"საშინელება დატრიალდება რამდენიმე დღეში..." - ხალხმრავალი აქცია ბათუმში, პირბადეებისა და დისტანციის გარეშე

ბათუმში "ერთიანი ნაციონალური მოძრაობის" მხარდამჭერებმა ქუჩებში მსვლელობა მოაწყეს და ბულვარში აქცია გამართეს. როგორც პარტიაში განაცხადეს, ეს არის წინასაარჩევნო შეხვედრა მათ ამომრჩეველთან, რათა ამომრჩეველს საარჩევნო პროგრამა წარუდგინონ.

დღევანდელ ღონისძიებას აჭარის მთავრობის ყოფილი თავმჯდომარე ლევან ვარშალომიძე ვერ დაესწრო. მან განცხადება სოციალურ ქსელში გაავრცელა და მხარდამჭერებს მოუბოდიშა. როგორც ცნობილია, დღეს ვაშალომიძის მამა კორონავირუსით გარდაიცვალა.

აქციას ასეულობით ადამიანი ესწრებოდა, თუმცა როგოროც ადგილობრივი გამოცემა "ბათუმელები" წერს, აქციას მოქალაქეები ძირითადად პირბადეების გარეშე იყვნენ წარმოდგენილი. კადრებში კარგად ჩანს, რომ არ იყო დაცული დისტანცია.

სოციალურ ქსელში უამრავი ადამიანი აზიარებს ხალხმრავალი აქციის ფოტოებს და ორგანიზატორებს აკრიტიკებენ.

"სულ ვცდილობდი მეპოვა განსხვვება "ევროპულ საქართველოსა და "ნაციონალურ მოძრაობას" შორის და მგონი ვიპოვე - ევსაქებს რაღაც პასუხოსმგებლობა მაინც ქონიათ. მათ ხვალ თბილისში დაგეგმილი აქცია ეპიდსიტუაციის გამო გააუქმეს, ხოლო ნაცებმა აი, ეს მოაწყვეს ბათუმში" - წერს სოციალურ ქსელში ჟურნალისტი მერაბ მეტრეველი.

"ეს რა ჯანდაბა ხდება ბათუმში! ჭყლეტაა და თითქმის არავის ნიღაბი არ უკეთია. გაწირეს ქალაქი. საშინელება დატრიალდება რამდენიმე დღეში..." - წერს ჟურნალისტი ზაზა დობორჯგინიძე.

"უპასუხისმგებლობაა ის რაც ახლა ბათუმში ხდება და რაც მანამდე რამდენჯერმე თბილისში მოხდა. პოლიტიკური პარტიები თუ ასე იქცევიან და არ ზრუნავენ საკუთარ თავსა და მხარდამჭერების ჯანმრთელობაზე, ქვეყანაზე როგორ იზრუნებენ, ხელისუფლებაში თუ იქნებიან?! " - წერს "საერთაშორისო მაგჭირვალობა საქართველოს" წევრი ლევან ნატროშვილი.

"საარჩევნო კამპანია ბოლო ფაზაშია, შესაბამისად ყველა ოპოზიციური პარტიის ნებისმიერი აქტივობა - უსაფრთხოების ნორმების სრული დაცვით მხოლოდ და მხოლოდ მისასალმებელია.

მაგრამ, ის რაც დღეს ბათუმში ნაციონალურმა მოძრაობამ და მისმა სატელიტებმა ჩაიდინეს, როდესაც უსაფრთხოების ნორმების მიზანმიმართული დაუმორჩილებლობით უამრავი ადამიანი შეკრიბეს ქალაქის ცენტრში - მათი მხრიდან საკუთარი ქვეყნის წინააღმდეგ მოწყობილი კიდევ ერთი ტერორისტული აქტია! სხვანაირი შეფასება ამ საქციელს არ გააჩნია" - წერს ნიკოლოზ მეტრეველი.

ცნობისთვის, ქვეყანაში კორონავირუსის 887 ახალი შემთხვევა გამოვლინდა და ინფიცირების შემთხვევათა რაოდენობა 15 327-ს შეადგენს. გამოვლენილი 887 შემთხვევიდან აჭარაში-342 დაფიქსირდა.