ვინ არიან ГРУ-ს ოფიცრები, რომლებსაც საქართველოზე ჰაკერული თავდასხმისთვის აშშ-მ ბრალი წაუყენა და კონკრეტულად რას ედავებიან მათ - "ასეთი საქმეების გახსნა საკმაოდ რთულია"

აშშ-ის იუსტიციის დეპარტამენტმა რუსეთის სამხედრო დაზვერვის (ГРУ) 6 ოფიცერს რამდენიმე ქვეყნის მიმართ ჰაკერული თავდასხმის გამო ბრალი წაუყენა. დეპარტამენტის განცხადებით, ჰაკერები კომპიუტერულ შეჭრასა და თავდასხმებში მონაწილეობდნენ, რითაც უკრაინაში, საქართველოსა და საფრანგეთში არეულობის მოწყობას ცდილობდნენ.

შეერთებული შტატების იუსტიციის დეპარტამენტის ინფორმაციით, კომპიუტერული შეტევების დროს "გრუს“ ჰაკერებმა მსოფლიოში ყველაზე მავნე პროგრამები -KillDisk-ი და Industroyer-ი გამოიყენეს.

ანგარიშის მიხედვით, რუს ოფიცრებს ბრალად ედებათ 2019 წელს საქართველოს პარლამენტის ქსელის მოშლის მცდელობა, თავდასხმა ქართულ ვებ-გვერდებზე, უკრაინისთვის ელექტროენერგიის გათიშვა, საფრანგეთის 2017 წლის არჩევნებისთვის ხელის შეშლა და 2018 წლის ოლიმპიური თამაშების შეფერხება.

დოკუმენტში ასევე აღნიშნულია, რომ ჰაკერებმა 2018 წელს შეტევა მოაწყვეს საქართველოს ერთ-ერთი მედიაკომპანიის წინააღმდეგ.

• ვინ არიან საქართველოს წინააღმდეგ ჰაკერულ შეტევაში ბრალდებულები და რა ვიცით მათ შესახებ?

დოკუმენტში ექვსივე ჰაკერის ვინაობაა ნახსენები, თუმცა ჩვენთვის საყურადღებოა მათგან "გრუ"-ს ის ორი ოფიცერი, რომლებმაც კიბერშეტევა საქართველოს წინააღმდეგ მოაწყვეს. ესენი არიან ანატოლი კოვალიოვი და არტიომ ოჩიჩენკო.

ჰაკერების ფოტოები და მათ შესახებ ინფორმაცია ამერიკის ფედერალური ბიუროს (FBI) ძებნილთა ნუსხაშიცაა შეტანილი.

FBI-ის ძებნილთა სიაში ანატოლი კოვალიოვის შესახებ წერია, რომ ის 1992 წლის 2 აგვისტოს, რუსეთშია დაბადებული და "გრუ“-ს ოფიცერია. ფედერალური ბიუროს ინფორმაციით, ის მოსკოვში ცხოვრობს.

რაც შეეხება არტიომ ოჩინენკოს, ისიც 1992 წელს რუსეთშია დაბადებული და "გრუ"-ში ანატოლ კოვალიოვის მსგავსი პოზიცია უკავია.

• კონკრეტულად რომელი კიბერშეტევებისთვის არიან ბრალდებულნი "გრუ"-ს ოფიცრები?

დადასტურებული არ არის, კონკრეტულად რომელ კიბერშეტევისთვის არიან ბრალდებულნი აღნიშნული პირები, თუმცა შეგვიძლია ვივარაუდოთ, რომ 2018 წლის შემთხვევაში ეს ეხება "რუსთავი -2" - ზე განხორციელებულ შეტევას. სწორედ 2018 წელს ტელეკომპანიის მაშინდელი დირექტორი, ნიკა გვარამია აცხადებდა, რომ შეტევა განხორციელდა არხის ოფიციალურ საიტზე. გვარამია ამბობდა, რომ დაიკარგა მართვისა და ადმინისტრირების შესაძლებლობა და ვერ აკონტროლებდნენ ვებ-გვერდს.

რაც შეეხება 2019 წელს განხორციელებულ კიბერშეტევას მაშინ 15 000-ზე მეტ ვებ-გვერდზე გადასვლისას საქართველოს ყოფილი პრეზიდენტის, მიხეილ სააკაშვილის ფოტო ჩნდებოდა წარწერით "I'LL BE BACK" (მე დავბრუნდები). აღნიშნულთან დაკავშირებით მოგვიანებით საქართველოს საგარეო საქმეთა სამინისტრომ განცხადება გაავრცელა, სადაც ნათქვამი იყო, რომ კიბერშეტევა დაიგეგმა და განხორციელდა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ.

"2019 წლის 28 ოქტომბერს საქართველოში განხორციელდა ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებ-გვერდებზე, სერვერებსა და სხვა მართვით სისტემებზე.

კიბერშეტევის შედეგად დაზიანდა ზემოაღნიშნული ორგანიზაციების სერვერები, მართვითი სისტემები და მნიშვნელოვნად შეფერხდა მათი ფუნქციონირება. კიბერშეტევა მიზნად ისახავდა საქართველოს ეროვნული უსაფრთხოების ხელყოფას, საქართველოს მოსახლეობისათვის ზიანის მიყენებას და სამთავრობო სტრუქტურების, ასევე სხვადასხვა ორგანიზაციების ფუნქციონირების შეფერხებით და მოშლით საზოგადოებაში მღელვარების დათესვას.

