"ტაქსის მძღოლი 9 წლის გოგონას სკოლაში ატარებდა და ამ დროს ჩაიდინა გარყვნილი ქმედებაო" - ხონში მომხდარი შემზარავი დანაშაულის დეტალები

იმერეთში არასრულწლოვნის მიმართ გარყვნილი ქმედების ბრალდებით 72 წლის მამაკაცი დააკავეს. შემზარავი დანაშაული ხონში მოხდა. როგორც AMBEBI.GE-სთვის გახდა ცნობილი, დაკავებული ტაქსის მძღოლია, რომელიც 9 წლის ბავშვის მშობლებმა მის სკოლაში სატარებლად დაიქირავეს.

"დღეს დააკავეს, ტაქსის მძღოლია, გავიგეთ ბავშვთან გარყვნილი ქმედება ჩაუდენია. ცხრა წლის გოგონაა, ბებიასთან ცხოვრობს, მშობლები საზღვარგარეთ არიან. ეს კაცი ატარებდა სკოლაში და როგორც ამბობენ, ამ დროს ჩაიდინა გარყვნილი ქმედებაო.

კალთაში ისვამდაო, ბავშვს გაუმხელია თვითონ, ექსპერტიზაც ჩაუტარდა და ალბათ, ექსპერტიზის დასკვნის საფუძველზე დააკავეს. ჩვენ ასეთი არაფერი შეგვიმჩნევია. ტაქსის მძღოლია და აქ მუშაობდა"- აცხადებენ ადგილობრივები AMBEBI.GE-სთან საუბარში.

ბრალდების არ სჯერა დაკავებულის ოჯახს. მათი თქმით, არ იციან რა მოხდა და რატომ დააკავეს. ჩვენთან საუბარში ამბობენ, რომ მომხდარის გამო შოკში არიან და გამოძიების შედეგს დაელოდებიან.

შსს-ს ინფორმაციით, მომხდარზე გამოძიება 141-ე მუხლით დაიწყო, რაც გარყვნილ ქმედებას გულისხმობს.