დაღუპული და დაჭრილი ათობით ჯარისკაცი და მშვიდობიანი მოსახლე - რა ხდება ამ დროისთვის მთიან ყარაბაღში, სადაც საომარი მოქმედებები მიმდინარეობს

მთიან ყარაბაღში აზერბაიჯანსა და სომხეთს შორის საბრძოლო მოქმედებები გრძელდება. დაპირისპირებული მხარეები კი ბრძოლებისა და მსხვერპლის შესახებ განსხვავებულ ინფორმაციას ავრცელებენ.

აზერბაიჯანის თავდაცვის სამინისტროს ცნობით, ქვეყნის არმია ოკუპირებული ტერიტორიების გასათავისუფლებლად ინტენსიურ ბრძოლას განაგრძობს. სამინისტროში აცხადებენ, რომ 27 სექტემბრიდან დაჭრილი და დაღუპულია 2 300-მდე სომეხი ჯარისკაცი, გარდა ამისა, განადგურებულია 130 ტანკი და სხვა ჯავშანტექნიკა, 25-მდე საჰაერო თავდაცვითი სისტემა, იარაღის 5 საწყობი, 50-მდე ტანკსაწინააღმდეგო სისტემა.

აზერბაიჯანის თავდაცვის უწყების ინფორმაციით, გუშინდელი ბრძოლის დროს აზერბაიჯანულმა ძალებმა ხოჯალის რეგიონში საზენიტო-სარაკეტო სისტემა С-300-ი გაანადგურეს.

სომხეთის თავდაცვის სამინისტროს პრესმდივნის შუშან სტეპანიანის ინფორმაციით, ღამით სომხებმა სტეპანაკერტში ორი უპილოტო საფრენი აპარატი ჩამოაგდეს. ასევე სომხეთის თავდაცვის უწყების წარმომადგენლის, არცრუნ ჰოვანისიანის განცხადებით, აზერბაიჯანის მიერ ფართომასშტაბიანი სამხედრო აგრესიის დაწყებიდან ამ დრომდე სომხურმა მხარემ მოწინააღმდეგის 790 ჯარისკაცი გაანადგურა.

"განადგურებულია 790 აზერბაიჯანელი ჯარისკაცი, მათგან 180 - ქალბაჯარის რაიონში. აზერბაიჯანულ მხარეს 1900 დაშავებული ჰყავს, განადგურებულია მათი 137 ტანკი და ჯავშანტექნიკა, 72 უპილოტო საფრენი აპარატი, 7 ვერტმფრენი და 1 თვითმფრინავი,“- განაცხადა ჰოვანისიანმა.

ამასთან, აღსანიშნავია, რომ როგორც რუსულ მედიაში წერენ, სომხეთი მთიანი ყარაბაღის დამოუკიდებლობის აღიარების საკითხს განიხილავს. ამის შესახებ სომხეთის პრემიერ-მინისტრმა ნიკოლ ფაშინიანმა ერევანში რუს ჟურნალისტებთან გამართულ შეხვედრაზე განაცხადა.

"ჩვენს დღის წესრიგში ასეთი ვარიანტი არსებობს. ასევე არსებობს სომხეთსა და მთიან ყარაბაღს შორის სტრატეგიული თანამშრომლობის შესახებ ხელშეკრულების გაფორმების, ან უსაფრთხოებისა და თავდაცვის სფეროში თანამშრომლობაზე შეთანხმების გაფორმების შესაძლებლობაც,“- განაცხადა ნიკოლ ფაშინიანმა.

ცნობისთვის, სომეხ და აზერბაიჯანელ ჯარისკაცებს შორის შეტაკებები 27 სექტემბრის შემდეგ მიმდინარეობს. დაპირისპირების შედეგად დაღუპულია ათობით და დაშავებულია ასობით ადამიანი, მათ შორის მშვიდობიანი მოსახლეობა. მხარეები მძიმე არტილერიის გამოყენებაში ერთმანეთს ადანაშაულებენ.