ჰუმანური გამტაცებლები, მადლიერი მძევლები, სნაიპერის მიერ ლიკვიდირებული დამნაშავე -  დანაშაულები ჩვენი უახლესი ისტორიიდან, როდესაც მძევლები აიყვანეს

"საქართველოს ბანკის" ზუგდიდის ფილიალში მძევლად აყვანილი ადამიანების ეტაპობრივად გათავისუფლების შემდეგ, შეიარაღებულმა, ნიღბიანმა პირმა, რომელიც 500 ათას დოლარს და უსაფრთხოდ გადაადგილებას მოითხოვდა, შენობა, სამ მძევალთან და სამეგრელო-ზემო სვანეთის პოლიციის დეპარტამენტის დირექტორ ავთანდილ გალდავასთან ერთად დატოვა და ზუგდიდიდან, ავტომანქანით, გვიან ღამით გაემგზავრნენ. შს სამინისტროს ცნობით, ინტენსიურად გრძელდება ოპერატიულ-საგამოძიებო და სამძებრო ღონისძიებები დამნაშავის დასაკავებლად. ამასთანავე, ოფიციალურად ამ დრომდე არ არსებობს დადასტურებული ინფორმაცია, ნამდვილად მიუტანა თუ არა ფული ავთანდილ გალდავამ თავდამსხმელს.

ადამიანების მძევლად აყვანა და გათავისუფლება საქართველოსთვის უცხო არ არის, თუმცა არც მსგავსი ფაქტების სიხშირით გამოვირჩევით. მძევლობის ინსტიტუტმა ჩვენს ქვეყანაში მოქმედება 90-იანი წლებიდან, სამოქალაქო ომის გაჩაღებისთანავე დაიწყო. დამოუკიდებელ საქართველოში მძევლების გათავისუფლების სპეცოპერაციები სისხლით, ხან უსისხლოდ სრულდებოდა.ზუგდიდში განვითარებულმა მოვლენებმა ახლო წარსულიდან რამდენიმე ისტორია გაგვახსენა, რომლებიც მძევლად აყვანის ფაქტებს უკავშირდება.

• ჰუმანური გამტაცებლები და მადლიერი მძევლები

1998 წლის 19 თებერვალს ზუგდიდში, გაეროს სექტორის რამდენიმე წარმომადგენელი ჯიხაშკარში მძევლებად აიყვანეს.

ეს ქმედება მაშინვე შეფასდა, როგორც ტერაქტი, თუმცა, მოგვიანებით არამარტო იმდროინდელი ქართული, მსოფლიო მედიაც ვერ მალავდა გაკვირვებას ქართველი ტერორისტების ჰუმანურობის გამო - ზვიად გამსახურდიას ერთგული გვარდიის წარმომადგენლებმა, რომელთაც სათავეში გოჩა ესებუა ედგა, გაეროელ მძევალთა გათავისუფლების პირობად გამსახურდიასა და შევარდნაძის ხელისუფლებებს შორის მოლაპარაკებების დაწყება დაასახელეს. თავად მძევლები თავს მშვენივრად გრძნობდნენ, ქართული სამზარეულოს კერძებს აგემოვნებდნენ და არც ღვინოსა და ორნახად არაყზე ამბობდნენ უარს. საბოლოოდ, ეს "ტერაქტი" ოთხივე მძევლის გათავისუფლებით დასრულდა.

ამბობენ, როდესაც გამტაცებლებმა მათი გაშვება გადაწყვიტეს, ისინი თურმე წასვლაზე უარს ამბობდნენ, - ჩვენ გარეშე თქვენ არაფერი დაგიშავონო... მეამბოხეთა ნაწილი ხელისუფლებას შეურიგდა, ნაწილმა კი, გოჩა ესებუას მეთაურობით, ისევ ტყეს მისცა თავი. მოგვიანებით, სულ რაღაც თვენახევარში, გოჩა ესებუა მოკლეს - ესეც მორიგი ტერაქტი იყო, რადგან სპეცრაზმს ძალიან ადვილად შეეძლო მისი ცოცხლად აყვანა...