ქართული მხარის მიერ ჩატარებული გამოძიებით და საერთაშორისო პარტნიორებთან ურთიერთთანამშრომლობის შედეგად მიღებული ინფორმაციის შესაბამისად, აღნიშნული კიბერშეტევა დაიგეგმა და განხორციელდა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ“, - ნათქვამი იყო საქართველოს საგარეო საქმეთა სამინისტროს მიერ გავრცელებულ განცხადებაში.

• "მსგავსი კიბერშეტევისგან 100%-იანი დაცვა შეუძლებელია"

ambebi.ge კიბერუსაფრთხოების ექსპერტ ანდრო გოცირიძეს ესაუბრა:

"ეს არის რუსული სპეცსამსახურის დანაყოფი, სამხედრო დაზვერვის, გენერალური შტაბის მთავარი სამმართველო, რომელიც ძალიან ბევრ შეტევაშია შემჩნეული. როგორც აშშ-ს იუსტიციის დეპარტამენტმა თავის დასკვნაში, საპროკურორო დოკუმენტაციაში წარმოადგინა, ეს დანაყოფი 2014 წლიდან მოყოლებული, არის პასუხისმგებელი უამრავ ისეთ გახმაურებულ კიბერშეტევაზე, როგორიც არის მაგალითად, საფრანგეთის საპრეზიდენტო არჩევნებში ჩარევა, 2015-2016 წლებში უკრაინის ენერგოსისტემის მწყობრიდან გამოყვანა, მათ შორის საქართველოზე 2018-2019 წლებში განხორციელებულ კიბერშეტევებზე, რომელთა რიგშიც უნდა მოვიხსენიოთ გასული წლის ოქტომბერში განხორციელებული კიბერშეტევა პროსერვისზე, რასაც საქართველოს პრეზიდენტისა და სასამართლოს საიტის მწყობრიდან გამოყვანა მოჰყვა; ასევე, 2018 წელს პარლამენტის წინააღმდეგ განხორციელებული კიბერთავდასხმა.

ეს არის ფაქტობრივად, ყველა ის რეზონანსული კიბერშეტევა, რომელმაც მიიქცია საზოგადოების ყურადღება 2014 წლიდან მოყოლებული 2020 წლის ჩათვლით. რაც ეხება მედიასაშუალებას, 2019 წლის ოქტომბერში იყო კიბერთავდასხმა რამდენიმე მედიასაშუალებაზე, თუ არ ვცდები, პირველ არხზე და “იმედზე” შეტევა, რომელიც საქართველოში გამოიყენეს.

ამ დროს მიზანი შეიძლება იყოს კიბერშპიონაჟიდან დაწყებული, დასრულებული სახელმწიფოს დემოკრატიული ფუნქციონირების ხელის შეშლით, ასევე არჩევნებში ჩარევა, მასმედიის მოქმედების მოშლა, საინფორმაციო ვაკუუმის შექმნა - ძალიან ფართოა სპექტრი, რომელსაც ემსახურება რუსული სადაზვერვო დანაყოფების მიერ წარმოებული კიბეროპერაცია. არჩევნებში ჩარევა, ბუნებრივია, არ გულისხმობს მაინც და მაინც არჩევნების თვეს და რიცხვში მოქმედებას - ბიულეტენების გაყალბებას და სხვა. არჩევნებში ჩარევაა მათ შორის განწყობების შექმნა, ნიჰილიზმის დანერგვა, საქართველოს იმიჯის შელახვა, არჩევნებისადმი რწმენის შერყევა და ა.შ. საინფორმაციო ოპერაციის გამოყენების ბევრი მიზანია. ასეთი საქმეების გახსნა საკმაოდ რთულია, ხოლო საერთაშორისო დახმარება და საერთაშორისო ურთიერთობები კიბერუსაფრთხოებაში ძალიან მნიშვნელოვანი თემაა. ამერიკის, დიდი ბრიტანეთის და სხვა ქვეყნების შესაძლებლობები რომ ჩვენსას აღემატება, ესეც ფაქტია. მსგავსი კიბერშეტევისგან 100%-იანი დაცვა შეუძლებელია, თუმცა ჩვენი კიბერთავდაცვა გადახალისებას და ახალ მიდგომებს საჭიროებს იმიტომ, რომ რუსეთის კიბერაქტორები ყოველდღე ზრდიან საკუთარ პოტენციალს და რაღაც დამცავი მექანიზმები ჩვენც უნდა გვქონდეს".

• საქართველოს საგარეო საქმეთა სამინისტროს განცხადება "გრუ"-ს ოფიცრებისთვის ბრალდების წარდგენის შესახებ:

აშშ-ის იუსტიციის დეპარტამენტის მიერ "გრუ"-ს ოფიცრებისთვის ბრალდების წარდგენას ჩვენი ქვეყნის საგარეო უწყება ეხმიანება. სამინისტროს განცხადებაში ნათქვამია, რომ "მიესალმებიან ამერიკელი პარტნიორების მიერ გამოჩენილ ძალისხმევას, ამ უგუნურ შეტევებში პასუხისმგებელი პირების გასასამართლებლად“.

საერთაშორისო საზოგადოების გაერთიანებული ძალისხმევა სასიცოცხლოდ აუცილებელია რუსეთის მიერ საქართველოს სუვერენიტეტისა და ტერიტორიული მთლიანობის, ქვეყნის სტაბილურობის, ინსტიტუციებისა და დემოკრატიული განვითარების შესასუსტებლად გამოყენებული საფრთხეების დასაძლევად“, - აღნიშნულია საგარეო საქმეთა სამინისტროს განცხადებაში.

ავტორები: ხატია ვარდოსანიძე, ნანა ფიცხელაური