევლად აყვანის თანამონაწილე, ასევე შეიარაღებული. ერთ-ერთის სახელი დავით ხვიბლიანია“, - წერს გვარამია „ფეისბუქში“.