• "ის ლიკვიდირებულ იქნა სნაიპერის მიერ"

2002 წლის აგვისტოში, მცხეთის ხიდზე მოკლეს აფხაზეთიდან დევნილი პირი, რომელმაც თბილისში "ოქროს ბირჟა” გაძარცვა. მან მიკროავტობუსის მძღოლი და ბირჟის თანამშრომლები აიყვანა მძევლად. მძარცველი სნაიპერის ტყვიამ იმსხვერპლა. სპეცოპერაციას უშუალოდ იმჟამინდელი შს მინისტრი კობა ნარჩემაშვილი ხელმძღვანელობდა, რომელიც ამ ამბავს იხსენებს:

"ოქროს ბირჟაზე შეიჭრა მძარცველი, ორი ჩანთა ოქროულობით გაავსო, მერე გამოვიდა და სამარშრუტო ტაქსის მძღოლი, ბირჟიდან კი 3-4 კაცი მძევლად აიყვანა და წავიდა მცხეთის მიმართულებით. შეტყობინება მალევე მივიღეთ, მაგრამ ქალაქში არ გავაჩერეთ, ვინაიდან შეიარაღებული იყო, ხელყუმბარა ჰქონდა და მაქსიმალურად ვეცადეთ გაგვეყვანა ისეთ სივრცეში, სადაც ნაკლებად სახიფათო იქნებოდა. დევნის ოპერაციას ვახორციელებდით და ნატახტართან ავტომანქანა უკან შემობრუნდა და ისევ ქალაქისკენ წამოვიდა. როცა შეიქმნა საფრთხე, რომ ისევ შეიძლებოდა შემოსულიყო მჭიდროდ დასახლებულ ქალაქში, მაშინ მივიღე გადაწყვეტილება, ხიდზე გაგვეჩერებინა. მანქანა დაიბლოკა, ალყაში მოვაქციეთ და დაივიწყეთ მასთან მოლაპარაკება. მისი მოთხოვნა იყო მიგვეცა გზა, ვერტმფრენი, ავტომანქანა და დასავლეთ საქართველოს მიმართულებით გაგვეშვა. მოლაპარაკება საკმაოდ დიდხანს გაგრძელდა, პარალელურად ჩვენ სპეცოპერაციის რამდენიმე გეგმას განვიხილავდით. ვცდილობდით დაგვედგინა მისი ვინაობა, რათა იქნებ მისი ახლობლებით მოგვეხდინა გავლენა და მძევლები გადმოეცა. ეს არ მოხერხდა, დამნაშავე ჩვენს არანაირ პირობაზე არ მოდიოდა. მიუხედავად იმისა, რომ ვაწარმოებდით მაქსიმალურ მოლაპარაკებას, ვთავაზობდით შეღავათს, გარკვეულწილად, უკომპრომისო ვიყავით და ვეუბნებოდით, რომ აუცილებლად მოუწევდა დანებება და ამაში ვიყავით ცალსახად მკაფიო. ვინ არ ჩავრთეთ საქმეში - სასულიერო პირი, ფსიქოლოგი და სხვა ავტორიტეტები, რათა მასზე გავლენა მოეხდინათ. მე პირადად, სულ ხაზზე ვიყავი რადგან ვიცოდით, რომ მძევლების მდგომარეობა საკმაოდ მძიმე იყო - ამდენი საათის განმავლობაში საკვების, ტუალეტის, წყლის გარეშე... ჩვენ კი მივაწოდეთ ყველაფერი, მაგრამ ის ძალიან აგრესიულად იქცეოდა როგორც ჩვენს მიმართ, ისე, მძევლების მიმართ. იმის გათვალისწინებით, რომ მძარცველი არანაირ მოლაპარაკებაზე აღარ წამოვიდა და გარკვეული სადაზვერვო ჯგუფისგან გვქონდა ინფორმაცია, რომ დიდი ალბათობით მძევლების სიცოცხლეს საფრთხე ელოდა და ის ხელყუმბარას გამოიყენებდა, როცა ამაში დავრწმუნდით, შემდეგ დავიწყეთ სპეცოპერაცია. მიუხედავად დიდი მცდელობისა, დაგვნებებოდა, ძალიან დიდი იყო რისკი, რომ მძევლების სიცოცხლეს საფრთხე ემუქრებოდა, ის ძალიან აგრესიული გახდა მათ მიმართ, სხვა გზა აღარ იყო და ის ლიკვიდირებულ იქნა სნაიპერის მიერ. როგორც მახსოვს, ეს ხანგრძლივი ოპერაცია დილის 5 საათზე დასრულდა. მერე გაირკვა, რომ ეს ადამიანი აფხაზეთიდან ლტოლვილი იყო, გვარ-სახელი აღარ მახსოვს”.

