"თედორაძეების ოჯახიდან მხოლოდ გოგონა გადარჩა, რადგან სტუმრად იყო წასული" - ვინ არიან ხელვაჩაურში სტიქიის შედეგად გარდაცვლილები

ხელვაჩაურის რაიონის სოფელ ჯოჭოში სტიქიამ 5 ადამიანის სიცოცხლე იმსხვერპლა. 1 ოქტომბერს, გვიან ღამით, უხვმა ნალექმა, მეწყრული პროცესები გამოიწვია, რის შედეგადაც ჩამოწოლილმა მიწამ სახლი და ავტომობილი მოიყოლა.

სახლში, რომელიც მეწყერმა მოიყოლა, ერთი ოჯახის სამი წევრი იმყოფებოდა, ხოლო ავტომობილში - ორი ახალგაზრდა მამაკაცი. სამძებრო სამუშაოებში 200 მაშველი-მეხანძრე იყო ჩართული. რამდენიმე საათიანი ძებნის შემდეგ, მათ ჯერ ავტომობილში მყოფი ახალგაზრდების ცხედრები იპოვეს, შემდეგ კი, მიწისქვეშ მოყოლილ სახლში მყოფი ოჯახის წევრების, ქალის და მამაკაცის. არასრულწლოვანი ბიჭის ცხედარს ამ დრომდე ეძებენ.

როგორც ცნობილი გახდა, გარდაცვლილები არიან, ლევან თედორაძე, მისი მეუღლე მაია ბერიძე და მათი არასრულწლოვანი შვილი, მურმან თედორაძე.

ადგილობრივების ინფორმაციით, თედორაძეების ოჯახს კიდევ ერთი შვილი ჰყავთ, რომელიც სტიქიას იმის გამო გადაურჩა, რომ ხულოში, ნათესავთან სტუმრად იმყოფებოდა.

"საშინელება ხდება. მთელი ოჯახი განადგურდა. თედორაძეების ოჯახიდან მხოლოდ გოგონა გადარჩა, რადგან სტუმრად იყო წასული ხულოში ნათესავთან" - ამბობენ AMBEBI.GE-სთან საუბარში ადგილობრივები.

ასევე გარდაცვლილია ბექა ბოლქვაძე, რომელიც ავტომობილში იმყოფებოდა და მასთან ერთად მყოფი ახალგაზრდა.

"ბიჭები მეგობართან სტუმრად იყვნენ ამოსულები, მოძრაობისას გზაზე ხის გამო შეფერხება შეიქმნა, ისინი ხის გადატანას გეგმავდნენ და გზის გაგრძელებას, სწორედ ამ დროს მიწის მასა ჩამოწვა და ბიჭები ჩაიყოლა", - აცხადებენ სოფელში მცხოვრებლები.

გარდაცვლილების შესახებ სოციალურ ქსელში პოსტს აქვეყნებს არასამთავრობო ორგანიზაცია "ემიგრანტის იმედის" ხელმძღვანელი შოთო სიხარულიძე:

"გარდაცვლილი იპოვეს ორივე მანქანაში....ბექა და მეორეს ვინაობა ჯერ უცნობია... ღმერთმა ნათელში ამყოფოს თქვენი ლამაზი სული..

(საცხოვრებელ სახლში სამი ადამიანი – ლევან თედორაძე, მისი მეუღლე მაია ბერიძე და მათი არასრულწლოვანი შვილი, მურმან თედორაძე იმყოფებოდნენ, ხოლო ავტომობილში სოფელ ერგეში მცხოვრები ბექა ბოლქვაძე და მასთან სტუმრად მყოფი ხელვაჩაურის მკვიდრი, რომლის ვინაობა ამ ეტაპზე ჩვენთვის უცნობია ტოიოტა პრიუსით იმყოფებოდნენ.)))

სულ 5 ადამიანი ჩაიტანა მეწყერმა... ამ წუთებში ბათუმში ძლიერი წვიმა და ძლიერი ქარია...." - წერს შოთო სიხარულიძე.