• მძევლებს ჩანაცვლებული პოლიციის უფროსი და ჩაბარებული დამნაშავე

იმავე წლის, 2002-ის შემოდგომაზე რუსთავში ქვემო ქართლის სამხარეო პოლიციის უფროსი აიყვანეს მძევლად. სპეცოპერაცია დამნაშავის დანებება-ჩაბარებით დასრულდა. საქმე ანგარებით ჩადენილი დანაშაულის ფაქტზე დაკავებულ პირს ეხებოდა, რომელმაც ადგილზე მისულ პოლიციას თავი დააღწია და მძევალი აიყვანა. ქვემო ქართლის სამხარეო პოლიციის იმჟამინდელი უფროსი ალეკო ბუკია გახლდათ, რომელიც, როგორც ავთო გალდავა ზუგდიდელი ბანკის დაყაჩაღბისას, მძევალს ჩაენაცვლა. დამნაშავე მანქანით მოძრაობდა და მას სამართალდამცველები დიდხანს ვერტმფრენით დაჰყვებოდნენ. საბოლოოდ, დამნაშავე დანებდა და მათ ჩაბარდა. სპეცოპერაცია უსისხლოდ დასრულდა და არავინ დაშავებულა.

• "მძარცველებმა ქალი მანქანიანად გაიტაცეს"

2019 წლის 8 მარტს შინაგან საქმეთა სამინისტრომ, გლდანში "საქართველოს ბანკზე" მომხდარი ყაჩაღური თავდასხმის ფაქტი გახსნა და ორი პირი დააკავა.

ყაჩაღობის, პოლიციელზე თავდასხმის, ცეცხლსასროლი იარაღის მართლსაწინააღმდეგო შეძენა-შენახვა-ტარებისა და თავისუფლების უკანონო აღკვეთის ბრალდებით წარსულში ნასამართლევი 2 პირი დააკავეს. გამოძიებით დადგინდა, რომ შეიარაღებული და ნიღბიანი ბრალდებულები გლდანში საქართველოს ბანკში" შეიჭრნენ და სიცოცხლის მოსპობის მუქარით თანხა მოითხოვეს. ბანკის თანამშრომლებმა განგაშის სიგნალით დაცვის პოლიცია გამოიძახეს. ბანკის ფილიალთან მისულ დაცვის პოლიციას თავდამსხმელებმა ცეცხლი გაუხსნეს. სროლისას არავინ დაშავებულა. ბრალდებულებმა, ბანკის ფილიალზე ყაჩაღურ თავდასხმამდე, თავისუფლება უკანონოდ აღუკვეთეს 2 მოქალაქეს და კუთვნილი ავტომანქანა ჩამოართვეს. მძარცველებმა ქალი მანქანიანად გაიტაცეს, მასთან ერთად გატაცებული იყო კიდევ ერთი ბიჭი. მძარცველებს ისინი რამდენიმე საათის განმავლობაში ხელ-ფეხ შეკრული ჰყავდათ, ბანკზე თავდასხმის შემდეგ კი, ბანკის ტერიტორიაზე მანქანიდან ჩამოაგდეს, თავად ჩასხდნენ იმავე მანქანაში და გაიქცნენ. პოლიციამ, ჩატარებული საგამოძიებო მოქმედებების შედეგად, ნივთმტკიცებად ამოიღო გატაცებული ავტომანქანა, რომელიც ბრალდებულებმა კვალის დაფარვის მიზნით დაწვეს.